【情願她取笑我，愛哭的水瓶座】喜歡《水瓶座》的，是否都是水瓶座？

話說之前二月正值水瓶座期間，小弟搵黎陳曉東既《水瓶座》翻聽，聽下聽下，諗起一個幾無聊既問題。

屬於水瓶座既朋友，固然會想知道，Wyman點樣將水瓶座寫成歌詞，但點解一個唔係水瓶座既人，都會走去聽陳曉東既《水瓶座》(正如當下既小弟咁)，而且仲會聽完又聽，聽完又聽呢？


作曲：黃尚偉／填詞：黃偉文／主唱：陳曉東


可能因為你既另一半係水瓶座，可能因為你既前度係水瓶座，可能因為你有識既朋友係水瓶座，可能因為依家正值水瓶座...

＜互聯網圖片＞


然後諗下諗下，再反覆聽住首歌，雖然歌名係叫《水瓶座》，歌詞亦有呢句「情願她偷笑我　愛哭的水瓶座」，不過歌詞裡面既「暗戀」情懷，其實好多唔係水瓶座既人，都總會經歷過...

＜蘋果日報圖片＞

再然後諗起，都幾考創作者功夫既學問，就係點樣令受眾有「共鳴」。好似呢首《水瓶座》，突顯水瓶座男生既特質同時，又以此黎包裝一個老掉牙既暗戀者故事，比起全首歌齋講水瓶座點點點，更能令廣泛既聽者搵到共鳴。

諗完一大輪，又睇返Wyman同陳曉東既資料，發覺兩個其實都唔係屬於水瓶座的(作曲的黃尚偉搵唔到)，其實點解呢個組合，當初會整左首《水瓶座》既歌？唔知有無朋友知道答案呢？唔知鍾意聽《水瓶座》既朋友，大家其實又係咪屬於水瓶座既呢？


筆者的Facebook專頁「講樂﹒過路人」，有更多廣東歌跟大家分享，希望多多支持！

https://www.facebook.com/shingster1412/