《影》(含劇透內容)

香港電影吹水王 於 18/01/2019 發表 收藏文章
文 : 吹水王‧泰利

以小弟個人意見,《影》絕不好看。雖然對於張藝謀嘅「形式主義」,心中早有個底;但係小弟更奇怪係,自栩品味超然、對電影內容是否創新要求高如聖母峰嘅現代觀眾,竟然可以不斷忍受呢個所謂「中國第一導演」、不斷地販賣廉價嘅視覺奇觀,而對於其影片內容之空洞無物顧若罔聞。由《英雄》、《十面埋伏》、《滿城盡帶黃金甲》,由此至終,張藝謀嘅古裝/武俠電影,販賣嘅就係極端形式主義襯托嘅極度犬儒。去到《影》,其實賣嘅都係一樣,只係由金光璀璨變為水墨色而已。

影片改編自朱蘇進嘅原創劇本《三國·荊州》,但係由於要配合北面對電影內容嘅限制,於是三國演義都要變成架空,於是變出「荊州」變「境州」,「周瑜」變「子虞」(搞不好會變成周子瑜?)等令人啼笑皆非嘅改動。故事骨幹其實即係黑澤明嘅《影武者》。只不過黑澤明以當權者替身入饌,想寫的是以平凡人嘅人道主義目光去睇政治及戰爭;至於老謀子,嘿嘿,呢種高尚嘅主題都係聽吓就好,《影》講嘅不外係大都督子虞及其替身(鄧超分飾)嘅身份危機,誰作主誰擁有權力,平凡人點睇政治、戰爭誰又在意? 最緊要係有仇報仇之餘,仲可以向上爬享盡榮華富貴。至於片中嘅水墨色調、「東吳傘」搖風擺柳嘅動作設計等.....之唔係「形式主義」囉! 其實邊度有古人著到D色紮染咁,仲要係上朝? 咁既然每個近鏡都幾乎有把風扇吹住演員,其實導演係不斷提醒各位觀眾 : 這只是一部電影,仲要係一部廉價嘅商業電影。

所以金馬獎竟然頒「最佳導演」獎給老謀子.....敢問台灣金馬獎係要討好中國大陸到呢一個地步嗎? 撇除廉價嘅影像同內容,只談演技,鄧超演譯潛伏多時嘅大都督子虞,演法有如《魔戒》嘅「咕嚕」,嗰種面譜化,符合呢個世道對演技嘅審美嗎? 反而佢飾演深沉內歛嘅替身「境州」就出色得多。另外飾演皇上沛良嘅鄭愷,演技之浮誇,令我以為睇緊古代版「o靚坤」;飾演其皇妹嘅關曉彤,表現更係不忍卒睹;更加浪費咗如王千源嘅好演員.....咁樣為之「最佳導演」?

由《英雄》、《十面埋伏》、《滿城盡帶黃金甲》去到《影》,張藝謀對於拍攝古裝片,其實從未進步亦從未改變。《影》全片第一個(亦係最後一個鏡頭)就係導演想向大家表達嘅訊息 :

(以下含劇透)
.
.
.
.
.
子虞扮成侍衛行刺皇上成功,準備自立為王之時,此時反而被替身「境州」殺死,一報殺母之仇之餘,亦正式取代子虞身份,成為報行刺皇上之仇嘅忠臣.....此時鏡頭聚焦於子虞夫人(孫儷),佢目睹一切污穢不堪嘅官廷鬥爭、權謀、弒君等,但係當佢可以為此而呼叫之際,佢竟然猶豫起嚟.....呢種為咗榮華富貴嘅明哲保身、「必要嘅沉默」、「平庸之惡」,其實就係導演最想講嘅。所以由此至終,張藝謀嘅古裝武俠,沒有俠氣,只有犬儒。


香港電影吹水王
https://www.facebook.com/confessionmoviejunkiehk/
國際電影吹水王
https://www.facebook.com/confessionmoviejunkieinter/

吹水王‧泰利
https://www.facebook.com/terryboilwaterkinghk/
標籤: 張藝謀  鄧超  孫儷  王千源  

留言


請按此登錄後留言。未成為會員? 立即註冊
    快捷鍵:←
    快捷鍵:→