【唔專業劇評】回憶中嘅命中注定 ── 十一年後再睇命中注定我愛你

四十六的日子 於 05/08/2020 發表 收藏文章
注意:內文或者會有劇透,介意者慎入(雖然應該大部份人之前都睇過)

話說呢排多咗留喺屋企,無聊成日開住部電視睇,都煲咗好幾套戲,除咗新播嗰啲之外,嗰日喺黃viu搵到命中注定我愛你,啲回憶返晒嚟。冇記錯第一次睇嗰陣應該仲係小學生,暑假嗰陣無線喺朝早播,嗰時差唔多日日睇,之後重播都有睇(話時話,其實咁多次都未試過完整全套睇一次),而家時間多咗所以用咗四日完完整整翻睇咗一次。
小弟除咗哈日劇之外,細個嗰陣時真係好鐘意睇台劇(應該話電視成日播),命中注定我愛你(下面簡稱命中)絕對係一套經典中嘅經典,之後好多地方都翻拍過,不過小弟始終最鐘意原版。簡單咁介紹吓劇情,便利貼女孩陳欣怡意外之下同大公司社長紀存希發生左關係,仲有埋BB,不過紀社長就已經有拍咗幾年拖嘅女朋友Anna,但係Anna就因為自己嘅芭蕾舞事業而成日放飛機。一開始陳欣怡慢慢喜歡左紀社長,事事為佢不求回報咁付出,但係紀社長就只鐘意Anna;不過到欣怡小產去咗上海之後佢先發覺自己最鍾意嘅並唔係Anna,扭盡六壬去追返人。
老老實實,當年佢嘅劇情係好創新,不過稍嫌中間轉折位多咗啲,但係以今日嘅標準去睇,只係可以話經典,中間亦都睇得出好多反駁位。劇情上未必可以話好刺激好新奇,不過小弟由細到大都鐘意睇小品多啲,起碼唔會睇到咁緊張,而命中就俾到我一種好窩心嘅感動,加上其實今次煲佢我都唔算係為劇情去睇,反而係想重溫吓回憶中嘅片段(喺小弟煲劇嘅生涯入面,呢一套都可以係一塊重要嘅拼圖,亦都係小弟最喜歡嘅幾套台劇之一⋯有一套係再舊啲嘅流星花園)。
不過今次都有開心大發現,原來劇入做年紀大角色嗰啲演員全部真實年齡都係比角色後生好多,好似做陳欣怡阿媽嘅演員林美秀當時只係四十歲左右,而飾演紀存希嫲嫲,劇入面成八十歲嘅演員譚艾珍當年只係五十幾歲,不過佢哋嘅演技真係好好成功,套劇一路睇落去完全唔覺有咁大差距,完全冇違和感。

睇返命中除咗勾返起小弟嘅回憶,亦令小弟好感嘆時間真係過得好快,第一次睇就好似係冇幾耐之前嘅事,但係原來已經過咗十一年。最後送上由元若藍同吳忠明合唱嘅心願便利貼,雖然係片尾曲,不過我覺得呢首歌好反映到成個劇情故事,亦希望各位可以喺呢首歌重溫番呢套經典台劇,回味番當時嘅時光。


另外小弟都有寫文講追日本偶像嘅心路歷程,傳送門喺呢度:【偶像宅的心路歷程】成為了日本偶像飯(三)
https://ent.fanpiece.com/m/dayin46/c1381791.html

※本文所有圖片由網上擷取或轉貼,影像版權所有屬該公司版權所有,如有侵權敬希告知,本人會立即移除。※
喜歡我嘅文章可以like一like我嘅Facebook專頁,你地少少嘅支持就係對我最大嘅鼓勵
https://www.facebook.com/aotsukiidoltalk

留言


請按此登錄後留言。未成為會員? 立即註冊
    快捷鍵:←
    快捷鍵:→