罵戰這回事

柳絮 於 26/08/2017 發表 收藏文章
點解無啦啦想講罵戰呢個題目,其實係前幾日有位前輩同我分享一件事。
呢位前輩平時唔係好玩fb,所以對網絡生態都唔係好熟。
有次他咁岩係網上見到某專頁一篇文章觀點不合邏輯,忍唔住留言指出,結果便嘗到人生第一次被網民圍攻的滋味。
他道那次是秀才遇著兵,有理說不清。聽完他的說法之後,柳臣整理出兩大重點:
1)鬥人多
2)鬥時間多
總括一句,就如個位前輩最後嘆道:「網上罵戰無得贏架喎!」

柳臣聽完之後之係笑咗笑,呢位前輩平時唇槍舌劍,估唔到都會輸係網絡呢個平台之上。
柳臣玩fb多年,深明罵戰二字,不過遊戲而已。猶其是對於無身份之人,佢隨意留言,你火冒三丈,你自然「贏」不了他。
以現今年輕網絡投稿作家來說,柳臣敢自信地說,自己算是打筆戰出身的。而筆戰和網絡罵戰其實性質十分相近。所以今次便來說說罵戰這回事。

第一原則,能不罵當然不罵最好。
好似廢話,但其實呢句已經道出左罵戰/筆戰既核心:無意義。
嗌交往往唔係說服對方,而係說服第三者。係網上個個無名無姓,你留完言又唔會有人拍手掌,但反對你既人就會專登留言鬧你,咁你邊有得贏。
而你仲係人地既主場嗌交,就同你係曼聯主場喊反曼一樣。

當然,能不罵就沒罵戰了,之後既原則亦無從講起,所以先假設你真係不得不同對方罵戰,那又有咩技巧?
-----等等!先停落黎click入柳臣 fb page俾個like支持下,再繼續睇落去啦-----

第二原則,係自己主場嗌。
你要嗌交,你要知道嗌俾邊個睇。如果你係人地既專頁就咁留言,球證、旁證、足協,全部都係佢的人,點同佢打呀?
呢個就係筆戰點解比罵戰好既地方。你係自己地頭出一篇文,咁佢要黎留言鬧你,就變咗你係主佢係客。

第三原則,認真你就輸。
罵戰最忌發火,發火就會認真,認真就放唔低,就會陷入互罵既深淵。結果第三者只會見到兩個無聊人係度不斷洗版,覺得兩個都係傻仔。
要打就要令人覺得佢係癲個個,你係正常既。有幾樣野都唔應該做既,包括覆千字文啦,覆十幾個post啦都不必要。
等佢自己一個人跳獨腳舞,跳到攰你先搵佢咁多個post入面最不合理個一句,輕輕覆佢一句笑下佢就算。之後就可以unfollow咗個post佢。
由佢繼續自己跳上跳落。

第四原則,拉高黎打。
因為網上係一個鬥人多,鬥邊個得閒既世界,你自然唔可以同佢鬥浪費人生。所以好注意一係唔出手,一出手就要收佢皮。
但係你又留言,佢又留言,你同佢留言既份量其實係一樣,而你講得再有道理都無用。所以你唔可以俾佢有得再還擊既機會,一出手就要拉高黎打。
亦姐係話網上罵戰最梗要係唔好同對方有交集,愈係自說自話,對方愈無力打番轉頭。千祈唔好針住佢黎打,就好似你根本無睇到佢個留言,你只係咁岩講咗句野又咁岩俾其他人睇到兩個留言擺埋一齊既時候可以分到你講既野俾佢高一班。
但由於你無主動去鬧佢,佢自然無得還擊。

第五原則,先要有贏既定義
同事實唔同,係網上你既對手係可以死唔斷氣。
所以你唔可以同佢嗌一生一世,你係落筆之前,就要先有贏既定義。
你到底罵戰係為左咩?100個like為之贏?篇文賺到$100為之贏?
如果你將贏既定義擺係對方認輸投降道歉全世界對你鼓掌認同你尋找到真理,咁你永世無得贏。

人往往忽視咗有幾多人支持你,而永遠只會著眼於個別留言攻擊你既人。真理愈辯愈明係現實世界都做唔到啦,更何況係網上呢?
所以講番第一個原則,罵戰係無意義架,如果你唔係攞佢黎賺錢,呃like,打發時間,就大可不必。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→