90後一定識玩跑online!除左結婚仲有幾樣野特別難忘

純情跟蹤狂 於 08/04/2018 發表 收藏文章
「留在彼此的身邊,牽著手再繼續飛」
「按一按F9,生命更長久」

每個90後唔會唔識得跑online,當年跑online係最hit最多人玩既online game,嗰陣大家都係咁啱返緊學,又唔想上電腦堂,多數都會喺電腦堂偷偷地玩,終於等到打鐘放學又會一支箭趕返屋企。我諗好多人一開始會玩應該都係因為男神張敬軒、女神鄧麗欣既廣告,心諗:嘩明星都玩喎,我唔玩咪好out?同埋見啲fd玩,好自然又會跟風一齊玩。


一開始set名都諗左好耐,想改個特別又好聽既名,咩歪歪、暗黑天使、牙翼、靈靈,依家講出黎都打冷震。為左有好啲既裝備,當時既我好辛苦咁儲零用錢。因為每個禮拜得五十蚊零用錢,根本唔夠課金,所以我偷偷地扣起訂餐啲錢放曬落跑online度,平時晏晝淨係食燒賣填肚(唔好學我,但真心講另一原因係活力午餐真係好難食)。

捱餓後的確係有成果,入點數之後齊曬靚裝,打扮到個人勁型,不知幾爽。最勁既公會好似係究極同無限,我就開騎團、玩到黃飛鞋,攞個銀仔攝住個跳步制,仲入左頭百名。雖然有好多點數,不過最中意都係玩四人同心,同四個fd一齊合作,一場都有成二百tr左右。



另外跑online最正係可以同人結婚,好多人夜晚會去傾場同人傾偈r fd,點知傾傾下交換埋msn,叫對方做老公老婆。有啲網民好好彩,識左個女仔唔記得密碼,之後開小號加返對方,備注寫左私聯,點知個女仔又真係add返佢,最終成為佢女朋友;有啲就好慘,結婚結到比人呃錢,現實中分左手,個女仔連ac都del埋。



以前透過呢個game識到好多朋友,依家改曬版啲野唔同曬。角色轉左另一款風格,啲人又外掛得好離譜,開跑已經去左半路甚至終點。跑online已經變得好陌生,大家純粹為玩而玩,儲裝備唔講技術,樣樣都係錢,冇同朋友以前玩嗰種feel。或者係同我地講:係時候長大喇,唔好再留戀以前。
《繼續吹》某日某月 - 湯怡同大地雞同鴨講!?

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→