《冰封俠:時空行者》

香港電影吹水王 於 03/01/2019 發表 收藏文章
文 : 吹水王‧泰利

睇完《冰封俠》續篇《冰封俠:時空行者》,竟然覺得幾年前嘅《冰封俠》第一集,實在有紋有路得多,起碼講得成一個故事 - 儘管呢個故事既非原創亦講得拙劣不堪。但《冰封俠:時空行者》嘅問題,係2018年嘅今日,竟然仲出現呢種片商為咗圈更多錢,而將一部電影嘅素材延長成兩部 (小弟當堂諗起周星馳、劉鎮偉嘅《西遊記》;另一個更極端嘅例子係陳勳奇嘅《邊城浪子》《仁者無敵》);明明只係一部戲,卻係都要東湊西合,整多幾場湊夠兩部戲。

《西遊記》都尚且可以用搞笑場口充撐場面,但《冰封俠:時空行者》竟然有更大野心,將第一集「古人超越時空來到現代」來個大反轉,講流落現代嘅古人意圖控制時空金碟,返回明朝,勾結倭寇謀朝篡位;再加上要描述前事,講述賀英(甄子丹)、元龍(任達華)等四兄弟嘅成長同恩怨,其實故事涵蓋比第一集《冰封俠》更廣。但問題係《冰封俠》改篇自當年港產片《急凍奇俠》,第一集《冰封俠》嘅故事已經覆蓋哂當年《急凍奇俠》嘅原著故事,《冰封俠:時空行者》嘅出現與其話係續集,倒不如話係衍生作品。通常,衍生作品都係響前作賣座先會出現嘅;但《冰封俠》製作人似乎過於高估影片嘅成功程度,一早「擺大個頭」,將自以為嘅「經典戲寶」有咁長撚咁長,以為可以一箭雙雕,點知兩敗俱傷。小弟留意到當年有份製作《冰封俠》嘅機構,近日經營嘅一D旗艦級影視店鋪都面臨倒閉;咁會否呢種自視過高同眼高手低,早已響其製作嘅電影中已露端倪呢?

根據本片監製及編劇文雋在其某個專欄中指出,《冰封俠:時空行者》嘅出現,係由於第一集還未拍完因為瘋狂超支,所以片方用了個一賣開二的稀釋成本方法;呢種洗更多錢去「填氹」嘅方法,大概只有一個國家的人才想得出來。而坊間對於《冰封俠:時空行者》嘅主要劣評係其叙事非常之混亂。由於本人不熟知影片製作背後嘅秘辛,無從得知係如部份製作人所言有人過於左右大局,臨場改劇本導致影片前言不對後語,抑或係製作人無法按原定計劃完成所有戲份,只能以拍下嘅場口勉強剪輯,導致叙事「一岩一忽」。

的確,《冰封俠:時空行者》予人一種尚未完成嘅感覺,應有嘅重要場口被消失 ,如賀英、元龍等人應有一場響雪地上嘅對質場面,元龍指責賀英勾結倭寇,引發動作場面導致冰封事件;但響《冰封俠:時空行者》入面,有關場面竟剪得比第一集結尾「hooker」更凌碎。但另一方面,可能係為咗滿足某部份對廉價民族主義異常有興趣嘅觀眾,影片竟然加插咗一場與主線毫無關係、講述賀英同小美 (黃聖依)響時空穿梭時,誤墮民國十六年嘅火車,更上映一場無論場面調度同動作設計都非常低水平嘅打日本人場面。至於影片安排任達華返回明朝勾結倭寇首領北條(由倉田保昭飾演,如此資深、著名嘅動作演員竟然響片頭沒有Credit),亦明顯係為咗討好某方揮之不去嘅反日情緒,不過由於歷年來香港無論影視娛樂甚至漫畫,古裝題材中嘅日本人總係容易被妖魔化,而倭寇作亂亦係華夏歷史一部份,唯有當成可以理解。

以現有場口都品評,分鏡之粗疏、演員嘅演出,以至場面嘅設計,《冰封俠:時空行者》都予人一種台前幕後都無心戀戰嘅感覺。最離譜嘅一幕,係元龍聯同杜大人,希望以皇命逼賀英交出時空金碟鎖匙;點知不得要領,於是元龍響賀英面前殺死杜大人一家,將嫁禍賀英嘅歷史重演一次;同時安排倭寇血洗桃源村,將賀英及其鄉親全部消滅.....本來一場兄弟鬩牆已經達到高潮嘅場面,竟然係以甄子丹向任達華伸出「靈犀一指」然後施施然離去告終!本片嘅監製及編劇竟係非常資深嘅編劇、文雋先生.....小弟認為如果大家對於呢種為求拖時間已完全漠視劇本邏輯嘅編寫電影方法,大家覺得無乜問題的話,小弟都無咩說話好講了。

反而全片最值得講講,係個Ending。片中賀英一生忠義,佢得悉元龍勾結日本倭寇,以圖謀朝篡位,於是唔將時空金碟鎖匙交出,但係反派後面,其實仲有宦官九千歲爺(陳觀泰),於是桃源村馴民慘被屠殺,而賀英就成為悲劇英雄。結局珍寶閣一戰,元龍打開時空金碟之間,賀英與北條墮入時空扭曲空間,賀英不敵北條,就響生死彌留之間,賀英再遇天竺神僧。神僧妙語連珠,指賀英之前選擇代表反抗嘅「右」路,結果如何顯然易見;賀英再問如果改行「左」路又會否有生機,神僧玄之又玄,叫賀英自行經歷.....呢個再遇神僧嘅ending,好明顯係以之前出現過嘅場面重新配音來「監粗」解畫,但係亦不得佩服文雋先生嘅棉裡藏針(作為監製、編劇,佢對故事走向嘅控制力,應該點都大過導演葉偉民吧,咁小弟唯有將睇到嘅嘢都入佢數好了),好地地一個穿梭時空嘅英雄故事,亦可以被佢改寫為是否應與天鬥嘅選擇問題。而片中嘅明朝背景,皇帝昏庸,權臣把持朝政或勾結外國勢力,意圖響亡國之前(元龍穿梭時空後,已知明朝即將滅亡)搵著數,如此天朝指涉什麼,請容許小弟笑而不語。其實影片講得最最最清楚嘅主題,其實係反抗天朝、反抗命運,都唔會有好結果。但係創作人亦認為做不問世事嘅馴民(桃源村)又係死路一條,咁即係點? 最後賀英選擇「左」路,重回時空扭曲空間殺敗北條,又是否代表,要行左路,就得行民族主義? 好多觀眾指呢部戲又無Ending,其實係有嘅。重點係賀英同片中好多台前幕後一樣,都已經選擇咗佢地要行嘅路,最終是否成為時空行者,誰又會在意? 尤其係當呢部戲嘅結束只係令觀眾感到釋懷.....


香港電影吹水王
https://www.facebook.com/confessionmoviejunkiehk/

國際電影吹水王
https://www.facebook.com/confessionmoviejunkieinter/

吹水王‧泰利
https://www.facebook.com/terryboilwaterkinghk/

如果喜歡我們的文章,請即分享到︰

標籤: 甄子丹  葉偉民  文雋  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→