【人生....】大家都係打工仔

成日話職業無分高低，我就話大家都不過係打工仔。
細個既時候，總係會覺得做到消防員律師老師係威啲。
到大個少少，又會覺得自己做老闆、作家、歌手、明星同一般打工仔唔同。

好似只要做到佢地，就唔洗打工，唔洗受氣，唔洗做啲自己唔鐘意做既野。
但係做咗咁多年人之後，回頭一看先會發現呢個諗法只係一個美好既童年幻想。

興趣就係興趣，賺錢就係賺錢。無人會俾錢你做你自己鐘意做既野。人地之所以俾錢，係要你做佢鐘意睇既野。
此為之一份工。所以除非你做緊既野，同錢無關係，或者你完全唔介意搵唔到錢。
否則到頭來，無論你做咩職業，做咩崗位，你都只不過係一個「打工仔」。

做老師既，就係向俾錢你既家長「打工」。
做老細既，就係向俾錢你既市場「打工」。
做作家既，就係向俾錢你既讀者「打工」。

或者你會話，但係咁根本唔係我既原意，我做老師／老細／作家係想春風化雨／開創新河／寫自己所想。咁如果搵錢唔係你既原意，你做咩都得既。只要你唔介意無錢生活，你就可以想點都得。

打工係咩意思呢？就係做人地叫你做既事，人地俾錢你。不管你鐘意定唔鐘意。因為你係收咗錢。此為之打工。