如果連講粗口都唔識算咩大學生？

大家鐘意睇柳臣炒花生，即管寫多幾句。呢篇文都係講近日既浸大粗口事件。

好多人依然錯誤聚焦咗係「咁係咪講粗口就錯曬先。」
唔好咁幼稚，唔係講粗口錯，係你錯。唔好將犯錯推咗俾「粗口」，講到好似學術研究緊粗口本質有冇錯咁。

上一篇文＜你唔明點解講句粗口就輸曬，我唔明點解你要講粗口。＞柳臣專登用好多粗口，就係想講，粗口無錯，錯既係你。唔通柳臣用咁多粗口，大家會出黎屌鳩柳臣篇文通篇粗口，而變到無人理篇文講咩，唔會架，你睇番唔同版面既留言，無一個提到篇文既粗口。幾時講粗口，講黎做咩，係一個選擇。
你有權選擇，而你選擇咗用一個最低攻擊力既攻擊方法，反而被對方反手打到你仆街，除咗怪自己，你仲好意思出黎怪邊個？怪對手奸有意義咩？你唔怪地下太硬？

再粗俗啲，撚冇錯，錯在玩撚既你，亂咁玩係會玩撚完。邊個唔知朋友間會講粗口、私底下大家都講粗口，邊個唔知粗口冇咩大不了。
件事由 #浸大必修普通話 變成 #浸大粗口事件 係因為你犯既錯。

與其去辯護大學生講粗口是否有失身份，不如去思考下大學生同莽夫既分別，你有冇智慧，你係咪淨係識依本能講野，你係咪講野之前無諗過你既對手會點利用你？如果你淨係話我係學生我好pure好true我係雞蛋所以我講粗口你都唔應該話我蠢，咁先真係唔配係一個大學生讀咁多書既知識分子。知識分子同市井販夫既分別，唔係講唔講粗口，而係識唔識講粗口。識，係一種選擇，係一種運用，而唔係本能反應。只留於本能反應一受刺激就會爆出黎既，與畜牲既叫聲何異？