文 : 吹水王‧泰利
睇完呢部戲，心入面首先出現兩個字:「可惜」。
本片導演甄柏榮第一部導演長片作品《夠殭清道夫》(與趙善恆合導)，小弟也曾作評價;在此小弟希望呃少少字數，引述一下之前對《夠殭清道夫》嘅評論文章:
「……(《救殭清道夫》)大部份情節都係蜻蜓點水，一點即逝，就如張春天對逝去父親(歐錦棠加埋唔夠一分鐘嘅演出)嘅思憶，抑或同叔父輩硬漢(錢小豪)嘅亦師亦父之情等，雖然係有所描述，但當情節仍未引起觀眾共鳴時，已經去咗下一個情節……加上兩位導演響分鏡頭嘅想像力同以鏡頭帶動觀眾情感嘅功力上，仍有待進步。影片大部份時間嘅電影語言都比較順手沾來，嚴厲D講係比較電視劇化。大部份場口都甚為依賴演員嘅本色去帶來趣味……」
(*原文 :
https://www.facebook.com/confessionmoviejunkiehk/photos/a.558055760944544/1281317075285072/?type=3&theater
點解小弟要再一次引述以前寫過嘅文章? 係因為今次觀看《女皇撞到正》，發現影片出現嘅主要問題，同文章中寫過嘅大致一樣! 《女皇撞到正》嘅主線係講述周秀娜飾演嘅時尚女性美琪，響一次意外後獲得陰陽眼異能，被三隻幽靈 (葛民輝、邵美琪、吳耀漢飾)纏繞，希望美琪幫佢地解決未竟之冤，重新投胎做人;響幫助三隻幽靈之中，美琪既結識咗命格極陰嘅麻甩哥阿進(張繼聰飾)，又繼承咗葛民輝生前有份經營嘅賓館……故事發展基本上到此為主，之後都係推砌情節同言情部份。
但問題係《女皇撞到正》雖然片長僅100分鐘唔夠，但係幾乎每15分鐘劇情就會轉向。頭15分鐘係靈異版嘅《29+1》，周秀娜再度飾演事業得意但情感失意嘅女性，因為一次意外令由得變失，之後風向一轉， 三隻幽靈出現，就變成女裝版《小生怕怕》加許鞍華《撞到正》。本來周秀娜開發陰陽眼、白日下人鬼難分嘅場面拍得甚為妙趣，但同樣未有時間好好再去玩橋(而且表現鬼魂嘅電腦特技效果……響一部2018年嘅電影中應有更進步嘅表現方法吧)，馬上就要去到幫三幽靈解冤嘅部份。中間結識張繼聰、以及繼承賓館嘅過程，就穿插咗幾部周星馳經典電影如《唐伯虎點秋香》《回魂夜》《食神》等嘅經典橋段同鏡頭，如眾人「打破四面牆」向觀眾介紹開天眼方法係唐伯虎「含笑半步釘」嘅2018年版、張繼聰反覆入急症室已經唔止戲謔《回魂夜》咁簡單、旅館重新開張眾人一字排開等客仔嘅鏡頭，睇過《食神》嘅朋友亦會知道係來自戲中邊個鏡頭……
中後段至結局前劇情有點拖拉，編導對於是否在銀幕上綴合周秀娜同張繼聰似乎甚覺為難，每次到二人嘅談情戲都以鬧劇告終;然後到最後15分鐘左右，周秀娜重返出身嘅兒童院，竟然一口氣直奔到全片最大嘅一個扭橋位，解釋咗三幽靈要搵周秀娜幫手嘅原因! 雖然嗰段解橋蒙太奇，剪得言簡意賅、相當用心，只用區區三兩分鐘已將前因後果說清;但更因此而表現出編響在前段對於三幽靈同周秀娜嘅關係描繪不足，除咗吳耀漢一兩句看似無心嘅逗笑對白原來早有玄機外，葛民輝、邵美琪竟未有類似嘅描述，之前周秀娜同葛、邵二人嘅對手戲，都伏筆不足;另外描述周秀娜對童年記憶模糊，亦以少一兩句對白交待，其實對結局如此有影響力嘅細節，不妨多加描述。令到結局雖然希望有《我左眼見到鬼》嘅效果 (註 : 有網友稱本片結局更類似一部韓國電影《開心家族》，小弟無睇過無從評論)，不過結果係感人有餘但情理未足。
