初來乍到

2019年九月份，因為屋企原因，人生第一次要面臨自己一個搬出去住嘅難題，因為工作關係，所以想搵一啲交通比較方便嘅地區住，咁首選一定係油尖旺啦！收入唔係好高，又想儲下錢，咁一定要住劏房啦！上網搵咗好耐，因為唔想行樓梯，終於搵到一間洋樓，大約80呎到，有獨立洗手間，睇相好似幾好咁，而且5千有找，所以即刻拍板去睇樓啦。

猶記得個經紀帶我去到一幢好舊嘅大廈，大堂門口好細而且好殘，啱啱係收工時間，勁多人排隊上樓，清一色係男性，而且仲有好多係廿零歲靚仔🤵‍♂️，我覺得好奇怪🤔，不過見咁多人，所以唔好意思問。
排隊等咗3架lift, 終於上到單位樓層，一打開個lift門， 首先見到就係一張粘係牆上A4 size 嘅通輯相😢——一個有啲猥瑣嘅中年麻甩佬俾人影咗2張唔同角度嘅相，上面寫住「食霸王餐，偷鳳姐血汗錢，認住個賤男」！我打咗個突😂😂，跟住左右一望，有好幾位男士係走廊，見到有兩個單位係打開門嘅，入面應該有幾間劏房，因為見到有入行入去，其中一間房嘅門望到正一正，只見門框嘅四邊裝晒閃燈，綠色紅色閃光燈交叉一閃一閃，門板上掛住一個「請勿打擾」嘅牌，原來呢度係一樓一，呢個都係我第一次咁近距離見到一樓一，老實講，有小小興奮，因為一直都好好奇呢個行業😂。

一層有五個單位，其中四個都係一樓一，得一個係正常劏房住戶，係lift嘅左邊最入，所以價錢先咁抵，雖然人流複雜，但係窮，又趕住搬，冇計……咁就租咗啦！開始咗我長達兩年與鳳為鄰嘅日子。