開開心心過新年

柳絮 於 18/02/2018 發表 收藏文章
今日初三赤口,大家都唔會出去拜年。柳臣又想講番我對過年既一啲個人感受。
我見好多人都唔係咁鐘意過年呢個節日,大概係覺得冇野做悶啦、拜年又麻煩啦、親戚又討厭啦。
雖然柳臣都明白點解有人會咁諗,但係我從來都冇呢啲情況。

柳臣對新年既印象,就係可以開心賭錢啦,可以係咁食開心果啦,係要早啲起身,但係都冇咩野啊。
總括黎講,柳臣一啲都唔討厭過新年。
好多人面對既情況,我都唔洗面對。

比如話最多人係新年前一定會怨定先,就係親戚既審問大會。
我從來都未遇過,好似今年咁,初一個日有六家人圍埋,成二十幾人,我諗以香港黎講都唔算少。
但係冇一個親戚會做啲好黑人憎既行為,亦冇人會問你幾時拍拖,番咩工係咪做老師,搵幾錢,讀書讀成點。
吹吓水講吓無聊野,食吓野睇吓屋企啲龜。唔該問既大家都唔會問。

第二樣最多人抱怨既,就係晨咁早起身,山長水遠去啲唔知邊個親戚既屋企拜年。
所幸,我地家族歷年都係一次過團拜,而去就一定係去輩份最大既人既屋企拜,姐係我嫲嫲。
而嫲嫲屋企同我就只係相間兩部升降機既距離,所以對我拜年算係方便。

第三樣係悶,呢樣我又有先天優勢。因為柳臣係一個好comfortable stay係「悶」呢個狀態既人。
攞本書,甚至而家好方便攞住部手機,點會悶啊。
更何況柳臣大年初一仲係度改緊文寫緊文,不知幾充實。

最後一樣就係親戚啲細路會亂搞你啲野。投訴模型、公仔、電腦各種受傷害。
柳臣本身唔好模型,佢地唯一會亂搞既就係柳臣既髮型。係,我班表妹癲咗咁攞我個頭去嘗試gel出唔同既髮型,搞到我成個撒亞人咁。

聽日初四,三日假期話咁快就過,以前中學放成個禮拜仲爽。
不過無論你鐘唔鐘意過年都好,都希望大家新一年可以開開心心。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→