姚子羚朱晨麗索爆全場,唐詩詠最唔掂?點評馬來西亞頒獎禮女藝人裝扮(34P) 文字

純情跟蹤狂於 28/11/2017 發表 收藏文章
早喺3日之前,無線喺馬來西亞雲頂雲星劇場舉行左一年一度既《TVB馬來西亞星光薈萃頒獎典禮》,連同之前新加坡《星和無線電視頒獎典禮》被視為出年大戰前夕既前哨戰。

一如以往我又係時候點評下佢地既裝扮,不過其實今次好少女藝人去,因為只係得左獎既人先需要出席,所以我都盡量講曬呢十幾位。同埋可能因為外地冇乜人留意,女藝人都好錫身,明顯冇星和、節目巡禮、台慶咁變倒奶show。

李佳芯

今次既晚裝整體黎講不過不失,只係上半身怪怪地,冇push up效果令人覺得好扁平,突出唔到身形曲線。不過下擺幾特別,係漸變色既流蘇。


▼搵返來源原來係fashion show既作品,睇黎李佳芯都幾中意著啲model展示過既衫


田蕊妮

橙紅色西裝裡面一睇就知係真空,非常性感,雖然本身設計上同上次高ling喺節目巡禮件晚裝差唔多,但顔色上就出事。佢皮膚白,著呢隻色既衫理應冇問題,只係西裝用呢隻色既話比例上太多喇,感覺有啲老。


劉佩玥

好靚呀!白色同佢係perfect match,因為仲好後生,所以露下肉實冇死,成個女神咁樣。上次台慶著左deep V谷胸出席令人眼前一亮,今次遮住上面,露返條美腿出黎一樣咁正。


譚凱琪

黑白色穩陣配搭,成個look好好睇,冇失手,條裙亦可以突出S形身材。值得一提係之前佢都係以短髮示人,依家加返瀏海個人young左青春左,塊面都冇咁包,靚女左!


黃翠如

一睇到就覺得佢好似著緊民族服裝咁,完全出曬事。首先桃紅色既長袖裙已經好奇怪,下擺仲要好累贅,九唔搭八!如果去cosplay大賽都ok,喺呢個盛大場合著到咁唔單止唔靚,仲略嫌唔夠隆重(我講事實咋,希望唔好請我食飯盒)。


姚子羚

今次最受注目同埋最感人既環節一定係姚子羚,佢一上台就已經攬住閏蜜陳山聰喊到好激動,上到台拎「最喜愛TVB女配角」又缺堤。話自己曾經比愛犬咬到塊面毀容,被迫停工,嗰陣個人好失落,但依家有獎拎係對佢努力既肯定,仲呼籲人領養添!



▼心地好,演技好,又識露膊頭露長腿,今次最靚裝扮又要頒比表哥你喇


胡定欣

我...唔知講咩好,條裙個領口位一睇就知太大,而胡定欣唔知係咪壓力大搞到上圍縮左水,上身好似男人胸肌咁。我有理由相信個造型師係玩野,明明之前三次盛宴都冇失手,今次搞到咁樣都有既?!


張寶兒

穩陣但普通,冇野可以彈/讚。


蔡思貝

佢本身已經好瘦,再加埋短髮更加比人一種強捍既感覺,所以白色晚裝剪裁唔好睇,上身平平無奇又搞到佢冇女人味,就算露腳都補救唔到。


朱晨麗

套晚裝好靚,V領唔大係冇乜野睇,不過白色蕾絲勝在大方高貴,朱晨麗條腰又勁幼超索,加埋魚尾裙擺令人諗起婚紗。佢喺台上向緋聞男友何廣沛索吻,搞到好似佢地兩個擺酒搞婚禮咁,場面好好笑。只係我覺得個袖有啲多餘,冇左變背心仲好。



唐詩詠

件晚裝用既布料太多,好似泰山,如果要露一面膊頭建議參考姚子羚咁。好彩今次揀左藍色,如果揀紅色成個西藏僧侶...係咪即刻有畫面?仲有啲頭髮用左太多gel,搞到望上去有啲笠,似冇洗頭...


