略談Nicolas Cage新作 :《狂屠絕路》(Mandy)

香港電影吹水王 於 27/09/2018 發表 收藏文章
文 : 吹水王‧泰利

近日一單個人比較在意嘅影市新聞,唔係《紅海行動》代表香港角逐奧運卡最佳外語片獎,更唔係《無雙》「滿城盡帶周潤發」鋪天蓋地嘅宣傳,而係.....竟然有本地發行商購入Nicolas Cage迷幻新作《Mandy》,香港譯名都有,叫做《狂屠絕路》。

可能大家會認為,一部咁嘅「爛鬼B片」,有人發行又有乜咁值得留意? 事實上,如果各位對本片稍有認識,就會知道呢次發行,其實得來不易。

首先,唔係好睇電影嘅人都知,Nicolas Cage響呢10年,其星途只係得返4個字 :「完全唔掂」。唔止大片無佢份,連主流電影公司嘅中型製作都對佢敬而遠之,只係得返D名不經傳公司嘅蚊型製作向佢招手,利用佢剩餘嘅魅力去幫手賣埠。不妨數數佢近幾年嘅電影:《Arsenal 》?《Vengeance: A Love Story 》? 《The Humanity Bureau 》? 《Looking Glass 》? 真係聽見都無乜胃口。香港方面,雖然仍有錄影發行商將佢嘅近作,發行成影碟出售,但都只係2016年或以前嘅作品,舊年開始嘅作品,本地已經無人問津。呢方面,同佢人氣插水下滑、已被呢一代嘅年青影迷淡忘,以及其出品水準極其參差有關。

其實,久不久就有人為Cage哥抱不平,理解佢要濫拍嘅原因(其實不外乎係理財不善,支不抵債,唯有見票即收),亦希望佢可以搵到一個令佢Come Back嘅作品(但奇在佢始終唔打算回歸小營幕拍劇集)。結果等吓等吓,奇蹟終於出現。響今年1月時舉行嘅辛丹斯電影節,成本600萬美元、由Cage哥嘅《Mandy》響影展上首映,竟然意外獲得一致好評。觀眾對於影片賦有神秘主義嘅映象風格,以及Cage哥非常狂野嘅演出都讚不絕口。至到近期,影片終於響美國以Video On Demand形式發行,結果響較為廣泛嘅觀眾下,意見被分成兩派,一方面就如辛丹斯電影節嘅觀眾咁,對於影片呈現嘅神秘、迷幻同暴力色彩讚口不絕,但有另一派嘅觀眾則認為影片混亂、冗長、毫無邏輯可言。不過起碼可以肯定兩點,就係呢部係一部非常有性格、Hate It or Love It嘅奇片,亦係Nicolas Cage近年評價最好、最受人談論嘅電影作品。

咁呢部《Mandy》係講咩嘢架呢? 其實故事非常之簡單 ,故事發生於1983年,Nicolas Cage飾演嘅伐木工人 Red,同太太 Mandy (Andrea Riseborough飾),響森林中過著貧亦樂、仿如神仙美眷嘅幸福生活;點知Mandy 竟然被一個邪教教主 Jeremiah (Linus Roache飾演)相中,希望將之據為己有,於是驅使部眾,直闖Red家中,將Mandy擄走。Mandy對教主寧死不從,於是被教主活活燒死。Red生無可戀,決定化身復仇戰士,隻身向邪教報復.....

《Mandy》嘅故事的確係十分簡單,甚至簡單到只係提供一個故事框架,令劇中人去做D嘢。而編導 Panos Cosmatos 真正感興趣嘅,係去呈現影片嗰種彷如夢境/催眠般嘅迷幻氣氛,所以如觀眾非常理性地希望吸收、分析劇情,必然不為所動。影片前段夢囈(或者悶藝,視乎閣下觀點),後段映象誇飾、狂暴,猶如由一個美夢跳到一個永遠發唔完嘅惡夢。所以呢部電影,無必要理性分析,事實上分析也是徒然,不如關掉大腦用感官直接感受;如果都係唔接受,就應該及早離場。

《Mandy》係 Panos Cosmatos 嘅第二部編導長片作品,前作係7年前面世嘅《Beyond the Black Rainbow》,據講都係一部充滿神秘主義嘅電影。作為一個只拍過兩部長片嘅導演,Panos Cosmatos 響《Mandy》仍然表露著處理手法上嘅青澀與不成熟,其電影語言似乎有點跟唔上佢大膽嘅用色同充滿符號、意像嘅表達手法。但係同時,影片又處處表現出流行文化、八十年代電影、恐怖片、Cult片對影片嘅影響,用跡近Art house嘅手法去拍一部具有八十年代色彩嘅恐怖動作片,可算係一個電影狂迷寫俾Cult Film嘅一紙情書。

《Mandy》在港映期未定,希望好此道者都會多多支持。始終呢種另類電影,能夠響香港發行上映嘅機會已經買少見少。叫做入場睇吓Cage哥爆Seed也好,聽吓大師級配樂家Jóhann Jóhannsson為本片創作嘅迷幻鬼魅配樂也好(本片亦係Jóhann嘅遺作之一),總好過永遠入戲院就只有一式一樣嘅荷里活大片。電影嘅世界,本來係可以好大。

香港電影吹水王
https://www.facebook.com/confessionmoviejunkiehk/

國際電影吹水王
https://www.facebook.com/confessionmoviejunkieinter/

吹水王‧泰利
https://www.facebook.com/terryboilwaterkinghk/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→