屍小姐Z-難得的港產獨立製作Cult片

電影癮 於 17/11/2016 發表 收藏文章

首先要表揚一下呢部電影的製作人Sam哥,呢個年頭去得戲院九成係睇鬼佬片或者其他國家既電影,加上香港影星買少見少又無新血,無人才無budget之下越黎越少人去拍,但係呢個苦況並未有阻止到Sam Gor對電影既熱愛,呢位戲癡近年係明知蝕硬錢既狀況下,接連自知製作左幾套電影,姑勿論質素如何,當中果份熱血簡直就係燒得死人阿!

講番電影先,故事講述Sam哥(Sam哥飾XD)曾經係一個令人聞風喪膽既江湖大人物,但已厭倦江湖事既佢決定從焦點下退下來,同紅顏知己Kiki(袁潔儀飾)經營著一間卡啦OK場所過日。有日K場黎左一枱鬼佬客,Kiki姐心腹Zoe(仙樂都飾)入去招呼完之後,身體開始不適、變異,喪屍病毒追逐戰就此開始在K場蔓延…


呢部作品中星味幾乎係零,小編係電影中叫得出名既演員大概只有喬寶寶,同前幾年同龍心一齊做左一排網紅既前o靚模仙樂都,任何人進場觀影都係不可能帶有任何期待的,本著唔太難睇就比佢過關既心態,呢套作品又唔係預期中咁差喎,雖然劇本老套、演員演技略嫌生硬,但呢套恐怖片竟然有一種莫名既親切感,尤其只係客串性質既喬寶寶大鬧南亞同鄉、同埋上一代用到爛既聖經擋致命傷橋段,雖然擺到明係夾硬嚟架啦,但係又勾起左好多唔同既回憶,完全係意料外既事!

不得不提既就係片中爆戲既袁潔儀,咁多年無見無唸過仲會見到佢出現係影視界,今次呢套出山作雖然發揮唔多,但佢每個鏡頭每個片段都睇得出佢係用心參與,成套戲除左靠Sam哥既Chok外,絕對就係靠潔儀姐黎撐場,真心要讚!

總括黎講,雖然呢套電影無預算、亦遠未能稱為專業,但不難感受到製作人憑著對電影的熱愛,感受到佢地用盡佢地所能咁去完成呢部作品,而且還能在工作人員表上就能清楚看見某幾號人物(尤其Sam哥)一人擔任數職,即使成果不如人意,但始終算是一部完整、有頭有尾的作品,這樣的獨立電影路,希望他們能繼續好好的走下去吧!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→