【教你一招破八奇】成功既道路，必然難到仆街！ 精選

今日想講一個好簡單既道理，呢個道理其實人人都明，但係人人都唔信。
就係腳踏實地去努力，一定係最容易成功既方法。
你一定會嗤之以鼻，你會笑話：「鬼唔知阿媽係女人咩？柳臣你係咪無野寫先講呢啲行貨咋！」
唔係。我地聽實聽過，但我地好多時做野，一遇到困難既時候，第一時間會諗咩？
多數都係：有咩計仔？有冇奇橋？好易就陷入咗八奇思考領域。
－－－－－等等！先停落黎click入柳臣 fb page俾個like支持下，再繼續睇落去啦－－－－－我地好少會好直接咁同自己講，卡關係因為我懶，我仲可以再努力啲。
甚至我地會覺得咁諗既人係蠢，係唔識轉彎。我地總係覺得努力唔係一個可行既方法，總係覺得一定有「聰明」既計仔可以解決件事。

例如寫文既人，成日都會諗個市場唔就囉！讀者唔識貨囉！唔識做宣傳囉！然後就去諗有咩方法令到個市場就你，令到讀者識貨，或者俾錢去賣廣告。
但我好少聽過有作者會話：「我唔成功，因為我寫野唔好睇！我每篇文都無諗點進步！」

當然人會咁諗好合理，因為一黎努力好辛苦，二黎無人會承認自己唔夠努力。所以去諗橋，認為諗一啲人地諗唔到既野，覺得咁咪可以突圍而出囉！咁咪可以成功囉！
覺得呢個先係「聰明人」既做法。但其實呢個做法好蠢。
你諗下究竟邊樣野簡單啲？去諗一啲全世界都諗唔到得你一個諗到又可以成功既奇招，定認認真真努力啲。
最緊要係邊樣野你真係做到？

如果有一條路，係比而家大部份人行緊個條路容易好多，短好多既，咁正常大家早就搵到條路，走曬去行個條啦？
無人會專登去走一條彎彎曲曲既路。而如果你條路係短啲既，理論上亦都係最容易搵到既。直路一定一眼就睇得出架，而奇橋就多數都係相反，因為你諗得計仔，就多數係曲折咗。
亦姐係話，如果你遇到困難，而你覺得有方法比努力更有用既話，咁應該冇人會選擇係個件事上努力。
呢個世界邊有咁多奇橋，如果你咁有自信自己智商高於其他人，可以諗到一條前無古人既路，你應該一早成功咗。
但如果你照下塊鏡之後，發覺自己同愛迪生個樣唔多似。你應該諗多一諗，成功既道路，必然難到仆街。如果唔會遇到困難，唔會卡關，唔會受到挫折既，咁你做個件事應該無咩價值，應該人人都可以成功，例如淥杯麵。
如果唔係，「努力」呢條咁難行既路，一定係充滿住難關，唔代表你行緊一條錯既路，好可能你遇到既難關只係要黎淘汰一啲唔願意再努力啲既人，例如你。
因為成功既道路，必然難到仆街。而腳踏實地去努力，一定係最容易成功既方法。