【唔專業劇評】Change ── 改變與挑戰

四十六的日子 於 31/08/2020 發表 收藏文章
注意:內文或者會有劇透,介意者慎入

話說呢排多咗好多時留喺屋企,無野做就開住部電視嚟睇,除咗追新播嗰啲之外,呢排viu又係咁up木村大神啲舊劇,我當然就開嚟煲啦,而家啱啱煲完呢套Change,又可以話應該係我第一次完整咁睇。

呢套劇由木村大神擔正,編劇同律政英雄、神探伽俐略都係同一人: 福田靖,故事嘅大概流程同其他以政治為題嘅劇集類近,好似韓國嘅大人物、熟女辛市長兩套劇嘅故事外殼 (呢啲題材其實都幾受觀眾歡迎),不過鋪排同細節上有好多唔同,特別係日劇得十集劇情會緊湊好多,所以比觀眾嘅感覺都會好唔同。(純粹小弟個人感覺,有時候韓劇嘅劇情會發展展得慢啲,分咗廿幾集,不過都係各有千秋。)

免得劇透太多,故事嘅大綱我就只係略略介紹一下,木村飾演嘅朝倉啟太雖然係政治家眾議員朝倉誠嘅二仔,不過佢同佢父親嘅關係唔太好,直至佢父親同接班人阿哥喺越南發生空難身亡,喺鄉下地方小學做老師嘅佢至被迫去選眾議員補選,之後奇跡般當選。政黨入面嘅高層睇中佢只係新嚟新豬肉,㧬左佢去做首相,不過啟太一直都本住自己嘅原則去推行政策,開始同黨內高層產生摩擦,亦衍生出一個空前嘅政治危機。

老老實實,計劇情其實都幾易估,好日本漫畫風,主人公能力值爆up (當然啟太有好努力付出過,唔係突然開掛式暴升啦),不過鋪排得追看情幾強,當中小弟認為有二個地方值得比like,第一係呢套戲雖然有愛情線,不過加得嚟又冇喧賓奪主,小弟最like係最後一幕隱晦咁交代男女主角嘅發展,觀眾get到之餘又可以好好咁同主線劇情共存;第二個地方係大結局啟太一個接近二十分鐘嘅獨白,呢一段佔咗成集嘅三份一時間,編劇都真係好大膽,真係冇乜劇會咁做,因為唔會知道觀眾個接受程度同埋回應有幾大,不過喺小弟眼中絕對係值得,啟太講返自己嘅初衷、心路歷程,對觀眾嚟講除咗係對套劇一個conclusion之外,亦都係相當感動。 (小弟聽到有小小眼濕濕)

講返點解會用改變與挑戰做呢篇文嘅題目呢,大概係因為呢兩個terms最能夠對套戲做介紹,劇入面啟太佢冇挑戰好多野,改變嘅亦都係一啲比較細微嘅事,不過其實小弟認為做好每一件小事唔係比一野搞單大嘅更加值得,更加難得咩 (戴定頭盔,只係小弟個人少少嘅諗法)。最後未睇呢套戲或者睇緊呢套戲嘅朋友,大家可以用三兩分鐘時間睇埋個片尾,片段好睇,小弟特別喜歡木村背影望住國會大樓個shot,片尾首歌更係國際天后麥當娜嘅作品: Miles Away,未聽嘅朋友可以留意一下。

※本文所有圖片由網上擷取或轉貼,影像版權所有屬該公司版權所有,如有侵權敬希告知,本人會立即移除。※
喜歡我嘅文章可以like一like我嘅Facebook專頁,你地少少嘅支持就係對我最大嘅鼓勵
https://www.facebook.com/aotsukiidoltalk
標籤: Change  木村拓哉  

留言


請按此登錄後留言。未成為會員? 立即註冊
    快捷鍵:←
    快捷鍵:→