就算比人踩到垃圾咁又點?!當年受盡負評後港姐個個返生 文字

純情跟蹤狂於 06/09/2017 發表 收藏文章
呢排雷莊兒呢個大名成日出現,自從佢拎左今年香港小姐冠軍之後,好多人都質疑佢係咪有父蔭先可以贏到。咁人地質疑又唔係完全冇道理既,雷莊兒個樣的確同大眾覺得既「靚」係有一段小距離,如果以車程黎計大概係落馬洲去到長洲啦,唔多。


其實成為人地討論或者攻擊對象係預料之內,做得港姐當然要睇樣,如果唔係唔叫選美。如果受到人地批評最好就大方面對,甚至自嘲左先,當自己都覺得自己係垃圾,咁人地就攻擊唔到自己,立於不敗之地。不過雷莊兒唔知係咪外國長大所以唔明白亞洲文化,所以一見到網民攻擊就扯火,一扯就會做出衝動既事.....就係開live鬧香港網民冇文化、冇受過教育。

當然第一下回應已經衰左,可能原本一兩個月可以淡忘既事,依家變左幾個月或更長時間,但加上雷莊兒反人身攻擊其他人,呢下就大鑊喇,之後任何有佢份出鏡既節目都會比人鬧。雷莊兒嬲係人之常情,可惜做得港姐仲要係冠軍就要有氣度同形象,依家可以話係一手摧毀左。


咁做港姐咪好辛苦?嬲都唔可以爆出黎。係架,你估咁耐以黎啲港姐係流架?睇下人地受盡批評之後點面對學野啦:

林潔瑜

2009年潔瑜因為樣貌似許愿而比人嘲笑,嗰陣受到既攻擊同雷莊兒差唔多,但係人地竟然選擇積極面對,公開多謝呢啲人,話如果冇佢地就冇佢圓夢。嘩佢咁一講,大家塊面即刻紅曬,因為當時冇人會咁主動睇網上留言,所以佢公開感謝嗰啲批評佢既網民既做法其實好親民,亦係展露自己智慧絕對能勝任港姐既好機會。


▼因為佢既回應,網上選舉即刻變人氣第一


▼近日佢甚至喺King jer度留言


黃心穎

因為個樣有幾分似跳唱組合草蜢成員蔡一智,所以成日比人惡搞,不過心穎唔多介意,反而現實中真係搵返蔡一智合照陪網民一齊玩。有傳媒搵佢訪問時佢都答:「呢個係參選港姐既必經階段,係第一個考驗黎。」


蔡思貝

蔡思貝都比人笑左好多年,笑佢同網絡紅人達哥似樣,一開始佢接受唔到,黑面咁對住鏡頭。後來佢終於領悟到喺娛樂圈生存既真締,公開笑自己同達哥係兩兄妹,加上喺《踩過界》唔再做新人既低能角色,以癲姐造型使觀眾眼前一亮。


▼癲姐


麥明詩

一開始因為讀劍橋考到10A而成為話題,但一做到港姐冠軍即刻比人批評樣唔夠靚。後來又因為Facebook講政治再服盡批評同惡言,不過佢冇發脾氣或者唔理,反而想用法律有條理地講自己既感受出黎,令人覺得佢真係有智慧既港姐。



馮盈盈

以前既造型係染左一頭Mk金既髮色,曾經上過司徒夾帶既短片,係港大女神。不過以前講粗口既事比人搵返出黎講,佢亦大方承認有呢件事,並承諾自己成為港姐後會保持港姐應有形象。近期佢言論大膽出位,反而令人欣賞佢敢言、搞笑,算係港姐裡面成功轉型既一個人。


其實講EQ高既港姐絕對唔止佢地,但好明顯反映一個事實:唔想人踩自己,必先要識冷靜而對,衝動係解決唔到問題架。好似2014年冠軍邵珮詩話齋:「呢行唔可以靠家底。」,踏實做人吧啦

(圖片來源:環球華人網)

留言

會員
我要評論
請按此登錄後留言。未成為會員? 立即註冊
  • Ranger  Au
    Ranger Au 於 06/09/2017 評論 NO. 1

    有$女一定自小比人奉承慣,冇人敢話公主醜,只會讚佢靚,咁佢就信哂,自信心爆棚,然後到大個咗就想揾個途徑靚比更多人睇,點知事與願違,大眾嘅眼光跟自己有落差,成世人從未受過如排山倒海嘅批評,一時不懂自處,而公主病發作自然就會有公主式留言,越描越黑,刁人現眼,吾不欲觀之矣!後事如何,不敢樂觀。

  • 錢朗晴
    錢朗晴 於 06/09/2017 評論 NO. 2

    陳颖诗

  • 陳颖诗
    陳颖诗 於 06/09/2017 評論 NO. 3

    錢朗晴

  • Kawai Hung
    Kawai Hung 於 06/09/2017 評論 NO. 4

    Wing Chan
    冠軍仲話:唔會曬時間翻譯中文回覆 唔識中文原來可以咁有自信

  • 梁文
    梁文 於 06/09/2017 評論 NO. 5

    D譚仔阿姐咪又係好有自信咁講充滿北方口音嘅廣東話

  • Diego Lee
    Diego Lee 於 07/09/2017 評論 NO. 6

    又話自己唔 care 人地點睇佢,又要開 live 屌人反擊,咁係 care 定唔 care?

  • Judes Li
    Judes Li 於 07/09/2017 評論 NO. 7

    馮盈盈好正

  • YongCong Liang
    YongCong Liang 於 08/09/2017 評論 NO. 8

    人品到咁 做港姐?

快捷鍵:←
快捷鍵:→