TVB經典硬膠節目【三】──《爆足一周》 精選

大家都知道方丈為人小器又記仇，正因為咁貧僧既記性好好，記性好自然成日日「回帶」重提舊事，正所謂『Old news is so exciting!』，今日貧僧又諗返起大台一個舊節目，時間返到5年幾前既2012年10月，當年名Dj查小欣離開商台之後，就過檔到大台主持節目《爆足一周》......先睇返當年個主持陣容，前有查小欣後有莊思敏，單睇班主持已經夠曬趕客！果然，《爆》播出第一集已經劣評如潮，當時通訊事務管理局仲收到14個對節目既投訴，投訴指節目內容冇事實根據、有誤導之嫌同埋侵犯藝人私隱等。而當時唔少網民仲插爆節目舊聞當新聞，例如當年蘇永康同廖碧兒既緋聞早係10月頭見報，而查小欣到當年10月中先「回帶」討論，根本就冇料到！收視仲由平均既17點到14點，大台終於痛定思痛，將原定13集既《爆足一周》腰斬，而只係播出左四集既《爆》就成為史上最短命既節目之一......當時查小欣係最後一集上親自宣佈節目腰斬既消息，仲話:「收到好多觀眾迴響，我地會聽晒，我地係抱住一個好虛心聆聽，從善如流，同埋我地會徹底檢討。好多謝你地o既寶貴意見，我地會係節目上做一個調整，然後2013年初我地會再見。」然而，節目並冇係翌年初回歸。近幾件網絡上隔一排就會有人提及《爆足一周》幾時重播既問題，直至舊年年底都仲有網民問《爆》幾時復播，因而形成呢個奇特既「回帶」潮。至於主持人之一既查小欣不但冇得再係大台主持節目，仲有傳佢係訪問時得罪左蘇永康，真係賠了夫人又折兵呀！