《屍殺片場》

香港電影吹水王 於 13/10/2018 發表 收藏文章
文: 吹水王‧泰利

22萬港幣可以做D乜? 響而家嘅香港,可能夠供一個車位…..嘅首期。將22萬港幣換算成日元,大概只有300萬日元;呢個數目可能夠大家食好多碗拉麵、去好多次環球片場,但係如果想用嚟改變命運,恐怕仍猶有不足…..

但係300萬日元,落響日本導演上田慎一郎手上,竟然奇蹟地拍出一部有心有力嘅黑色喜劇《屍殺片場》;一班名不見經傳嘅台前幕後,竟然因為呢部電影嘅爆紅而走出日本、甚至面向世界! 可能連製作人本身,都始料不及!

坊間宣傳《屍殺片場》,主要都係以片中嗰個37分鐘一鏡到底嘅舞台式演出為號召,其實…..呢個鏡頭雖然係全片嘅其中一個精華,足見一班手持咁少資源嘅電影人,仍然咁有魄力向難度挑戰,但係…..呢個長鏡頭只係呢部電影嘅開始! 無錯《屍殺片場》始於喪屍電影也終於電影,呢部其實係一部關於「電影」嘅電影!

其實《屍殺片場》係一部「戲中戲」電影,片中嘅喪屍情節,只係戲中人製作電影嘅一部份;37分鐘長鏡頭完結之後, 戲中戲Roller亦徐徐捲起;正當觀眾以後散場準備執嘢起身討論跟住食乜時…..《屍殺片場》嘅片名才施施然出現,影片亦只係剛剛開始!

《屍殺片場》真正嘅故事,不在《屍殺》而在《片場》。37分鐘長鏡頭或者喪屍類型,難聽D講只係呃大家入場嘅趣味元素;導演真正想講嘅,係呢班身處猶如瘋人院般嘅工作環境、仍然堅守崗位用心製作嘅影人故事。濱津隆之飾演嘅電視導演,事業高不成低不就,與太太(主濱晴美飾演)育有的女兒(真魚飾演)初長成,竟然也步老子後塵,加入影視行業起來。但係女兒不懂世故嘅性格,令佢不斷碰釘。偶然一個執導電視直播喪屍劇集嘅機會,令導演爸爸希望響女兒面前威返次。一鏡到底嘅高難度設計,加上天殘地缺嘅台前幕後,當然引起有如災難片般嘅雪球效應。但係響父女之間嘅通力合作,因而將一次幾乎不可能嘅一Shot落直播成功完成,過程中亦令父女之間多了份互相諒解。

其實《屍殺片場》響劇本設計上,有點同三谷幸喜嘅成名作《爆肚風雲》類似。只係《屍殺片場》響類型同表現手法嘅跨度,遠勝當年三谷幸喜嘅平鋪直敍。尤其係編導先以37分鐘長鏡頭嘅戲中戲宴客,再回溯製作人嘅籌備同實行,再引證直播途中如何「爆鑊」又如何「補鑊」。充份地描述影視行業中嘅光怪陸離同荒謬感。正如喪屍再恐怖,都遠不及一個飲醉酒幾乎失場、或直播時臨場屎急嘅演員恐怖!

本片無論戲內戲外,都充滿著一種小本經營嘅粗糙感。但係呢種粗糙,無損觀眾對呢部戲嘅觀感;甚至因此更能體現出日本影人全力以赴嘅職人精神。尤其係當直播節目不斷橫生枝節,台前幕後不斷鼓其餘勇去補鑊,令人感受到日本人嗰種唔衰得嘅精神。另外本片對於世代之爭亦有一定嘅描述,而且勝在公道。片中不論老嫩,各自都有是有不是,如老戲骨飲酒累事、中年光頭佬只關注自己嘅演員權益;年青偶像見高拜見低踩,或者呢樣又唔得嗰樣公司又唔俾…..但另一方面,男主角導演為保住直播不惜粉墨登場,連退隱多時嘅女優老婆都出埋鏡(甚至成為全片最耀眼嘅一位演員!),熱血女助攝跟場絕不欺場,只求得到一次掌鏡嘅機會,甚至不懂世故嘅導演女兒,亦係用心做事,響一片紛亂之中終於獨挑大樑穩住軍心…..編導對於老、嫩世代沒有偏坦於任何一方,唯一就係反對求其是但唔專業,認為就算製作喪屍劇呢D無聊節目,亦要全力以赴做出水準。最後眾人眾志成城,只為完成最後一個鏡頭。呢種只問耕耘不問收獲嘅情操,大概只有日本人先可以拍得既有愛又唔戇居。

《屍殺片場》絕大部份演員,都係名不見經傳,但係演出水準絕不亞於紅星。例如片中飾演導演阿太嘅主濱晴美,響戲中飾演退隱多時嘅前女優賢妻,響戲中戲就由傻大姐化妝師漸漸過渡成血腥殺人狂,演技流走於不同狀態游刃有餘;呢位鈴木京香加安藤櫻嘅混合體,希望佢憑本片可以得到更多注目、接演更多好角色。而飾演導演嘅濱津隆之,亦能演譯出現實生活中嘅揸頸就命,同戲中戲內為求效果不擇手段嘅瘋狂,演出闊度甚大。

《屍殺片場》唔係一部完全關於喪屍嘅電影,反而更係一部關於「電影」嘅電影。編導以本片表達出對於影視製作嘅熱愛,即使過程中出現幾多荒謬,那怕只係完成一部別人眼中嘅爛片;只要盡過全力,也已無愧於心。

如果你想親眼目擊呢個37分鐘一鏡到底嘅喪屍劇,你固然要睇《屍殺片場》;如果你只係單純地愛電影,你就更加需要睇《屍殺片場》呢部戲!


香港電影吹水王
https://www.facebook.com/confessionmoviejunkiehk/

國際電影吹水王
https://www.facebook.com/confessionmoviejunkieinter/

吹水王‧泰利
https://www.facebook.com/terryboilwaterkinghk/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→