facebook page變咗課金遊戲

柳絮 於 31/10/2017 發表 收藏文章
facebook最近傳出,遲啲newsfeed會拆成兩個,一個只睇到朋友既帖同埋賣廣告既page,至於無俾錢既page,唔好意思,就只會係另一個動態先睇到。
即係無俾錢既page,本身已經少人睇到,之後可能會仲少,因為要專登去另一個動態先睇到。

咁代表咩呢?最直接就係當facebook係唯一平台既一大班作者,好快就會消失於facebook。
好多facebook作者聽到呢個消息就走出黎講,話facebook玩完,話轉去其他社交平台。
雖然柳臣都係一名網絡作者,但係柳臣並唔係咁睇。
如果分開兩個角度,我甚至覺得呢個新制度會受歡迎。

企係用戶既角度,page係佢地既社交平台,鋪天蓋地既page post從來都令佢地覺得好煩。
以香港人既性格,就算facebook唔幫佢地搞,佢地手動都block唔少。
所以分開淨係睇到朋友既post,對用戶完全無壞。

企係facebook既角度,佢就更加唔會玩完。你呢一大堆page本身就無俾錢佢,多你一個唔多,少你一個唔少,你唔係以為無咗你提供內容,facebook就會執吓話?
有幾多人開個facebook ac係為咗睇文?

網絡作者一直都無去了解過facebook既本質,facebook主要係一個社交平台、其次係一個宣傳平台(一個夠主流夠大既社交平台自然會同時係宣傳平台),但就從來都唔係投稿平台/專為文字而設既平台。
亦姐係話,網絡作者係facebook開page,facebook從來都唔認為你係提供內容,而係進行宣傳。
咁宣傳梗係要收你錢啦!
但好多網絡作者就本末倒置,當咗facebook係佢地唯一賴以生存既平台。
結果facebook一改制,呢班根本就從來都無生存能力(簡而言之,啲文搵唔到錢/無諗過搵錢)既網絡作者就一鋪清袋,facebook唔會死,但靠facebook既網絡作者一定會死得七七八八。
你寫文免費?咁你就要貼錢做宣傳。
你話你轉平台?係香港有邊個平台比facebook更主流?
你話ig?一黎ig咪又係facebook,而且ig更加唔適合寫文。
退一萬步講,就算俾你搵到一個又主流又岩寫文既社交平台,你都係要跟佢既規則玩,亦要受限於佢可以興幾耐。
最後咪又係佢要收錢你就收你錢、佢一唔興你就陪佢摺。

當然,如果你只係寫下隨筆,無認真看待過寫作,你亦不必上心。
但如果你認真看待自己既寫作,甚至自己作為作者既身份,咁今次facebook事件就係有一好機會去反省自己以後要點行落去。

如果你都想建立自己既平台,歡迎同我地聯絡:小心輕看
標籤: 貨金  作者  newsfeed  page  社交平台  

留言


請按此登錄後留言。未成為會員? 立即註冊
    快捷鍵:←
    快捷鍵:→