換言之， 《女皇撞到正》嘅問題基本上同《救殭清道夫》大致相同，都係情節為求豐富過於埋砌，為求觀眾滿腹而回，卻忽略咗角色、故事情緒上嘅建立同發展(例如周秀娜角色由不近人情到開始懂得關心身邊人嘅轉變過程幾乎從缺); 帶動觀眾情感嘅功力上仍有待改善……至於電影語言方面，今次唔少場口響處理上，電視劇/處境劇化問題比《救殭清道夫》更為嚴重。有相當多嘅場面，係以平板嘅半身鏡拍攝，基本上相當依賴演員自身嘅演出功力去完成場面。本來以中遠景/半身鏡拍攝，可以避免過於以特寫主導演員演出，給予演員足夠空間去表演;但如果有相當多時間導演都只係要求演員坐定定或企定定交對白，加上唔多分鏡/以鏡頭強調表演情感……如果係出於一D唔多鍾意分鏡(或唔識/懶分鏡)嘅導演如谷德昭或葉念琛之流，小弟尚且理解;但作為受到正統電影教育以及行業經驗充足嘅甄柏榮導演，應該對於場面調度同鏡頭配合叙事有一定嘅駕馭能力吧。其實開篇講述驕橫跋扈嘅周秀娜到酒店巡視業務，鏡頭同場面調度都係唔錯嘅 ，但去到主戲時卻變得每況愈下。唯一明顯有改善嘅地方，係《女皇撞到正》響整體剪輯上，終於無咗《救殭清道夫》嘅為求節奏明快而過於凌碎。
由此可見，上述種種，既係兩片之間嘅共同問題，同樣地也可理解成不是問題。因為重覆出現嘅因素與其話係「問題」，不如講係「本性」。編導係真心相信電影作品應該以此作法。情感上斷截禾蟲唔緊要! 最緊要多嘢睇。處理手法電視劇化唔緊要! 最緊要易入口。其實當小弟響網上睇到一D觀眾對本片嘅首輪觀後意見後，發現錯嘅可能係我自己。有唔少觀眾，對呢種電影當電視劇拍、大雜膾式雜錦故事，原來都好受落。或者，呢種不拘一格、為其目的乜都得，就係港片嘅真正核心精神。成也港片，敗也港片。
響小弟成長嘅年代，電影相對投資額更多、格局更大、拍攝得更仔細、工藝性較高;而電視劇則不求迂迴，更為通俗、直接、但求傳意性同可追性，兩者係有唔同嘅法度嘅。但係時至今日，當短文被稱為微電影、觀眾睇戲唔係去電影院而係上網睇時;不同嘅影像文化產品，已經不知不覺地被混和，當中嘅界線變得模糊，慢慢地不同媒介嘅法度亦被融合甚至消亡。漸漸地我地得返一種影像產品，無論放到電視、電影、網上，帶俾觀眾嘅感覺都係一樣。但問題係上網睇片同去電影院睇戲，除咗時間同金錢嘅投入截然不同外，電影嗰種「Larger than Life」嘅放映模式，本來就同小螢幕有好大分別。不過事實係，這是一個「不要分我那麼細」嘅年代。響呢個年代，YouTuber 「Ming仔」嘅客串，比起兩屆香港電影金像獎最佳女配角邵音音嘅演出，更加係一件事。「Ming仔」尚且可以客串做牛頭馬面之一，但邵音音飾演嘅只係一個連名都無嘅婆婆角色。唯有咁講，如果《女皇撞到正》係一部放響騰訊、愛奇藝或者「迫迫Channel」上點擊播放嘅網絡電影，小弟可能無咁多意見。但係如果係一部放到電影院上放映嘅電影，小弟始終有點堅持，亦做不到像某些網上評論人般有理無理係咁吹奏。《女皇撞到正》絕不是爛片，但就係兩個字 : 「可惜」 : 既為影片「可惜」，也為香港電影發展至今「可惜」。
香港電影吹水王
https://www.facebook.com/confessionmoviejunkiehk/
國際電影吹水王
https://www.facebook.com/confessionmoviejunkieinter/
吹水王‧泰利
https://www.facebook.com/terryboilwaterkinghk/
