TVB經典硬膠節目【二】──《May姐有請》 文字

方丈於 11/08/2017 發表 收藏文章
第二輯主持:(左起)楊思琦、沈卓盈同馮美基(May姐)

近期播出既第二輯既《阿爺廚房》令到觀眾又學到唔少烹飪技巧,李家鼎既烹飪功夫精湛,最擅長既菜式係傳統粵菜,節目播出後獲得觀眾同網民一致好評。《阿爺廚房》係近幾年TVB播出既飲食節目中既一道清泉,因為近年係大台播出既飲食節目都係劣評如潮,雖然肥媽同蘇絲黃煮野係唔錯,但係節目成日罵助手,聽到佢地把嘈到拆天既罵人聲係人都想轉台,但講起近年來最硬膠既大台飲食節目,就一定非《May姐有請》莫屬!!!

《May姐有請》總共拍左兩輯,首輯主持人分別為資深傳媒人馮美基(May姐)同曾華倩,第一輯係2011年11月至2012年4月期間播出,頭一輯節目正正常常,係網路上冇引起d咩迴響。大台係一年後播出第二輯《May姐有請》,結果電視史上最硬膠既飲食節目就此誕生......

第二輯節目教煮餸既環節可以話係完全失控,無論係煮中菜、西餐甚至係沙律,May姐煮每道餸都例牌用雞汁做調味料(雖然係幫贊助商做product placement,但都唔洗咁hard sell掛~~),最好笑莫過於用雞煮既菜式都要落雞汁,令隻雞更有雞味,十分過癮!相比起第一輯,May姐用雞汁煮餸既次數已經達到令人髮指既程度,當年唔少觀眾都認為呢種煮餸方法同落味精冇分別,甚至覺得May姐既廚藝根本就係唔夠班先要用咁多雞汁黎調味!
May姐煮野好唔好食當然係見仁見智啦!但佢最令人覺得煩膠既地方就係佢把笑聲,基本上May姐每講幾句對白就會「哈哈哈哈...」大笑一餐,十足反射動作一樣,煩膠程度比起《大笑之歌》有過之而無不及,相信當年唔少觀眾聽到May姐把笑聲之後身體都會變硬(拳頭),即使到左四年後既今日,老衲只要望到May姐個樣腦海就會浮現出佢既笑聲,久久揮之不去。節目播出後期適逢香港電視發牌風波,而《May姐有請》就首當其衝成為劣質節目既代名詞,雖然節目成為眾矢之的,但當時節目收視曾逆市高開22點,呢個現象果然貫徹左港人邊罵邊睇既心態。
雖然節目劣評如潮,但大台製作總監余詠珊當時仲想加開新一輯《May姐有請》。不過,當時May姐仲有少少自知之明表明拒拍第三輯,第三輯《May姐有請》就因為咁胎死腹中喇!

[笑聲合輯] May姐有請 之 哈哈哈哈
唔知道笑係咪會傳染呢?老衲一聽到May姐既笑聲就會忍唔住笑埋一份~~


標籤: May姐有請  

留言

會員
我要評論
請按此登錄後留言。未成為會員? 立即註冊
  • Mars Lai
    Mars Lai 於 11/08/2017 評論 NO. 1

    係香港...大師傅嘅師傅就係“雞汁“...
    只要落啲雞汁,雪藏雞都會“鮮“到食落口會係你口入面跳舞......
    所以,有邊個做廚師而又唔識用同唔用味精嘅通知一聲...

  • Eric Li
    Eric Li 於 11/08/2017 評論 NO. 2

    洗腦式 哈哈哈哈哈。

  • Cheng Hin Sang
    Cheng Hin Sang 於 11/08/2017 評論 NO. 3

    😂

  • Christy Au
    Christy Au 於 11/08/2017 評論 NO. 4

    Vanessa Yu memories

  • Anselm Chan
    Anselm Chan 於 11/08/2017 評論 NO. 5

    TVB究竟俾左幾多錢你呢小編?

快捷鍵:←