《惡獸》

文 : 吹水王‧泰利

小弟唔多睇韓片，因為.....成日睇完都失望。我經常強調，近代韓國導演中，從來只追捧奉俊昊一人(對唔住咩金基德、朴贊郁都無份)，近年可能多一個羅宏鎮(《黃海》《哭聲》)。至於韓國電影，偶然會有一兩部喜愛，但大多數都係過目成忘。小弟一直認為，韓國電影響攝製技術上已經無容置疑，但係對劇本嘅深層意義往往過度表面，令韓片於我，常有「食之無味棄之可惜」之意。

好似呢部《惡獸》，自栩為首部韓國古裝宮幃怪獸大片。但係竟然連攝製嘅專業程度都未如理想，電影語言粗疏僅得電視肥皂劇水準，氣氛欠奉之餘，逢基本叙事都相當業餘 (好似片尾前導演仍不厭其煩解釋男主角點樣響ending大爆炸中,炸死怪獸而又可以全身而退，真係唐三藏都無咁「噚」)；最攞命係片中怪獸「物怪」嘅特技設計，以及其餘CG效果都卡通味十足實感欠奉。連「物怪」嘅部份設定，竟然照抄張藝部《長城》嘅「饕餮」。如此說來，雖然《長城》亦係一部令人失笑嘅電影，但論娛樂性，仍然猶勝《惡獸》相差十萬八千里之遠。
其實《惡獸》亦非完全一無是處。起碼編導其實係想借題發揮，明拍怪獸其實暗坎係想講朝廷權鬥。故事被安排於古代韓國燕山君被廢後，中宗即位，但大權旁落於權臣手上。所謂「物怪」作祟，只係權臣以怪力亂神之說，掩飾民間瘟疫以及削弱皇權。點知啱啱遇著剛剛，連番殺戳加上瘟疫橫行，真係引出隱於山林嘅怪獸出山直取皇城。大概大韓民國群眾，呢幾年都對「權臣誤國」身同感受，於是借古諷今。但事實係影片頭半場，就係全力於展示宮廷鬥爭以及主角組隊打怪，但係兩者都拍唔好睇。直至「物怪」出場，先至令小弟搵返多少觀看類型片嘅純粹娛樂.....不過當時已經時維影片嘅一半，為時太晚。真正令小弟留意印象者，係本片其中一個賣點、擔正女主角李惠利(總覺得佢個英文名係Ive.....)，竟然同台灣女星宋芸樺外型有八成相似.....僅此而已。
無獨有偶，即將上映嘅另一部韓國電影《屍殺帝國》，同樣都係講述古代權臣誤國，太子出手勤王，故事架構同《惡獸》有一半相似，不過將怪獸換成喪屍而已。睇嚟政制上嘅黑暗，為韓國人帶來唔少慘痛回憶同創作靈感，但係借古諷今也不能當飯食；吸引觀眾，還是要靠電影本身質素。

香港電影吹水王
https://www.facebook.com/confessionmoviejunkiehk/

國際電影吹水王
https://www.facebook.com/confessionmoviejunkieinter/

吹水王‧泰利
https://www.facebook.com/terryboilwaterkinghk/