人地離婚,關你叉事?

柳絮 於 30/01/2018 發表 收藏文章
某香港知名漫畫家離婚,引起全城熱議,各種起底,各種婉嘆。
姑勿論我地作為外人知幾多,就算女方被指出軌屬真有其事,都只係人地既家事,當時人都尚未出聲追究啲咩,又幾時輪到我地出聲呢?
但係,每個人都落力出聲,件事一唔關我地自身事,二與社會公眾利益無關。
明明就人地離婚,關你叉事?但係我地八卦。

以前周刊新聞,明星係我地八卦既目標。但係今日個標準已經下降到每一個人身上。
無論你係邊個,無論你係有出鏡既明星,唔出樣既創作人,甚至你邊個都唔係。
我地都恨不得係你身上挖出一點半滴的八卦,去填充我地既無聊日子,滿足我地渴求獲取絲毫樂趣既慾望。
我地所有人都再無任何私隱,再無半分人權。因為係另一個人既角度,你既存在係同一條動物影片入面搞笑既貓貓狗狗冇分別。
你既私隱,只係別人既Entertainment。
而家每個人都係名人,每個人都冇私隱權,私隱權作為一種權利,自然係掌握係有權既人手上,而今時今日,所有人都有權。
每個人都係名人,唔係講緊漫畫家係明星,甚至連你同我一個nobody都係名人。如果唔係,點解你會覺得自己連對人地既家事都非要發表啲野呢?

柳臣想講既呢件事同道德完全無關,唔係話道德淪喪,唔尊重私隱之類。
熟柳臣既老讀者都知道,柳臣對於道德、正義呢啲廢話一向都唔係好看重。
柳臣想講既,係娛樂。私隱之所以會變成娛樂。
人地離婚,你要發言。係因為悶。係因為做香港人真係好撚悶。
以前我地仲有實體報既時候,仲可以劃一條模糊既界出黎,「嗱!我地就叫呢班人做明星,然後去挖佢地既八卦出黎解悶啦!」
但係明星祭獻咗十幾年,可以玩既招數香港人都睇到悶曬啦!昨日淫照先夠解悶,今日就要進化到殘廁,聽日就話要下海,咁後日呢?直播啪啪啪?
所以實體報隨住明星條水呢幾年都收曬皮咁滯,但係香港人用八卦解悶既潘朵拉盒子已經打開,再加網上咁方便,對普通人更容易入手。
於是所有人既私隱都有機會俾任何人挖出黎作為他人解悶既娛樂,而最可悲既係,你一生既私隱,可能只係換取別人幾日既娛樂。
過幾日之後,大家好快又會轉去挖其他八卦。證明件事無關正義、無關政治、無關想改變啲咩、無關抱不平。
講到尾只係打發時間。「難得」人地離婚,話知關你叉事。

呢種病態最終就會變到好似饕餮,食盡天下之後,食無可食,餓到食埋自己。再繼續落去終有一日我地會變到以出賣自己既私隱求解悶。
娛樂當然重要,但係香港人係咪已經再無能力去創造同欣賞一啲有建設性既娛樂呢?
小心輕看相信呢個香港仲可以接納到正面既娛樂,一篇唔係淨係呃你一句標題既小品文、一個唔係關你叉事既訪問、一啲唔洗出賣私隱去換既娛樂。
亦都只有咁既娛樂,先會可以歷久嘗新。現實中,我地已經製造好多即棄垃圾好唔環保,係網上面就少啲產生即用即棄既垃圾娛樂啦!
柳臣確信,無聊日子,都可以很有意思,很多趣事。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→