辯論BB班:「慳啲啦」法則

柳絮 於 03/01/2018 發表 收藏文章
奧坎剃刀係一個邏輯法則,而我本人比較鐘意叫佢做「慳啲啦」法則,呢個法則是咁的。
如果有兩個講法,我地應該偏向取用假設或定前提較少既個個,理由係係推論既層面,假設愈少,下次成真既機會較高。
姐係你行行下街,面前見到一個「男人搶個女人手袋」,你可以提出兩個理論:
理論一:個男人係賊,佢偷野。
理論二:個袋本身係個男人既,雖然個袋係女人袋,但係有可能個個男人係乸型,個女人可能係佢女朋友,可能佢地岩岩分手,所以個女人發嬲搶咗佢個袋,個男人只係搶番自己個袋。
理論上兩個情況都有可能係真,係資訊不完全既情況下,點解我地會直觀地選擇第一個判斷?因為第一個判斷所需要既假設少好多,而愈多前設既可能性,成真既要求就愈高,姐係話如果有十次「男人搶個女人手袋」,其中九次都係理論一,所以係通常情況之下(姐係無其他額外資訊既情況下),我地應該相信「愈簡單愈有可能正確」既推論。
咁打辯論比賽既時候要點樣應用呢個法則呢?

我主要用會係反駁個D鐘意鳩up一個世界,或者針對擅長索性成個方案改鳩曬既主線上。
好多時正方一遇到唔好打既題目既時候,就會直頭重新幫個政策重建一次,咁佢梗係可以講到好完美,世界大同,因為佢搵住資料針對住反方既rebut去度佢合政策架嘛!實靚仔架!
比喻一地兩檢既正方,夠慘啦掛?我聽過唔少場都係將一兩地檢呢個概念抽空,然後重新俾一個方案佢,最後話呢個先係「一地兩檢」,一地兩檢係好架,只要中國唔乜乜乜、又解決咗法例點點點問題、然後點樣合法合情合理地本地立法,又點樣完美平衡各方利益,直頭講到解放軍入境之前要被香港入境處搜埋身咁。
咁咪好好囉?係啊!咁梗係好啦,但係唔可能架嘛!
呢個時候你就可以諗番呢個「慳啲啦」法則,同佢講「你慳啲啦!講咁多都冇用,眼前明明有個現實好多既情況,而家大家認知個個「一地兩檢」唔洗咁多改變,唔洗咁多假設,你就搬個超複雜版既方案出黎,然後話佢係真,你首先話俾我聽呢個方案點解會做到先啦!你啲假設實現唔到,再好都係廢話。」

呢個法則唔會直接用係論點度,亦都千祈唔好打打話同評判講「根據奧坎剃刀法則」,但係將呢個法則記係腦入面,隨時分析對方講既到底係屬於「情況」定係「想像」,想像係美好既,但現實係殘酷架呢!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→