《婚禮進行識》(Destination Wedding)

香港電影吹水王 於 22/10/2018 發表 收藏文章
文:吹水王‧泰利

《婚禮進行識》起用Keanu Reeves 同Winona Ryder呢兩個廿幾年前嘅金童玉女 – 而家已經變成人到中年而且各有故事嘅中坑同師奶,去演譯呢個被譽為係失敗中年版嘅《Before Sunrise》, 係幾有頭腦嘅。因為呢種由頭到尾都係靠雋永對白撐足全場嘅知識份子式喜劇,如果無返個星級演員頂住,睇怕都好難有捧場客;而事實係呢部戲即使搵咗兩大昔日偶像演出,效果都係一半半,未竟全功。

《婚禮進行識》其實係一部舞台劇式嘅電影,由頭到尾就係男女主角響不同場景對話,由鬥氣冤家變成相濡以沫,再逾越內心對愛情嘅唔信任,最終成為一對。呢種劇情可謂司空見慣,毫無懸念;但趣味就係在於透過劇中人嘅對話,去呈現現代人對人際關係、愛情嘅疑惑,響情感嘅理性同非理性之間猶疑嘅荒謬感。我地大概會為片中Keanu Reeves飾演嘅Frank凡事都可以站在超然角度理性分析而嘖嘖稱奇,亦會為Winona Ryder飾演嘅Lindsay嘅神經質大感「親切」,但無可否認,呢兩種非典型人格,都係現代城市人性格嘅部份縮影。

除咗《Before Sunrise》外, 《婚禮進行識》亦會令觀眾回憶起Woody Allen(唔係旺角活地阿倫!)嘅知識份子喜劇, 片中Keanu Reeves就如其他Woody Allen電影角色一樣,愛拋書包之餘又愛自我分析,不過響編導眼中,呢種乜都可以分析一大餐嘅八股佬,只係中坑煩膠一名。而Winona Ryder嘅角色亦有知識份子喜劇中女角嘅特質 : 神經質、脆弱、寂寞,但同時又非常串咀。而Winona Ryder演來又係得心應手,不單將Lindsay呢個中女演得八婆得來又不失可愛,更再一次將其「顏藝」展露於人前。當Keanu Reeves永遠面部都係鐵板一塊時, Winona Ryder嗰D濃烈嘅面部反應,又係會令人想多看幾眼 (雖然因此亦令佢面上嘅表情紋更為明顯)。而Keanu Reeves雖然仍然係一貫木口木面嘅呢喃演法,但佢響片中嘅木訥,同物外超然嘅人生態度,又頗同佢個人形象入型入格。(雖然聽佢講咁多對白,連觀眾都戥佢辛苦)

本片嘅Victor Levin,之前主要以製作、編寫電視劇集為主;今次處理本片嘅風格非常之舞台劇化 : 全片各個場口幾乎都以中遠鏡 / 長鏡頭式拍攝,任由演員響畫面中發揮,而且全片除男女主角外全部都係佈景板,由頭到尾集中到一個非常純粹嘅地步。據說本片只用十日就完成拍攝,大概都係一種「資源收窄 形成風格」嘅取向。雖然影片出到嚟,都係一半半未竟全功;尤其係搵Keanu Reeves演喜劇,總係會同「災難」二字掛勾;但無論各位是否欣賞導演呢種表達方式,都不能抹殺編導響繼承知識份子愛情喜劇傳統之餘,又力求響小成本中異軍突出嘅苦心。起碼影片係有風格嘅,若干情節係好笑嘅 (Keanu Reeves 同Winona Ryder更破天荒合演一場「打野戰」love Scene ,而且效果絕對係意想不到地…..好笑!),而當Woody Allen因為「#metoo」而周身唔掂時,總要有人出嚟繼承佢呢種咁雋永嘅戲種……唔通真係靠旺角活地阿倫咩!


香港電影吹水王
https://www.facebook.com/confessionmoviejunkiehk/

國際電影吹水王
https://www.facebook.com/confessionmoviejunkieinter/

吹水王‧泰利
https://www.facebook.com/terryboilwaterkinghk/
標籤: Keanu Reeves  Winona Ryder  

留言


請按此登錄後留言。未成為會員? 立即註冊
    快捷鍵:←
    快捷鍵:→