【#Nj評《失眠》】-劇本設計精密具心思,重口味『假J』夠逼真!


偏鋒題材電影一向少看,要我睇《恐懼鬥室》《人形蜈蚣》之類同俾把刀我自己拮自己冇乜分別。邪典組合【黃秋生 X 邱禮濤】的《人肉叉燒包》及《伊波拉病毒》上映時年紀細又係冇睇過,可惜,呢篇文真係比較唔到三部曲中哪一部最cult最核突。 偏鋒電影經驗尚淺,好有預感會用得著傳媒優先場派發的嘔吐袋,真心。但又發現原來自己承受能力都算幾高,仲一路越睇越爽返唔到轉頭,嚇我唔到嘅。電影裡面定期出現撕面皮/開腦/斬甩頭/切J/肢解等恐怖場面,滿足到官能刺激之餘,劇情走向其實都有紋有路,唔係強行賣弄血腥核突。就好似近排最多人談論的《異形》系列,表面是驚慄太空探索,內裏卻蘊含大量哲學符號聖經含意。與其話《失眠》係一部Cult片,不如話係用Cult元素包裝處理的劇情片,故事鋪排有落心機不會令人失望。

先講最受關注嘅血腥恐怖,港產片來說真係要俾9分半。特技化妝師用最原始方法製造一大堆血淋淋內臟,尤其條假J,真係難分真與假。設計『切J』這一幕的人真係好重口味,作為一個男人,隔著螢幕都感受到嗰種劇痛。特寫怒斬幾下的一幕未算最關鍵,真正想令人作嘔係接下來處理『廢J』的方法。。。都係費事劇透無癮,等你哋自己入去好好享受。


劇情方面反而係最有驚喜,原本以為會係求其搵嘢搞串連一大堆譁眾取寵重口味情節就算,點知少少人物玩出一個集懸疑鬼怪歷史具思考價值的故事。雙線時空經問米串連,日佔時期一段反而比90年代的描寫更仔細好看。其實故事真係精心設計,講現代兩位要角患上奇怪失眠症,觀眾長不少關於睡眠的知識但又唔會覺得好突兀。大膽提出命題開展故事,假如人類不用睡眠便可令文明極速進步提升,以上從科學上著墨甚具說服力。醫學以外亦牽涉到上一代的因果作孽,配合日軍侵華涉及慰安婦議題定義壞人壞事,隨著劇情發展解開後代失眠怪症的起因謎團,觀眾容易看得入迷,期待打通兩條時間線的關係。當然,結局安排似乎有點交代不足,上代時間線完結後開始進入暴走。假如不了解傳說中的睡眠實驗,觀眾可能會對結尾一頭霧水。


最後想講下真係好欣賞電影選角,黃秋生好戲一定唔洗講,出爐影帝林家棟繼續《葉問》漢奸戲路,衛詩雅演孖女有意想不到的好表現。上文都有講,角色真係唔算多,黃秋生和衛詩雅更一人分飾兩角,難得兩位都有極具層次演出。有時真心好驚這些阿爸阿仔家姐阿妹同一人演的情況,通常戴假髮加粒墨就算,最後效果出到嚟根本分唔出兩角不同。但衛詩雅突破了這回事,即使沒有爛面鬼眼的形象化妝,都像是活生生的兩位演員。觀眾會好易理解家姐的仇恨不解及妹妹的善良無辜,當然得益於劇本塑造具體而演員亦有提供專業配合。
.
電影完結其實有大量思考餘韻,就睇你喜歡從血腥恐怖開始回味,或是當中科學理論因果報應去理解這個結構簡單但心思精密的故事。
.
80分
文:Nj
.
×多謝支持本文!你的"讚好"是我寫下去的動力,承諾為大家帶來更多電影消息影評!×
.
*讚好專頁【 電影狂人-影評情報交流平台 】緊貼最新電影資訊!***
------------------
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

標籤: 黃秋生  邱禮濤  衛詩雅  麥子樂  

留言


請按此登錄後留言。未成為會員? 立即註冊
    快捷鍵:←
    快捷鍵:→