東京白日夢女:女人三十要結婚 理想定現實 咩先叫正常軌道

光影留情 於 19/04/2017 發表 收藏文章
<<東京白日夢女>> 係我冬季第二套會keep 住追嘅劇。好羞恥咁講句我有睇到喊。成輯劇唔係咩大龍鳳,叫我一句總結講咩就可能係「成班中女迷失在這標尾會遊戲」,咁樣講完應該無人想睇,日劇往往就係好平淡但中point。

對於呢套劇其實有好多感覺,真係想逐集講,今次就講住兩樣先啦,就係到底咩叫「正常」同埋女人嘅友情。

小學-> 中學-> 大學-> 買樓-> 三十歲前結婚生仔… oh 這就是人生嘅正常軌跡,大概?! 細細個覺得最正常嘅就係順利完成學業,過會考,過高考,入U。會考前係輕鬆嘅,所以會覺得留班或者停學的同學好似係有問題嘅失敗者。到左會考,原來要廿分以上唔係普通Level,不過都仲係未明三個人加埋先得兩分會係咩事。再到左AL先知,原來入U唔係必然,無野係應份。初次失敗,真係好得人驚,開始明白自己係一個廢柴。入左U之後再發現,原來唔係我一直俾父母管住先未拍拖,唔係夠大個就會有拖拍,唔係當「讀大學先好拍拖」呢個魔咒失效就會有拖拍,唔係一拍拖就會走到老,原來好多野唔係我揀。


正正常常嘅女仔點會無拖拍?但無拖拍到一個點就會諗到底自己係咪好唔正常? 到底咩係正常? 正常女仔三十歲左右結婚,但我連拖都未有得拍,點結? 要結的話,唔好講樓,連錢都冇,點結? 一切已經違反自己常識,好多以為唔需要努力,自然而然嘅事原來唔會喺自己身上發生,原來係奢侈品。呢個世界根本無野係「正常」,「正常」其實係理想,唔「正常」咪唯有接受現實。劇中三名女主喺café 見到三個廿幾歲嘅女仔慶祝最後一位閨蜜都結埋婚,笑說可以一齊陀B。作為觀眾嘅我望住佢地沿住正常嘅道路前行的歡欣,不禁問自己: 我係幾時開始脫軌,不禁承認: 我原來係三流嘅失敗者。可幸嘅係,三位女角喺事業上獨當一面,做到自己喜愛,能夠全心全意投入自己的工作。可惜喺香港地,難以發展自己理想,結婚反而係二次投胎嘅機會牌。

劇中三位女主可幸嘅亦係有兩個好姊妹,一遇到煩惱就可以call 出黎訴苦俾意見。女仔有時就係想有人認同自己,一齊鬧、一齊笑、一齊癲、一齊攬住痛哭。「女生外向」,好多(唔係100%)女仔一有男朋友通常就嫁雞隨雞,失左蹤,男仔係唔會明女仔心目中「男朋友」同「朋友」嘅意義係唔同,唔係是日精選,今日要friend,聽日就要女,有啲野係要「男朋友」一齊先有意思,正如要出火果陣,你會唔會走左去搵個friend? 而男仔就好多時撇低女朋友去左玩。但喺呢啲時間,當你被人丟低左,你嘅好姊妹就會出黎support 你。女仔就係會知大家視男朋友比較重要,但仍然無限量支持對方,做對方嘅後盾,大概,係想對方幸福。相反,男朋友嘅老死就最鍾意人地拍緊拖果陣不識相打黎叫去玩,或者視成功唔放人俾呀嫂為成就感(當然呢啲係個別例子)。

講到女人嘅幸福,除左「正正常常」咁結婚生仔,可以係好似倫子咁搵到個靚仔但又心意相通嘅人,或者好似阿香咁,自己最愛嘅人發現自己都係佢嘅最愛,浪子回頭。但而家我都只係好似劇中結局嘅小雪咁孑然一身。

*圖片來自網絡
標籤: 日劇  看後感  東京白日夢女  中女  沒女  敗犬  兩性  戀愛  影評  

留言


請按此登錄後留言。未成為會員? 立即註冊
快捷鍵:←
快捷鍵:→