【偶像宅的心路歷程】成為了日本偶像飯：後記

距離小弟第一次喺呢度出文，都己經過左一個月，都有唔少朋友支持小弟嘅文章，亦都引起咗唔少朋友嘅共鳴，真係好開心，亦都有啲喜出望外，好多謝各位嘅支持。

一開始小弟寫咗第一個系列講日本偶像宅嘅心路歷程，其實呢一個過程其實幾平凡，每一個飯入偶像圈背後都有自己嘅起點，不過對我嚟講係我一個好奇妙嘅旅程，。小弟呢幾年嚟都面對咗唔少困難錯折，特別係入坑嘅時候可以話係喺生活中面對左好大嘅難題，不過追星嘅過程入面，見到唔同成員嘅付出同努力，比咗我好多心靈上嘅支持同鼓勵，雖然而家小弟亦都面對住好多難題，但係追星亦都好似成為咗小弟嘅小小心靈雞湯。Anyway，成為咗偶像飯都三四年，藉住呢個分享亦令我發現原來有好多知音人，真係好感恩各位睇完咗小弟呢個系列。

尋日小弟寫咗一篇文介紹乃團嘅御三家，寫完其實有啲感觸，所以寫咗呢一篇後記。2011年8月21號係乃木坂46首次登場嘅日子，今年已經踏入第九年。雖然我之前講過而家小弟追星步進咗一個平穩期，但係感覺上卻出現咗一啲微妙嘅變化。我入坑嘅時候雖然係三期生加入左冇幾耐，但係我補番嘅時候，睇嘅卻係一、二期生由零開始嘅奮鬥過程，由寂寂無名到全面起飛睇到我好感動(相信補過番嘅飯們一定會有咁嘅感覺)，初期時嘅派紙巾不斷食檸檬，いこまちゃん作為交換生兼任AKB，蘋果文春炮事件，初上紅白，去到單曲初動銷量過百萬，踏上東京巨蛋，蟬聯日本唱片大賞，成個過程可以話好熱血，大概就係呢個過程令我對一、二期生產生咗好大嘅感覺，心目中已經有一個無可撼動嘅地位，亦都有一種莫名嘅親切感。

三、四期生我都有推，但係比我嘅感覺卻好唔同，特別係乃團發展開始平穩增長，冇咗一開始打江山嘅感動，大概就係呢個原因令我感覺上出現咗微妙嘅變化。而且一期生同二期生好多成員都畢咗業，まいまい深川麻衣、上一篇文介紹過嘅ななみん橋本奈々未、なっちゃん西野七瀬、前隊長桜井玲香，以往熟悉嘅面孔一個一個咁離去，有少少陌生。

當日乃團一開始嘅設定係作為AKB嘅公式對手，以今日嘅成績嚟計，佢哋可以話超額完成，一、二期生所立下嘅汗馬功勞，只係希望三、四期生所付出嘅努力亦都可以取得成功，好好守住前輩打落嘅江山。下面呢首歌係小弟喺乃團入面相當喜歡嘅一首，歌詞入面相當有意思，亦都幾乎係畢業live入面必唱嘅一首: きっかけ。

※本文所有圖片由網上擷取或轉貼，影像版權所有屬該公司版權所有，如有侵權敬希告知，本人會立即移除。※喜歡我嘅文章可以like一like我嘅Facebook專頁，你地少少嘅支持就係對我最大嘅鼓勵
https://www.facebook.com/aotsukiidoltalk