《鐵血戰士:血獸進化》 (*含劇透)

香港電影吹水王 於 24/09/2018 發表 收藏文章
文 : 吹水王‧泰利

《鐵血戰士:血獸進化》娛樂性高唔高? 高!
節奏快唔快? 快!
「Predator」出場時間多唔多? 多!
動作場面多唔多? 由頭打到尾咁滯!

照咁講,呢部新一集「鐵血戰士」應該非常好睇,啱唔啱? 不過如果將歷年來咁多部「鐵血戰士」電影並列 (撇除《AvP》系列), 《鐵血戰士:血獸進化》亦只能排於四片中嘅末席,亦即係包尾。

無錯,一部商業電影,最重要固然係娛樂性;但係娛樂其實都係一種精湛嘅藝術,需要好多工藝嘅輔助。當年《鐵血戰士1》嘅成功就包括好多因素,例如電影類型嘅相互融合 (越戰式戰爭片+科幻動作)、「Predator」嘅造型設計、John McTiernan徐疾有致、注重氣氛鋪排嘅精彩執導…..去到《鐵血戰士2》,將整個背景由原始森林搬到大城市,只係響故事橋段同導演手法無法超越前作,當年已經被觀眾媽個狗血淋頭…..但係如果以現今嘅電影水平嚟睇, 《鐵血戰士2》響氣氛營造上已經係超哂班! 2010年嘅《新鐵血戰士》將故事設定於不知名嘅叢林之中,有追源溯本嘅傾向;雖然製作上有D將價就貨、主角(金像影帝Adrien Brody)人選存有爭議外;監製、導演起碼極力重現當年《鐵血戰士1》嘅蠻荒驚慄感。

至於呢部《鐵血戰士:血獸進化》呢? 則極力營造八十年代娛樂片嘅風味,例如將故事背景設定於《Stranger Things》式「Hawkins」嘅小鎮,並且力求節奏快、動作多,務求先聲奪人,那怕有姿勢無實際。雖然編導儼如行駛過山車般將橋段密鋪平面填個飽滿,但只能造成水過鴨背嘅效果;特別係今次嘅「Predator」同族操戈主線寫得過於含糊,響「Predator」身上發現人類DNA亦無深刻描述,太過為續集而留一手,令成部電影響故事上只淪為一個franchise reboot嘅序幕。

呢部電影嘅剪接尤其古怪。為求保持高速嘅叙事節奏,將場口剪得極之零碎,因此漠視介紹、鋪埋出場角色嘅過程,老兵男主角、阿氏保加症小孩、生物學家女角全部毫無前因後果出現,甚至連「Predator」本尊,出現時都無咗以往山雨欲來嘅氣氛。可能因為而家已經係一個「凡事Fast Forward」 嘅年代,觀眾被手機、遊戲寵壞,對事物嘅耐性跌到零點; 《鐵血戰士:血獸進化》的確適合最無耐性嘅觀眾觀看 - 只要你接受狂風暴雨但點到即止的娛樂方式。但係話說回來,可能小弟老派,我仍然傾向鍾情以前「鐵血戰士」電影嗰種慢火煎魚嘅懸疑味道。

除咗影片節奏快得離奇外,影片響角色營造上亦空洞得可以;退役大兵組固然Stereotype,(非常好戲嘅) Jacob Tremblay飾演嘅阿氏保加症小孩,其病症背景亦只係用來描述其資優、足以破解外星文明嘅佈景版。至於Olivia Munn飾演科學家,佢可能係電影史上身手最好嘅生物學家,既可持槍窮追鐵血戰士再跳上校巴頂部,更可以同專業大兵一齊行動、頂著機槍加榴彈發射器向外星船怒轟,比大兵更似大兵。由此可見所謂角色背景都係廢話,去到尾都係持槍互轟,但求過癮。連Henry Jackman 嘅配樂,都只係不斷模彷Alan Silvestri嘅經典配樂,但又改D唔改D;倒不如好似《新鐵血戰士》咁,響片尾先至出返元祖主題音樂致敬,好過係咁致敬但又東施效顰,反而不敬。不過有趣一點,係當年響《鐵血戰士1》對抗「Predator」嘅係一對精銳部隊, 響《鐵血戰士2》係對慣重火力毒犯嘅爛撻撻差人, 《新鐵血戰士》係形形種種嘅殺人機器,而《鐵血戰士:血獸進化》…..只係一班甩皮甩骨、被軍部同社會遺棄嘅退伍軍人, 編導Shane Black算係為影片注入咗一種ironic嘅味道。

至於影片真正主角「Predator」,雖然今次出場時間冠絕各部「鐵血戰士」電影,Fans一定睇到飽;但係無可避免地同影片一樣,變得愚蠢、大而無當。當年《鐵血戰士2》人類精兵出動高科技,仍然響凍房被「Predator」反捕殺;反而今次《鐵血戰士:血獸進化》,即使人類同「Predator」明刀明槍, 「Predator」竟然佔唔上任何優勢,無論係逃兵定巨型獵人,今次嘅「Predator」都相當容易被人類所傷,連經典嘅武器肩炮、無定飛輪、鋼絲網都未有充分運用,智商指數明顯大減。而且行動力上亦少咗昔日電影中嘅敏捷,即使行路、奔跑都有種「大舊衰」嘅味道,無咗以前如獵豹般嘅矯健。不過響屠殺人類嘅鏡頭上,編導仍然叫做落足血漿,盤腸轟烈程度超越當年嘅張徹電影。

不過話說回來, 《鐵血戰士:血獸進化》雖然劇情空洞,但如果你談唔上係「Predator」嘅Fans,抱住一看無妨嘅心態,呢部電影仍然可以為你提供100分鐘嘅娛樂。但係作為一個由細個響「明珠930」睇《鐵血戰士1》,到大個收集不同版本嘅「鐵血戰士」電影影碟、「Predator」玩具嘅老戰友,對於而家呢種消費多於延續嘅franchise電影,實在難以衷心滿意。不過人係犯賤嘅,影迷更係賤中之賤;下次再有「鐵血戰士」電影門世,小弟恐怕仍會乖乖入場。特別係呢部戲嘅Ending,美軍發現「Predator」逃兵送俾人類嘅最終兵器……你點會估到下一集嘅走向竟然係……《強殖裝甲》(Guyver)? 睇到呢幕,小弟響個心度,真咗叫咗出嚟。所以下一集面世,都係無可避免要再做老襯。

香港電影吹水王
https://www.facebook.com/confessionmoviejunkiehk/

國際電影吹水王
https://www.facebook.com/confessionmoviejunkieinter/

吹水王‧泰利
https://www.facebook.com/terryboilwaterkinghk/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→