詳細分析所謂「賭波Tips網」 小心被騙！ 精選

　
　　首先一開始筆者要強調本人不鼓勵賭博，俗語所謂小賭怡情，我諗我嘅觀念只停留喺六合彩，而我亦都極少買。或者平時有打下麻雀、賭下波、去過下賭場玩兩手嘅人都會明白所謂小賭，其實培養緊大賭嘅習慣，如果睇緊呢篇文章嘅你仲係唔信邪，我亦只能祝你好運！

　　而正在小賭嘅人佢地可以有好多種千古百趣嘅理由黎阻止你勸佢，有啲可能話只係想試下手氣(風)，有啲又同你講唔賭唔知時運高，有啲呢又話「玩吓姐，又唔喺訓身」等等，總之久而久之作為佢身邊朋友嘅你已經唔想再勸佢，我諗唔少人都有過呢種經歷或者係當時人，好吧，咁我地開始進入我地今次嘅主題，所謂「足球賭波Tips網」。


　　借住最近又被炒起嘅臉書fans page「小賭可以怡情 大賭可以變李嘉Ｘ」，其實本人好早之前就已經聽說過佢地嘅大名，冇錯，係「佢地」，近幾年喺社交網站出現嘅相關專頁有唔少，佢地聲稱能提供相對準確嘅賭波「貼士」，而代價當然係由用家付出金錢黎購買資訊。據我所知，佢地有彼此嘅客源而互不干涉，但唔代表唔會互相抹黑或合作，呢個先唔講。

　　就講命中率，貼一場唔中可以理解，貼兩場唔中係運氣差，如果佢貼十場畀你只中一場，你仲會唔會跟佢買？　學網友話齋，「真係有咁多大戶料一早做左李+成同加環遊世界啦,洗收你5000教你贏錢,唔通真係“我諗我都賺夠我都想比人賺下...醒d啦香港人"」


　　「騙徒手法曾出不窮」，全因佢地喺掛名Tips網，淨係畀Tips但唔包中，唔講虛假聲明、虛假陳述戈啲，法律上從呢點真係吹佢唔漲，正因為咁樣，一啲囂張嘅騙徒仲可能反告你誹謗，所以話，勞氣又有咩用。




　　其實心水清嘅人都知，佢地所謂嘅人氣只係自圓其說，開非常多嘅小號，自己同自己傾下偈吹下水，得閒又釣下水魚，有時我真係好衷心咁佩服佢地，哇大佬你估唔攰架？有時又怕開錯號答自己，又要24小時睇實有冇人抹黑佢地，又要擔心自己會唔會得出個咩精神分裂咁，所以話呢份工真係唔係個個人都做到。

　　再者本人亦覺得社交網站都有責任，檢舉功能嘅作用，好多網友包括受害人或本人我亦有檢舉過其中幾個專頁，除「盛Ｘ王」外，其餘好似沒有受影響一樣，成效有幾高？我相信檢舉量唔會少，但網站相關人仕有冇理解過事件我都不敢再說了。而有關專頁竟公然收購fb專頁「高登起底組」，這盎交易簡直令人乍舌，我相信佢地嘅目的何在，廣大讀者們再清楚不過。


咁岩最近又真係畀我喺其中一個page 「SA Straxxxxxx」 見到一個唔似係小號嘅女仕話想入數畀佢，我當堂感覺好不安，但又諗時也命也，我做到嘅都只係得出文幫啲仲未中伏但又差唔多中伏嘅人。假如讀者你睇到呢個post，覺得有意思就share畀朋友睇，你亦有可能拯救到仲喺邊緣徘徊緊嘅人！



關於「盛盤王」：http://tw.gigacircle.com/2096728-1
關於「小賭可以怡情 大賭可以變李嘉Ｘ」：http://tw.gigacircle.com/2096360-1
關於「專業操Ｘ技師」：http://tw.gigacircle.com/2097091-1


# 圖片來源：網路