睇完呢部戲，心入面首先出現兩個字:「可惜」。
本片導演甄柏榮第一部導演長片作品《夠殭清道夫》(與趙善恆合導)，小弟也曾作評價;在此小弟希望呃少少字數，引述一下之前對《夠殭清道夫》嘅評論文章:
「……(《救殭清道夫》)大部份情節都係蜻蜓點水，一點即逝，就如張春天對逝去父親(歐錦棠加埋唔夠一分鐘嘅演出)嘅思憶，抑或同叔父輩硬漢(錢小豪)嘅亦師亦父之情等，雖然係有所描述，但當情節仍未引起觀眾共鳴時，已經去咗下一個情節……加上兩位導演響分鏡頭嘅想像力同以鏡頭帶動觀眾情感嘅功力上，仍有待進步。影片大部份時間嘅電影語言都比較順手沾來，嚴厲D講係比較電視劇化。大部份場口都甚為依賴演員嘅本色去帶來趣味……」
(*原文 :
https://www.facebook.com/confessionmoviejunkiehk/photos/a.558055760944544/1281317075285072/?type=3&theater
點解小弟要再一次引述以前寫過嘅文章? 係因為今次觀看《女皇撞到正》，發現影片出現嘅主要問題，同文章中寫過嘅大致一樣! 《女皇撞到正》嘅主線係講述周秀娜飾演嘅時尚女性美琪，響一次意外後獲得陰陽眼異能，被三隻幽靈 (葛民輝、邵美琪、吳耀漢飾)纏繞，希望美琪幫佢地解決未竟之冤，重新投胎做人;響幫助三隻幽靈之中，美琪既結識咗命格極陰嘅麻甩哥阿進(張繼聰飾)，又繼承咗葛民輝生前有份經營嘅賓館……故事發展基本上到此為主，之後都係推砌情節同言情部份。
但問題係《女皇撞到正》雖然片長僅100分鐘唔夠，但係幾乎每15分鐘劇情就會轉向。頭15分鐘係靈異版嘅《29+1》，周秀娜再度飾演事業得意但情感失意嘅女性，因為一次意外令由得變失，之後風向一轉， 三隻幽靈出現，就變成女裝版《小生怕怕》加許鞍華《撞到正》。本來周秀娜開發陰陽眼、白日下人鬼難分嘅場面拍得甚為妙趣，但同樣未有時間好好再去玩橋(而且表現鬼魂嘅電腦特技效果……響一部2018年嘅電影中應有更進步嘅表現方法吧)，馬上就要去到幫三幽靈解冤嘅部份。中間結識張繼聰、以及繼承賓館嘅過程，就穿插咗幾部周星馳經典電影如《唐伯虎點秋香》《回魂夜》《食神》等嘅經典橋段同鏡頭，如眾人「打破四面牆」向觀眾介紹開天眼方法係唐伯虎「含笑半步釘」嘅2018年版、張繼聰反覆入急症室已經唔止戲謔《回魂夜》咁簡單、旅館重新開張眾人一字排開等客仔嘅鏡頭，睇過《食神》嘅朋友亦會知道係來自戲中邊個鏡頭……
中後段至結局前劇情有點拖拉，編導對於是否在銀幕上綴合周秀娜同張繼聰似乎甚覺為難，每次到二人嘅談情戲都以鬧劇告終;然後到最後15分鐘左右，周秀娜重返出身嘅兒童院，竟然一口氣直奔到全片最大嘅一個扭橋位，解釋咗三幽靈要搵周秀娜幫手嘅原因! 雖然嗰段解橋蒙太奇，剪得言簡意賅、相當用心，只用區區三兩分鐘已將前因後果說清;但更因此而表現出編響在前段對於三幽靈同周秀娜嘅關係描繪不足，除咗吳耀漢一兩句看似無心嘅逗笑對白原來早有玄機外，葛民輝、邵美琪竟未有類似嘅描述，之前周秀娜同葛、邵二人嘅對手戲，都伏筆不足;另外描述周秀娜對童年記憶模糊，亦以少一兩句對白交待，其實對結局如此有影響力嘅細節，不妨多加描述。令到結局雖然希望有《我左眼見到鬼》嘅效果 (註 : 有網友稱本片結局更類似一部韓國電影《開心家族》，小弟無睇過無從評論)，不過結果係感人有餘但情理未足。
