張繼聰與謝安琪@_@《男兒當入樽》之爭的啟示(“阿媽教落”夫婦相處之道: “小吵可怡情,大吵會傷心,唔吵點溝通,會惹天人妒?”)

光影言志辨 於 18/12/2016 發表 收藏文章
張繼聰與謝安琪呢一對歌影視三棲才子天后(仲係人前人後的模範夫婦),近日為咗一套日本漫畫《男兒當入樽》,居然隔空在Facebook互相「大力搶籃板兼要入對方樽」?
事緣係幾日之前,人夫張繼聰,喺facebook留言話為咗迎接新成員(他跟謝安琪嘅BB)來臨要準備房間。點知俾佢搵返一套對張繼聰本人嘅成長,有奠定性影響嘅《Slam Dunk》珍藏出嚟,好感動。
張繼聰facebook留言仲話:誰知有人同我爭拗咗好耐,振振有詞話係佢(Kay)買嘅....嗰一刻,我覺得佢好陌生好似一個強盜,我當年使幾多零用錢買呀大佬!?...我阿媽話要讓吓老婆....我話ok,反正我嘅即係佢嘅....點知佢話送俾人反正我唔睇........Come on ! 佢唔明白,到我哋依種年紀,入樽已經唔係用嚟睇,係用嚟供奉....男人嘅青春同熱血係唔可以俾人,Never !! o依次真係天后都冇面俾!我兜口兜面細細聲同佢講,套書我Keep硬!威呢!?」
威呢?人夫張先生你要付上代價呀?皆因你老婆有咗BB架!
張繼聰口中嘅「強盜」就係佢老婆謝安琪(Kay)!不過,天后Kay都唔示弱,仲喺個po下面留言話:「呢套入樽係我㗎!當年我細本同大本版各一套,擺喺床邊陪我好多年,咪見到入樽就以為係自己嘅,好冇呀!」
之後昨日,張繼聰出席「你我的香港」會展講座,已經收晒皮,仲話阿Kay都睇好多漫畫,記者問到套《入樽》點處置?阿聰話:「放喺呎幾嘅儲物室,好安然,我堅持係我嘅,太太嘅嘢唔好嗌嘞,真相自己知就OK,呢啲就係夫妻之道,兩夫妻唔好嗌,就算係搶劫咗,總之唔好掉,求生存啫。」
https://www.youtube.com/watch?v=4-xR-_DME8E阿聰仲話講完呢件事有好多 “麻甩男” 同佢傾屋企另一半都有呢啲小吵問題,揭示好多家庭問題咁話。(註:張先生又拖埋普天下之男人落水,結果跟佢一齊煩!)
https://www.youtube.com/watch?v=FnEaeTYBsIk一套《男兒當入樽》係男人嘅一種堅持---張繼聰Tim少上身金句依舊在!
好啦!誰都知道兩夫婦「相嗌唔好口」,何況妻子Kay又有BB,張繼聰讓一下妻子好應該!但原來,我「阿媽教落」夫婦相處之道:「小吵可怡情,大吵會傷心,唔吵點溝通,會惹天人妒?」為一套《男兒當入樽》吵鬧一下,反而是好事,當作是一種溝通,但千萬別小事化大就可以啦!
漫畫與真人之間,戲裏戲外之間,真真假假之間......
而且,夫妻溝通之道貴乎坦誠相對,小吵之後可以更添生活情趣---至少可以俾我們觀眾當「茶餘飯後」的男人共同之苦呻一呻!我阿媽仲話,兩夫妻一世流流長唔吵鬧可能仲大鑊,因為會惹人羨慕及上天妒忌---只羨爲鴛鴦不羨仙!我阿媽嘅阿爸(外祖父)就係咁事事都不跟老婆(外祖母)吵,就咁英年早逝!信不信由你?
其實,我覺得張繼聰係「關公TIM少」上咗身就真,佢套劇《幕後玩家》又玩完,佢老婆阿Kay又要等一陣先可以復出,不時向外發放兩夫婦的小道消息,至少Keep一下人氣嘛!張繼聰將「TIM少」公關技巧活學活用,果然厲害!仲識得運用埋普天之下男人嘅共同之苦---同老婆如何「入樽」之道?
不過,我始終覺得我阿媽最厲害,咁都俾佢諗到:「唔吵點溝通,會惹天人妒!」

留言


請按此登錄後留言。未成為會員? 立即註冊
    快捷鍵:←
    快捷鍵:→