《葉問外傳: 張天志》

香港電影吹水王 於 06/01/2019 發表 收藏文章
文 : 吹水王‧泰利

《葉問外傳: 張天志》係由《葉問3》衍生出嚟嘅外傳故事,講述詠春高手張天志 (張晉) 自敗於葉問手下,從此封刀歸隱,同兒子過大隱隱於市嘅生活,從此詠春宗師變成士多佬。某次抱打不平,張天志結識咗酒吧街街霸兄妹趙金虎、趙明茱(釋彥能、柳岩),亦因而與長樂幫惡少曹世傑(鄭嘉穎)結怨。仇家臨門,令張天志避無可避.....

《張天志》故事毫不新鮮,係嗰種睇到分場已經知道大綱、睇到呢場已經估到下一場嘅公式電影,而八爺響主要戲劇上嘅處理手法,亦傾向好電視劇化,唔係無設計,但絕對「耳熟能詳」,總之就係最直接最易入口,演員有咁面譜就咁面譜,分鏡頭好聽叫做古典,唔好聽就係順手拈來,甚至有點.....TVB。但係《張天志》勝在舊而不「膠」,起碼整部戲例牌之餘分場尚算實在,一場接一場,叙事同描寫人物嘅意圖亦很清晰,只係畫面上每一種元素你都肯定睇過而已。追求新穎奇特?恐怕你入錯影院啦。

所以坦白講,小弟完全預計唔到《葉問外傳: 張天志》會有咁多好評,以及過千萬嘅票房,甚至登上香港年度十大賣座華語片票房榜嘅尾班車(雖然響非華語電影十大票房榜,最末席嗰部《與神同行: 終極審判 》係收四千八百萬....)。唔係小弟睇死袁和平(八爺),小弟甚至非常尊敬八爺,一直認為佢係電影歷史上最好嘅動作導演之一,但係縱橫影壇五十年嘅八爺,無論設計動作以及執導嘅風格,大家都了然於胸。佢老派,雖然老派好多時唔係壞事,但係老派嘅另一面,總有點因循守舊。睇得八爺嘅電影,尤其係唔止做動作導演嘅導演作品,總要有所調整。而令小弟奇怪嘅係,《張天志》由分場到演員演釋,以至國仇家恨式、逢西人其心必誅嘅角色設計.....呢種老派嘅一板一眼,甚至好「上一代人」嘅思維方式,到現今仍然得到觀眾青睞。因為響小弟嘅眼中,香港嘅觀眾係好鍾意創新嘅、好唔鍾意例牌嘢嘅,問十個香港觀眾,個個都識咁講,但似乎到真係觀影時,又係另一回事。小弟的確不下一篇睇過唔少對《張天志》嘅好評,如果佢地唔係對八爺有超越電影質素嘅尊敬,或者可能佢地係同八爺一樣,都係「上一代人」,所以零舍同聲同氣。而事實係,每當《張天志》上演起文戲時,小弟除咗睇錶外,亦不住希望下一場動作場面快D出現.....

不過其實如果你地當呢部係一部2018年製作嘅邵氏電影,觀感又會Fit哂。事實上柳岩飾演嘅茱姐為姊妹周秀娜出頭,一言不發就大打出手,舉手投足都頗有當年邵氏「沙膽英」(陳萍主演)嘅風采。佢大佬趙金虎,就似「沙膽英」嘅義兄「大哥成」,不過一個開酒吧一個開茶樓,而前者多咗D小男人氣質同孩子氣而已。至於張天志本尊,就係姜大衛式嘅英雄好漢,平時沉默寡言,但打起架時往往最拼命,亦願意為信義同朋友而冒險。橫掂功夫電影呢家嘢,本來就係上一代嘅電影產物。

再重申一次,老派有時並非壞事。尤其係八爺硬橋硬馬真功夫嘅百年老店金漆招牌,小弟覺得絕對需要原汁原味地保留。佢老人家幫徐克執導嘅新版《奇門遁甲》,嗰種飛來飛去嘅動畫風格,根本唔係八爺嘅專長。反而今次《張天志》嘅動作設計,就真係有返多少八爺全盛時期嘅水準。雖然招式設計上,八爺及袁家班已經過咗最花俏嘅年代,但係響畫面呈現出嘅力度,以及打鬥設計暴烈程度,仍然係第一流水準。而且今次《張天志》無咗《葉問》詠春嘅包袱,可以充分以雜家武術作設計,由前作強調國術味,變成城市搏鬥,張天志攞支水喉通亦可同黑幫大姐大曹雁君(楊紫瓊)打一大餐,拳、踭、膝、摔撻,任何派別嘅拳腳招式都幾乎自由挪用,只求打得有咁燦爛得咁燦爛。呢種不問規條只求效果嘅雜家精神,先係真正嘅港產片精神。

