DSE零分示範3－「傳統往往是創新的包袱」 精選

好多人都覺得創新，就要破舊。
其實只有承舊，先可以創新。
做個簡單既實驗證明比大家睇：你而家試下幻想一種全新既生物。
有咩咁難姐？龍頭，蛇尾，人身，狗腳仲唔係全新？地球上一定無啦！
龍，頭，蛇，尾，人，身，邊樣野係你「完全憑空」創新出黎？
就算係龍，都係五千前年已經存在既傳說。
將舊野改造，重造，加工，係創新既方法。
真正創新既野，係冇需要，亦冇可能脫離傳統。如果我地要完完全全從零「創新」一種生物出黎，就必需要先排除曬所有現有既一切。
佢既唔係動物，又唔係植物，咁佢係咩？要完全創新既話，最後只會變成一舊你根本無法描述既不知名物體。
你講高大，人自然有對「高大」既傳統想像，你講牛頭馬面，人亦有能力將人同牛同馬三者拼合起黎想像。
正正因為創新其實係係人既固有知識（傳統）中變奏。
但當一旦要將傳統完全拋棄，其實就等同將所有現存既規則一口氣通通打破，結果只係會令新野變得無以名狀。

新同舊係相對既概念，兩者係相互存在。你話呢隻手錶新買，係相對你買左三年個隻舊手錶而言。
所以咁睇，冇舊亦都冇新。

不思進取還不思進取，傳統還傳統。
正正因為傳統有唔完美既地方，人類先會不斷諗辦法改善佢。
先會不斷創新。
正正因為唔滿足於傳統既方法，先會有人去研究新既方法。

好多人會將傳統錯誤解讀，從而以「傳統唔一定好」做論點，推論出「傳統會係創新既包袱」呢個結論。
呢種講法最吊詭既地方係，佢將題目二元對立分割開左，傳統同創新就係好同壞既比較。
而我既睇法轉番轉：每個傳統都有佢好同壞既地方，就正如每個創新，都有好同壞既地方。傳統同創新，係唔同時間點上既同一件事。