高海寧

佢真係好乖,自從出左限奶令就冇再性感示人,今次晚裝雖然冇咩睇頭,不過設計幾靚,令我諗起古裝劇既仙女或者公主,特別係透視袖好睇。唯一要彈條裙下身紅色圖案離遠睇可能會令人誤會...係M血。


以下為得獎名單:

最喜愛TVB飛躍進步女藝員:譚凱琪
最喜愛TVB飛躍進步男藝員:何廣沛
最喜愛TVB角色獎:
超時空男臣-曹永廉,蕭正楠,朱晨麗,田蕊妮
使徒行者-苗僑偉,袁偉豪,黃翠如
同盟-陳展鵬,胡定欣
不懂撒嬌的女人-宣萱,唐詩詠,黎諾懿,高海寧
踩過界-蔡思貝,王浩信,李佳芯
親親我好媽-黃智賢
最喜愛TVB綜藝節目:胡說八道真情假期
最喜愛TVB資訊節目:姊妹淘馬來西亞篇第三季
最喜愛TVB節目主持:肥媽新年新煮意-肥媽
最喜爱TVB劇集歌曲 :不懂撒嬌的女人-手中沙 菊梓喬
最喜愛TVB螢幕情侶:同盟-陳展鵬,同盟-胡定欣
最喜愛TVB女配角:姚子羚
最喜愛TVB男配角:陳山聰
最喜愛TVB女主角:宣萱
最喜愛TVB男主角:苗僑偉
最喜愛TVB電視劇集:踩過界

留言

會員
我要評論
請按此登錄後留言。未成為會員? 立即註冊
  • Cheang Hoi
    Cheang Hoi 於 28/11/2017 評論 NO. 1

    胡定欣條領口應該不是太大,是故意設計成這樣,最近流行這種領口

  • Aragorn Ho
    Aragorn Ho 於 28/11/2017 評論 NO. 2

    以Ali嘅model身形著fashion show item都幾正常嘅…果個brand係一個local designer,之前好似係馮盈盈喺節目巡禮介紹過後我有留意連續幾個大show都有唔少女藝人著。今次呢件我略嫌下半身太clumsy…而且我比較唔欣賞上下兩截色。不過,Ali著就唔太出事嘅…

    田蕊妮搞到成個希拉莉咁…

    劉佩玥係幾好~

    譚凱淇果件…幾突出到佢身形,顏色亦幾好,不過白色位唔喺頂而喺腰會唔會好少少?

    胡定欣真係果晚一睇就出事,突顯唔到佢個firm到一流嘅身形,反而睇到佢心口無嘢睇…佢著西裝款其實通殺,Ali唔小心都唔夠中性型格打扮嘅佢嚟…

    表哥果件我有少少唔知係型格路線定女人味路線,不過的確白色、簡單,加上佢嘅身形,真係唔差。

    張寶兒上身無事,下半身仲clumsy過Ali果件幾倍…

    蔡思貝果件…我唔太清楚個問題喺邊…白色太窄,好似唔可能真空…但襯入面嘅黑色又撞得唔好…好似入面嘅黑色太闊,可能襯黑bra款好少少?定係索性黑色換金色好啲?又或者底面顏色對調會唔會好睇啲?

    唐詩詠的確好似布料多咗少少,不過唔想像成紅色想像成白色又唔太出事。佢都係樣同身形搭救,整體唔至於太出事。

    高寧似擺咗兩條大金魚喺身…可能窄身少少好睇啲,宜家既唔飄逸又唔貼身…不過問題不大…

  • Dixon Chan
    Dixon Chan 於 29/11/2017 評論 NO. 3

    一月至到香港,到時仲邊個記得降魔的🤕

快捷鍵:←
快捷鍵:→