波士BB: 哥哥家姐的最終幻想 [如有劇透，唔好意思]

呢部電影劇情都幾簡潔，就係有一日細佬B黎左屋企，受盡父母萬千竉愛，哥哥覺得不是味兒，更發現細佬B嘅秘密，然後展開一場冒險…

講講人設先啦[小心劇透]，

哥哥其實就已經七歲，即係小二啦，全日喺屋企hea，我自己就覺得七歲算係已經懂事，未必造就到咁妙想天開嘅內容， 而且兩個小朋友年齡差真係頗大。細佬B就外型可愛，電影中好多有BB嘅場景都非常治癒。可惜在下睇嘅係粵語配音，Bob把聲辨識到太高，睇到有啲出戲。你知架啦，Bob 同個B又係都係光頭咁款，又係圓碌碌咁，每次覺得細佬B好打耳果陣又會浮起Bob個樣，令人喺覺得細佬B得唔得意之間掙扎。就好似同你啱啱攬完嘅迪士尼人物，原來係一個禿頭呀叔咁。可能呢個安排就係為左營造出呢個BB有古怪，並非想像中可愛嘅感覺掛！其他BB設定都相當有趣，有冇腦大隻佬、擦鞋仔、得個樣秘書，其中與男人Mary Poppins 打鬥一段搞笑精彩，另外肥仔珍寶好似以前美食風球果個吉祥物。
影片亦為BB嘅出現創造左個新解釋，創作了一個癲覆大人認為嘅常理同時又可以自圓其說嘅世界觀，甚有創意。再睇埋網上有關呢部電影彩蛋嘅文章，我更加認為呢部其實係俾大人睇嘅電影。咩長島冰茶，一連串嘅大話，唔知小朋友睇完點諗，但做過人呀哥家姐睇完齣戲一定會有共鳴位，就係點解有隻外星生物入侵搶走我daddy mammy。

電影完全講中我童年時對細佬妹嘅敵意，相信同細佬妹有一段年齡差嘅朋友都會咁樣胡思亂想過。但在下嘅妄想係有少許分別，比起覺得細佬妹係唔知邊度派黎嘅邪魔外道，我反而覺得自己係俾人執番黎果個，細佬妹先至係daddy 同mammy 嘅愛情結晶品。我同細佬相差四年，睇住佢出世，反而自己身世成迷；再者，全家嘅關注轉移晒去細佬到，好似佢地先係一家人。無容置疑，呢部電影係勾起左我同細佬初相處嘅回憶。
電影都想帶出已發展國家出生率低嘅問題，好多人有錢寧願養狗好過。但唔知係因為我對呢個社會已經絕望，唔想生個B出黎害佢，定抑或電影焦點太多，導致呢個中心思想無咁突出，我一啲都理解唔到一世狗仔B有幾邪惡，同蜘蛛俠/忍者龜要散播嘅病毒完全兩回事，亦唔覺BB救世界。

總結下，作為動畫片，在下認為此片在魔海奇緣之上，但比起Inside Out尚有少許距離。