【世界盃雜談】除左陳金城,巴拿馬仲有個「洪金寶」

講樂‧過路人 於 25/06/2018 發表 收藏文章
每當有巴拿馬既比賽,就會見到網上一大堆《賭神》陳金城既cap圖,講緊個句「我同巴拿馬總統都算有啲交情」既對白。

<互聯網圖片>

作為世界盃新丁既巴拿馬,第二場比賽對住英格蘭,正如賽前所料大敗一場,不過就成功攞到首個世界盃入球,全場巴拿馬球迷開心到震,直頭當贏左波咁款。

<FIFA官網圖片>

37歲老將巴萊為巴拿馬入波,固然成為國家英雄,不過換佢出黎踢既教練高美斯,其實來頭都絕對唔簡單。

呢位無論身形同輪廓,都有幾分似洪金寶既教練,今場對住英格蘭,有好幾次都被鏡頭捕捉到佢既身影。雖然身形肥大,不過又唔覺得佢屬於「霸氣型」,偶爾流露既笑容,更加同佢既身形有種反差。

<FIFA官網圖片>

半場輸緊0:5,換邊後就俾鏡頭影到佢,走去同英格蘭教頭修夫基唔知講乜;踢完場波大敗1:6,依然笑笑口行埋修夫基度,對佢「直豎拇指」,呢種「大溪地式」既快樂足球,某程度都係世界盃既吸引之處。

講返呢個「巴拿馬洪金寶」既威水史,其實佢係現時唯一一個,先後帶領過三支國家隊,由世界盃外圍賽殺到入決賽周既教練。

除左今次歷史性率領巴拿馬踢世界盃,98、02年佢都分別帶領過哥倫比亞同厄瓜多爾,晉身分組賽階段。

比較可惜既係,連同今次在內,三次帶隊都係分組賽止步。無獨有偶,之前兩次既成績,同樣取得1勝2負。今屆巴拿馬連輸兩場,最後一場對突尼西亞能否開齋呢?

值得一提既係,呢位「巴拿馬洪金寶」98年領軍哥倫比亞個陣,唯一一場既勝仗,正正來自下場既對手突尼西亞(贏1:0)。

即管睇睇高美斯帶領既巴拿馬,最後一場對住突尼西亞,會唔會複製返20年前既賽果。至於揀邊個球員入波,當然係髮型set到成個「蜘蛛頭」咁既5號托利斯,咁先夠娛樂性嘛!

<FIFA官網圖片>
標籤: 巴拿馬  陳金城  洪金寶  世界盃  
《繼續吹》某日某月 - 湯怡同大地雞同鴨講!?

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→