當偷步變成贏在起跑線

柳絮 於 28/06/2016 發表 收藏文章
贏在起跑線都out啦,而家最新既講法,係要贏在射精前。
其實咁驚你既小朋友「輸」,有冇諗過唔生呢?
閣下既基因又唔係特別優秀,閣下另一半亦係一屆凡人。
你地既下一代出世會係天才,除非基因突變架姐?
既然你咁驚佢輸,咁唔想佢第時捱苦捱窮,「好似你」咁無出色,不如索性唔好生啦!

望子成龍唔出奇,但希望自己既仔兒贏在起跑線,就好差勁。
贏在起跑線就係一種赤裸裸既偷步概念,跑一百米辛苦?咁等我早D幫佢安排好,買通評判,等佢由50米開始跑。
咁咪易贏D囉。
喂喂喂,你生佢出黎,你係俾粒精/卵佢架炸!個一百米係佢既人生,你細細個就幫佢偷步,教佢偷步。到大過佢咪變到好似你咁覺得偷步無錯,偷步係岩囉!
當偷步可以叫做贏在起跑線;偷食只怕係贏在飽暖前;偷竊未嘗唔可以叫做贏在交易前呢?
懶係好心逼小朋友贏在起跑線,你自以為對佢好,結果只會令佢永遠都跑唔完一百米。
人生如果真係變態到係一條比賽既跑道,咁終點線都只係死亡。
跑快D,咪快D跑完囉,咁跑完人生路,咪快D死囉。

香港而家去到一個人人偷步,甚至已經無人覺得偷步唔岩既地步。
我又贏在起跑線,佢又贏在射精前,咁你唔贏在出世前都唔得啦?唔係BB出世,係你自己出世啊!
想贏唔係問題,但其實諗深一層,你就會發現要自己既仔女贏在起跑線既家長,唔係「想贏」,只係「怕輸」。
怕輸,係好負面既。可能係怕比較,唔敢面對失敗既後果,唔想接受自己既唔完美。
而想贏,係正面既,充滿盼望既。預左過程中會面會無數既挫折同失敗。真係想贏既人,係唔怕輸既。
佢地有心理準備這一路會好艱難,會有好多人快過自己,好可能會落後。
但佢地會抱持正確既心態,直至衝線。要贏就贏在終點線。

如果喜歡我們的文章,請即分享到︰

留言


請按此登錄後留言。未成為會員? 立即註冊
  • SoccerFan 於 29/06/2016 評論 NO. 1

    點解要沉淪喺贏輸嘅概念上呢?學業只不過是人生嘅一部分。電視台搞噱頭,提倡晒啲歪理。

快捷鍵:←
快捷鍵:→