電影宣傳上幾場重要嘅動作場面,都各具特式。小弟睇得最爽嘅一場,係傑少同馬鯨笙(譚耀文)帶隊火燒張天志嘅士多,逃亡之際張天志將兒子交俾響街上偶遇嘅茱姐,然後同刀手由街道打上霓虹招牌,打完又要被前老闆元華嘅頭馬Tony Jaa挑戰,兩大高手變街頭霸王打鑊金。好多觀眾突然響呢一刻好理性,指Tony Jaa挑戰張天志一幕有點不明所以,其實兩個高手都咁好打,有咩理由唔一戰? 如果有人搵兩個功夫高手嚟拍戲,連玩吓都唔打返場,嗰個人就真係唔識拍戲啦!武人世界一山不能藏二虎,因此趙金虎同張天志咁老友鬼鬼,都要響天台較量一場。表面上看似荒謬,其實合理之極,因為呢個係武人嘅世界,江湖中人就係用功夫嚟交流較量,就係所謂「不打不相識」。另外曹雁君初會張天志,明知對方係高手,當然亦唔會只係請你飲酒咁簡單,因此先有推杯文鬥、「要摸吓你個底」嘅場面。功夫電影,所有招式,其實都係代表緊一種交流。觀眾唔理解、認為戇居,係佢地過於信奉「精人出口 笨人出手」嘅「至理明言」,認為出手嘅都係蠢材? 定係慣咗「卒」手機,已變得不再識人與人之間嘅溝通? 我欣賞八爺嘅老派,就係佢電影總有呢種江湖武人嘅思維方式,江湖有江湖嘅規矩,武人亦有武人嘅行當、原則同堅持。

踏入二千年後,八爺主要都係擔任動作導演為主,親力執導嘅作品,只有《蘇乞兒》《臥虎藏龍2:青冥寶劍》《奇門遁甲》以及《張天志》四片。而《蘇乞兒》劇本竟然安排蘇乞兒疑似患上思覺失調,搞出周杰倫客串「武神」等匪夷所思嘅劇情,以及《奇門遁甲》全盤徐克式嘅連環圖風格,都不能充份代表到八爺嘅風格。而《張天志》同《臥虎藏龍2:青冥寶劍》,則係呢段時間中最接近八爺風格嘅電影作品。八爺嘅電影,特別著重師徒、父子嘅感情,例如《少年黃飛鴻之鐵馬騮》中鐵馬騮與小蘭姑娘、黃飛鴻與黃麒英之間,就係充斥住師徒、父子間嘅感情,連功夫喜劇《笑太極》,袁信義飾演嘅啞巴殺手,本身都係一名慈父,會用橋手打斷木頭,製作木馬給小兒子玩。故此《張天志》中亦有張天志同兒子相依為命嘅劇情,同樣都係慈父因打鬥而錯過同兒子做生日嘅遺憾、為兒子送上玩具、兒子為父親被辱而同惡霸肥仔大打出手等劇情,如上文所言,場口編寫想像力著實欠奉,但都總算符合八爺對於感情表達嘅堅持。甚至本片對於西方人嘅面譜式描述(《蘇乞兒》都有類似場面) ,其實都係出於多年來功夫電影嘅套板描述,只係原來某國觀眾特別熱衷民族主義,又不妨取出新瓶加舊酒而已。

小弟對於《張天志》,談不上推薦,但更做不出去抨擊。八爺著實交足功課,亦僅此而已。大家期望會睇到咩新嘢? 連功夫片呢種類型都屬於係上幾代嘅電影產物,八爺人在高峰,更不需要再不斷創新突破去證明自己了。百年老店賣嘅就係古早風味,要食創新Fusion,又何不繞道而行? 老餅家做到食餅有餅味,老饕也於願足矣。


香港電影吹水王
https://www.facebook.com/confessionmoviejunkiehk/

國際電影吹水王
https://www.facebook.com/confessionmoviejunkieinter/

吹水王‧泰利
https://www.facebook.com/terryboilwaterkinghk/
標籤: 張晉  楊紫瓊  袁和平  葉問  

留言


請按此登錄後留言。未成為會員? 立即註冊
    快捷鍵:←
    快捷鍵:→