岩布仙尼一句反映佢毋忘亞視!帶你數亞視永恆七大柒事

純情跟蹤狂 於 31/05/2018 發表 收藏文章
「Happy birthday to me...」相信十四年前既今日係前意大利足球員岩布仙尼喺人生裡面過得最奇怪既生日。喺2004年5月,仲掙扎生存緊既亞視,好厲害咁邀請到意大利甲組足球勁旅AC米蘭球員為台慶做嘉賓,咁啱其中一名球員岩布仙尼既生日同亞視台慶撞左,所以司儀朱慧珊唔知喺邊度忽發其想,叫岩布仙尼一齊唱生日歌。本身叫壽星唱生日歌已經奇怪,不過扮下口形都仲過到骨既,點知朱慧珊竟然遞埋個咪比岩布仙尼,姐係迫佢唱比自己聽啦,結果就出現亞視經典一幕:一臉尷尬咁唱:「Happy Birthday to me...」,成為亞視柒事之一。


日前岩布仙尼度過四十一歲生日,喺instagram同facebook page好溫馨咁post左佢同仔仔、老婆既合照,最後hashtags就打左句「#happybirthdaytome」!其他國家既人可能唔知發生咩事,身為香港人見到呢個tag簡直既激動又興奮!原來佢一直都冇忘記亞視,就算亞視已經死左,喺佢心目中亞視永恆不滅(其實係因為嗰年既回憶太痛苦先記得)。

香港網民非常抵死,見到佢自己提起都紛紛喺留言放返嗰陣既片同截圖,連AC米蘭球迷會同埋亞視本人都出黎恭喜,又話:「ATV already closed」、「有冇人提佢亞視已經收左皮?」、「happy birthday to you and ATV」、「Are you ready? three、two、one」等等,句句精彩啜核,笑到口水都流埋出黎。




其實亞視柒事點只得呢樣呢?等我地依家趁亞視開返個app又生日就賀一賀佢啦。

▼亞視喺五十六年周年台慶設計左個字樣,不過阿拉伯數目字「56」拼埋一齊就成個「死」字咁,攞景定贈慶呀?後尾亞視執行董事盛品儒梗係唔話似,仲話網民有創意


▼有次記者會盛品儒講錯左粗口,因為廣東話唔係好正,將「眾所周知」變左做「眾所鳩知」


▼有排《江南style》呢首歌好hit,投資者王征請曬班亞洲小姐、亞洲先生同自己喺政總前面跳騎馬舞助威,扭身扭勢,又大叫「香港亂局毛孟靜(立法會議員)滾出去」,如同傻人所為


▼主播報導緊廣州失戀展,突然衝口而出咁話駐廣州記者黃迪偉感受最深...之後個鏡頭帶到黃迪偉身上嗰陣,就喺呢日全香港所有人都知佢失戀呀


▼明明官方冇公布消息,亞視居然自把自為誤播國家主席江澤民逝世既報導



▼五十五周年暨香港回歸十五周年慶典晚會節目結束之前,啲歌手係咁掟壽包落台,但台下既觀眾其實勁少(由19:10開始睇)



▼搖擺天使真係經典之中既經典,佢數白攬去撐亞視,尷尬到直頭想打爆部電視:「做電視,唔容易,尤其係,做亞視,但係好在員工有情義,唔係下下講money」;「船到橋頭自然直,事事事成係有天意,好快就有白武士,白武士,做好節目搶收視。大把廣告有face」;「所以大家一齊嚟,萬眾齊心撐亞視,萬眾齊心撐亞視!」



(圖片來源;蘋果日報、https://www.instagram.com/massimoambrosini/https://www.facebook.com/ambrosiniofficial/、ATV)

留言


請按此登錄後留言。未成為會員? 立即註冊
    快捷鍵:←
    快捷鍵:→