當偷步變成贏在起跑線 精選

贏在起跑線都out啦，而家最新既講法，係要贏在射精前。
其實咁驚你既小朋友「輸」，有冇諗過唔生呢？
閣下既基因又唔係特別優秀，閣下另一半亦係一屆凡人。
你地既下一代出世會係天才，除非基因突變架姐？
既然你咁驚佢輸，咁唔想佢第時捱苦捱窮，「好似你」咁無出色，不如索性唔好生啦！

望子成龍唔出奇，但希望自己既仔兒贏在起跑線，就好差勁。
贏在起跑線就係一種赤裸裸既偷步概念，跑一百米辛苦？咁等我早Ｄ幫佢安排好，買通評判，等佢由５０米開始跑。咁咪易贏Ｄ囉。
喂喂喂，你生佢出黎，你係俾粒精／卵佢架炸！個一百米係佢既人生，你細細個就幫佢偷步，教佢偷步。到大過佢咪變到好似你咁覺得偷步無錯，偷步係岩囉！
當偷步可以叫做贏在起跑線；偷食只怕係贏在飽暖前；偷竊未嘗唔可以叫做贏在交易前呢？
懶係好心逼小朋友贏在起跑線，你自以為對佢好，結果只會令佢永遠都跑唔完一百米。
人生如果真係變態到係一條比賽既跑道，咁終點線都只係死亡。
跑快Ｄ，咪快Ｄ跑完囉，咁跑完人生路，咪快Ｄ死囉。

香港而家去到一個人人偷步，甚至已經無人覺得偷步唔岩既地步。我又贏在起跑線，佢又贏在射精前，咁你唔贏在出世前都唔得啦？唔係ＢＢ出世，係你自己出世啊！

想贏唔係問題，但其實諗深一層，你就會發現要自己既仔女贏在起跑線既家長，唔係「想贏」，只係「怕輸」。
怕輸，係好負面既。可能係怕比較，唔敢面對失敗既後果，唔想接受自己既唔完美。
而想贏，係正面既，充滿盼望既。預左過程中會面會無數既挫折同失敗。真係想贏既人，係唔怕輸既。
佢地有心理準備這一路會好艱難，會有好多人快過自己，好可能會落後。
但佢地會抱持正確既心態，直至衝線。要贏就贏在終點線。