《歐洲攻略》

香港電影吹水王 於 13/11/2018 發表 收藏文章
文 : 吹水王‧泰利

要評論《歐洲攻略》呢部電影,真係千頭萬緒不知從何說起。如果直接話佢「爛」,咁樣太唔似一個評論人應該講出口嘅嘢。呢部戲其實代表咗一班電影人、一個電影時代嘅終結,更加代表咗香港人對中國嘅錯誤臆想,製作出連中國人都嗤之以鼻。

《歐洲攻略》美其名係「攻略」系列,其實同前作毫無關係。梁朝偉飾演嘅角色,唔係前兩集「攻略」出現過嘅林貴仁,而係一個借屍還魂嘅新人物林在風 (估計應該係人物版權上無法同前作片主達成協議)。不過林在風同林貴仁一樣,都係一個玩世不恭、身手了得嘅貴公子形人物;其實梁朝偉點演都係梁朝偉,尤其係響呢種不含真心、純粹見票即收嘅搵食作入面。

其實所謂「攻略」系列,由第一集(東京攻略)開始已經係賀歲片格局,成班明星出埠打打鬧鬧,有喜劇有愛情有動作,一派賀歲片嘅大包圍格局,呢種一貫嘅港片炒雜錦方式,其實無所謂片集風格。拍到第二集《韓城攻略》,響製作同明星陣容已經輸一截,以為呢個系列會從此玩完,點知馬楚成導演響「鴛鴦六七四」嘅情況下,仍然要再開呢部《歐洲攻略》;勉強請到偉仔掛帥,但係影片水準同觀眾接受程度可謂相差甚遠。
一般嚟講,小弟做評論總有一段會介紹吓電影故事,但係對著《歐洲攻略》呢部戲,睇怕可以慳返。同樣嘅情況,係王晶嘅《賭城風雲》系列,就係由頭到尾堆砌各式各樣嘅橋段、背景、引子、角色,但到最後卻係任何一樣都講唔通、或完全無打算講通。於是全片就係一場又一場畫面極其眩目嘅場面,但係中間嘅過渡連接完全毫不重要,無鋪排、無發展、無承接。只係將一班明星放入唔同場景,遇到敵人?打! 遇到追捕? 走! 到影片大約75分鐘左右,打Ending! 但事實係,呢種看似荒謬嘅拼貼湊合式電影作法,卻係一直由香港電影人發揚光大!

只係時代變了。當環球大部份電影嘅表現方式,都隨著電影觀眾口味而改變時。馬楚成以至《歐洲攻略》所呈現嘅過時港式風味,更見不合時宜。觀看《歐洲攻略》時,小弟的確有著觀看王晶《賭城風雲》嘅類似感受 : 同樣都係自以為有神級明星掛帥(周潤發 -> 梁朝偉),重本投資、大量出埠外景、堆砌到飛起嘅情節以及為求效果不惜放棄常理嘅情節、對白安排.....甚至係對現代科技發展嘅嚴重唔認識、對傳統冷兵器時代嘅迷戀(無論係復古嘅拳腳動作設計,以至「人對人式」非常老土嘅探案邏輯)。我地對呢種電影唔再睇得上眼嘅原因,係因為佢地已經追唔上時代;呢班電影人對佢地編寫出嘅「納米科技」/「3D打印」/「黑客」,其實本質上毫無認識,只係用來「擺門」;什麼「上帝之手」,到影片結束都說不出一個所以然來。呢班上一代嘅電影人,心底裡佢地仍然相信「舊時嗰套」;以為當年令佢地成功嘅,今日仍可縱橫天下。又話說回來,這又何嘗不是一場「年輕人」與「老屎忽」嘅世代之爭? 只係今次嘅話語權,放咗響選擇唔賣帳嘅年輕觀眾身上。

像小弟呢種不再年輕嘅「半老屎忽」,既明白年輕一代唔賣帳嘅原因,亦可以響呢D「懷舊片」搵到趣味。《歐洲攻略》其中一樣抵死之處,係佢同《一代宗師》千絲萬縷嘅關聯。例如《一代宗師》出現過嘅人物,葉問(梁朝偉)固然穿起意大利時裝扮起遊俠,連「鐵鞋七」(前MMA拳王 Cung Le)、金樓高手「鐵橋勇」(劉家勇)、三姐(周小飛)、踢館南派師父(羅莽)等,都悉數登場。如此說來,片中高手雲集嘅「百應堂」,其實亦係「金樓」嘅化身。再睇返影片資料,原來呢部《歐洲攻略》竟係「澤東」製作,當堂令小弟諗起當年《東邪西毒》同《東成西就》之間嘅笑話。

至於演員方面,梁朝偉的確起著「單天保至尊」嘅功用,佢仍然係一貫笑騎騎、但求收足片酬嘅輕鬆演法;不過如果你能好似似佢咁「瞇埋眼」都演得好過哂同片所有演員的話,大概你會比偉仔更求其、隨意。其實偉仔呢種演法,不講求準確、只憑現場環境氣氛和對手表現作出反應,頗有大智若愚、難得糊塗嘅味道。其實呢種電影亦無必要認真對待,係咪? 反之同偉仔最多對手戲嘅唐嫣,卻完全適應唔到呢種嬉戲式嘅表演方式;任佢如何一臉正經嚴謹,既表現唔到角色對偉仔嘅又愛又恨,亦接唔到偉仔嗰種即興嘅表演方式。當滕麗名嘅粵語配音竟能為角色扳回一點個性時,可想而知演出嗰位係何等不濟。名模杜鵑繼續表情演技兩欠奉,劇組仲要安排佢個角色識講流利意大利語.....但全部只係配音,又係笑料化。很多觀眾針對吳亦凡嘅演技,其實不同年代都流行呢種叛逆小子,九十年代係郭富城,二千年係謝霆鋒,換上而家嘅係吳亦凡而已。而呢種商業片種,亦唔會要求呢種小子有何演技(佢本來就唔係演員,何來演技?),但求佢衣著光鮮、外貌有型、身手有點敏捷就收貨架啦。而佢響呢部戲嘅造型,亦起碼好過佢最近嗰個驚嚇嘅紅衣牛郎造型,而且本片嘅粵語配音係由佢本人親自操刀(佢係廣東人大家知道嗎?),算係有誠意啦。

《歐洲攻略》與其話係「攻略」系列第三集,不如話係偉仔一部舊作《千王1991》嘅2018年版。事關銀幕上嘅奪寶冒險其實係千局一場,而銀幕下就係電影人「搭雞棚」去千觀眾一鑊。與其指責某個市場令馬楚成同王晶一同成為老千,倒不如思考一下,佢地呢班某一個階層嘅香港電影人,會否響某方面上,其實都係同一類人?

香港電影吹水王
https://www.facebook.com/confessionmoviejunkiehk/

國際電影吹水王
https://www.facebook.com/confessionmoviejunkieinter/

吹水王‧泰利
https://www.facebook.com/terryboilwaterkinghk/

如果喜歡我們的文章,請即分享到︰

標籤: 梁朝偉  唐嫣  杜鵑  吳亦凡  馬楚成  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→