【訪談趣錄-林敏驄】從「once upon」的天際,到無奈我卻「不舉」手中汽水

講樂‧過路人 於 20/05/2017 發表 收藏文章
將於六月開個人作品展既林敏驄,畀人既感覺係無厘頭得黎,又可以填到情深款款經典情歌既「鬼才」,最近睇過以下兩篇訪問,當中提及唔少歌曲創作背後既靈感,小弟覺得都幾有趣,而且同樣貫徹其無厘頭,所以就節錄部分內容同大家分享下喇!

【延伸閱讀】回看35年情與癡 林敏驄:寫唔番以前啲情歌 (蘋果日報)

<蘋果日報圖片>


*林敏驄笑言從來不寫日記,但重聽每一句歌都回想到自己何年何月何日在做甚麼,皆因他寫的都是真人真事。(唔寫日記,但將感覺寫晒落份歌詞,等歌手唱出自己既「日記」,正到呢...)

*關於《愛在深秋》的「讓我倚在深秋」,靈感來自拍拖時的舊照片:
-「個女仔唔知係倚住條電燈柱定棵樹,所以就有咗『讓我倚在深秋』呢句歌詞」(「深秋」都可以做靠倚,好難解釋到底即係點,但又好有個種意境同畫面...)

*關於《忘不了你》的最後一句歌詞:
-林敏驄想不到最後一句詞,直至有日過海乘小輪,突然想到如果那刻掉倒水裡就會死去,因此就變成了「只要我一息尚存」。(好多時候,所謂既靈感,都係來自最無厘頭既想法)

<互聯網圖片>

*除左上述兩首歌之外,小弟記得林敏驄講過,佢幫校長填既《愛的根源》,第一句歌詞「隕石旁的天際」,講到好浩瀚,好宇宙,其實靈感原來只係來自「once upon a time」... (好大的反差呢XD)

【延伸閱讀】Face to Face:歌詞無厘頭?你未夠班! (蘋果日報)
<蘋果日報圖片>


*至於搵返呢篇八年前(2009年)既報導,係因為想搵返「隕石旁的天際(once upon a time)」既出處,結果搵到呢篇,而當時既訪問對象除左林敏驄,仲有阿B鍾鎮濤;

*呢句《愛的根源》第一句歌詞,原來霑叔就唔多欣賞:「甚麼隕石旁的天際?隕石墮落就死人啦,那會有空談情。」(兩位都係填詞大師,唔同角度唔同睇法...)

*林敏驄話同阿B最老友,每首為對方填既歌詞,都有「一個女仔的影像投射其中」,例如《藍眼》裡的「撥你的圓臉」,就踢爆左對方心儀既對象;

*關於幫阿B填詞既「鬼馬三部曲」:
-阿B同林敏驄因打保齡結緣,其後創作左「鬼馬三部曲」,分別為《淚之旅》、《香腸.蚊帳.機關槍》及《非洲黑森林寫真一日遊》(淨係歌名都覺得好正XD);

-《非洲黑森林寫真一日遊》靈感來自四個大男人去布吉旅行,本來最後一句歌詞為「因我含得緊」,不過阿B覺得唔出得街,最後改成「因我用口掹」;


-《淚之旅》亦有句語帶雙關既「無奈我卻不舉手中汽水」;(其實少D文字功力,又點玩到語帶雙關呢)


*成個訪問,最好笑應該係呢個關於「火雞」既笑話:
「有次訪問憶蓮聖誕節可有吃火雞,她答不,再問她有沒有吃火牛,她居然答︰「我不吃牛。」
(想像下林敏驄講呢番說話時既tone,睇完真係笑左出黎XD)


筆者的Facebook專頁「講樂﹒過路人」,有更多廣東歌跟大家分享,希望多多支持!

https://www.facebook.com/shingster1412/

標籤: 林敏驄  

留言


請按此登錄後留言。未成為會員? 立即註冊
    快捷鍵:←
    快捷鍵:→