我記得細個既時候，我地無咁討厭落雨 精選

「Ｘ，又落雨，煩到死。」
係，唔知幾時開始。落雨係一件好煩既事。

因為落雨番工，除左意味住天氣無咁熱之外。
仲代表住全身由頭濕到落腳，對襪濕到可以擰出水。
之後等車等餐死，迫入架不停加價既地鐵度，汗水同雨水混合產生怪異既氣味。
仲有大到好似尼斯湖既水氹，同瀑布一樣既斜路，總之就係各種既唔方便。

我記得細個既時候，落雨無而家咁煩。
係入學校讀書之前，一見到落雨，就好似執到寶咁，不知幾想衝出街玩。著住件超醜既雨褸，見水氹就踩，然後一定被啊媽鬧餐死。

到要番學之後，落雨就變成三種顏色，黃雨紅雨黑雨，就好似紅綠燈咁。朝早起身一見落雨，一定第一時間打開電視，見到紅色，代表可以準備打機。見到黑色，代 表番床訓教，點解？因為黑雨，父母都唔洗番，所以都係冇得玩。冇得玩既假期，唯有繼續訓啦！不過其實無論紅定黑都好，有咩開心得過，你原本要番學，結果因為落雨唔洗番？

到再大過啲，「唔洗番」好似已經冇咩值得開心。因為我一個禮拜走堂既次數，都可能多過佢一年加埋肯掛紅雨既次數。而且落雨邊度都唔想去，留係屋企又焗又悶。如果個日原先有野做仲煩，打亂曬本身既計劃。
我記得，我地細個既時候，無咁討厭落雨。以前紅雨，就好似多咗日，而家？落雨就好似少咗日。但要做既野仍然係堆積如山。

最後，
番到，番唔到？
番到，番唔到？
番到，番唔到唔係靠彩數。
訓教前應準備好；
熄埋鬧鐘實幫到；
簽定假紙就最好。