柳臣啲文教壞人!

柳絮 於 29/08/2017 發表 收藏文章
柳臣啲文章下面不時都會有人留言鬧我,開頭其實都幾介意,但係睇多咗慢慢就會習慣。
諗深一層,鬧我既可能一兩個人,但支持柳臣既有幾千人,點解我地往往淨係會睇到同在意個少數。
不過今日其實係想借住呢個現象去講另一個題目。係鬧柳臣既留言入面,有種留言都幾有趣,就係話你「教壞人」。
後尾柳臣諗一諗,其實我寫文既目的,真係就係教壞人~或者應該話「教你做一個壞人」。

成日話好人難做,柳臣覺得壞人更難做。而家好多人都唔識得點去做一個壞人,是以係無論係愛情關係,朋友關係,對同事對自身對家國社會上,都只識做一個爛好人,然後受盡傷害。

教壞你唔係要你每一分每一秒都做壞人,而係你要知道你「有權揀」做好人,而唔係「必須」做好人,否則你就會被人搵老襯。

唔知大家係點分好人同壞人既呢?
柳臣覺得壞人既定義好簡單,就係對自己好啲。而好人往往都做唔到呢一點。佢地成日都對自己好差。咁當然如果你係偉人,你好偉大,你希望去幫助呢個世界不惜犧牲自己既利益,柳臣當然好敬重。
但如果你唔係,你只係凡人,你只係想自己活得開心,你係會介意自己既得益,咁你就要學做一個壞人,學識重視自己,重視自己既利益。因為呢個世界唔會再有第二個人致誠為你服務,除咗你自己,如果連你自己都唔對自己好啲,咁你仲期望邊個會對你好?

好多人會有個錯誤既觀念,做壞人就係損人利己,做好人就係winwin雙贏。但其實並唔係咁,壞人既核心係利己,如果利己必須損人(零和遊戲),咁損人只係咁岩,無辦法之下既事,你要柳臣割肉餵鷹,我好老實我做唔到。
當然你會話呢個世界有啲壞人就係鐘意損人不利己,咁個啲只係癲佬,唔係壞人。
我地簡單做一個對比就會睇到壞人同好人既分別係邊。
當個情況係可以雙贏既時候:好人選擇雙贏,壞人都可以選擇雙贏(因為不損利益)。
但當個情況係零和遊戲既時候:好人就會選擇一個利人既情況(結果導致自己受傷),而壞人就會選擇利己。
壞人既選擇係好合理,相反好人既行為係唔符合理性架。係零和遊戲之下無論如何都有一個損失者,咁代表咗無論你做好人定做壞人,都會導致一人受傷。亦即係話好人並無減少傷害,只係將傷害往自己身上攬。咁如果你心甘情願,當然無問題啦!但係好多人最後都因為自己受到既傷害而唔開心,會覺得點解大家要咁對我,點解我對佢地好,佢地對我咁差,咁就唔正常啦!
柳臣先知道原來好人唔係想做好人,佢地只係唔識做壞人。相反,壞人一定識得做好人,但好人就多數都唔識做壞人。一個識對自己好既人,先識得對人好。
所以柳臣寫文既本質,就係想教壞人。

社會學校家長自細就教你做好人,教你好多好奇怪既道理,施比受更有福啊,好人有好報啊,施恩莫望報啊,以德報怨啊!呢啲咁多既道理,柳臣都覺得好危險。
因為呢啲儒家價值觀其實唔係教你做人,而係教你做聖人。但呢個世界有幾多個聖人呢?人你都未識做,就自細學點做聖人,就好似未學行先學跑咁,梗係會仆到一身傷啦!
而且呢個社會教既儒家思想,都只係抽取咗最表面個一層,而無深入咁去了解背後既意義。就算儒家都會講「老吾老以及人之老」,你要先「老吾老」之後先係「以及人之老」。
做好人就係完全跳step,都未做到對自己好,就想對人地好,以求人地都對自己好。完全係錯曬!

如果要柳臣教一個最重要既道理俾讀者,就係先記住「我的人生比你矜貴。因為我既人生係我既,而你既人生唔係我既。」
先對自己負責任,再去諗係咪要做好人對其他人好。前者係你既責任,後者只係你既興趣。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Calvin Hung
    Calvin Hung 於 31/08/2017 評論 NO. 1

    哩個世界唔係你想就得,好多時都係被迫🤦🏼‍♂️🤦🏼‍♂️

  • 黃祖生
    黃祖生 於 31/08/2017 評論 NO. 2

    蠢人係做唔到壞人的。

  • 城城
    城城 於 31/08/2017 評論 NO. 3

    講得好

  • Terry Yan
    Terry Yan 於 01/09/2017 評論 NO. 4

    對唔住,我係差人,咁差人係好人定壞人?

  • 張生
    張生 於 01/09/2017 評論 NO. 5

    Siu Ting

  • Hanson Yeung
    Hanson Yeung 於 01/09/2017 評論 NO. 6

    壞人的藝術

  • Edison Chan
    Edison Chan 於 02/09/2017 評論 NO. 7

    Siu YeeBb

快捷鍵:←
快捷鍵:→