換言之， 《女皇撞到正》嘅問題基本上同《救殭清道夫》大致相同，都係情節為求豐富過於埋砌，為求觀眾滿腹而回，卻忽略咗角色、故事情緒上嘅建立同發展(例如周秀娜角色由不近人情到開始懂得關心身邊人嘅轉變過程幾乎從缺); 帶動觀眾情感嘅功力上仍有待改善……至於電影語言方面，今次唔少場口響處理上，電視劇/處境劇化問題比《救殭清道夫》更為嚴重。有相當多嘅場面，係以平板嘅半身鏡拍攝，基本上相當依賴演員自身嘅演出功力去完成場面。本來以中遠景/半身鏡拍攝，可以避免過於以特寫主導演員演出，給予演員足夠空間去表演;但如果有相當多時間導演都只係要求演員坐定定或企定定交對白，加上唔多分鏡/以鏡頭強調表演情感……如果係出於一D唔多鍾意分鏡(或唔識/懶分鏡)嘅導演如谷德昭或葉念琛之流，小弟尚且理解;但作為受到正統電影教育以及行業經驗充足嘅甄柏榮導演，應該對於場面調度同鏡頭配合叙事有一定嘅駕馭能力吧。其實開篇講述驕橫跋扈嘅周秀娜到酒店巡視業務，鏡頭同場面調度都係唔錯嘅 ，但去到主戲時卻變得每況愈下。唯一明顯有改善嘅地方，係《女皇撞到正》響整體剪輯上，終於無咗《救殭清道夫》嘅為求節奏明快而過於凌碎。
由此可見，上述種種，既係兩片之間嘅共同問題，同樣地也可理解成不是問題。因為重覆出現嘅因素與其話係「問題」，不如講係「本性」。編導係真心相信電影作品應該以此作法。情感上斷截禾蟲唔緊要! 最緊要多嘢睇。處理手法電視劇化唔緊要! 最緊要易入口。其實當小弟響網上睇到一D觀眾對本片嘅首輪觀後意見後，發現錯嘅可能係我自己。有唔少觀眾，對呢種電影當電視劇拍、大雜膾式雜錦故事，原來都好受落。或者，呢種不拘一格、為其目的乜都得，就係港片嘅真正核心精神。成也港片，敗也港片。
響小弟成長嘅年代，電影相對投資額更多、格局更大、拍攝得更仔細、工藝性較高;而電視劇則不求迂迴，更為通俗、直接、但求傳意性同可追性，兩者係有唔同嘅法度嘅。但係時至今日，當短文被稱為微電影、觀眾睇戲唔係去電影院而係上網睇時;不同嘅影像文化產品，已經不知不覺地被混和，當中嘅界線變得模糊，慢慢地不同媒介嘅法度亦被融合甚至消亡。漸漸地我地得返一種影像產品，無論放到電視、電影、網上，帶俾觀眾嘅感覺都係一樣。但問題係上網睇片同去電影院睇戲，除咗時間同金錢嘅投入截然不同外，電影嗰種「Larger than Life」嘅放映模式，本來就同小螢幕有好大分別。不過事實係，這是一個「不要分我那麼細」嘅年代。響呢個年代，YouTuber 「Ming仔」嘅客串，比起兩屆香港電影金像獎最佳女配角邵音音嘅演出，更加係一件事。「Ming仔」尚且可以客串做牛頭馬面之一，但邵音音飾演嘅只係一個連名都無嘅婆婆角色。唯有咁講，如果《女皇撞到正》係一部放響騰訊、愛奇藝或者「迫迫Channel」上點擊播放嘅網絡電影，小弟可能無咁多意見。但係如果係一部放到電影院上放映嘅電影，小弟始終有點堅持，亦做不到像某些網上評論人般有理無理係咁吹奏。《女皇撞到正》絕不是爛片，但就係兩個字 : 「可惜」 : 既為影片「可惜」，也為香港電影發展至今「可惜」。
香港電影吹水王
https://www.facebook.com/confessionmoviejunkiehk/
國際電影吹水王
https://www.facebook.com/confessionmoviejunkieinter/
吹水王‧泰利
https://www.facebook.com/terryboilwaterkinghk/
請按此登錄後留言。未成為會員? 立即註冊