《使徒行者》,再步TVB 劇電影版爛片後塵?

娛樂之王 於 08/01/2016 發表 收藏文章
《使徒行者》昨日(1月7日)舉行開鏡儀式,一如傳聞,今次沒有「爆seed哥」林峯,僅剩「釘姐」佘詩曼,配吳鎮宇、古天樂、張家輝,劇集監製文偉鴻今次做導演,監製由王晶和樂小姐出任。不過最重要的 Benz雄沒有現身,喂說好的歡喜哥外傳呢?
(facepop圖片)

近年TVB真係夠晒懶,就地取材添食電影版,不過多數無好下場:

《Laughing Gor 之變節》(2009)《Laughing Gor 之潛罪犯》(2011)
邱禮濤導演,梁家樹監製,食《學警狙擊》條水,但與電視版無甚重要聯繫而可獨立觀看,算係正路的出品。不過當年紅的只是 Laughing gor 梁笑棠,而非謝天華,夾硬谷上去擔正,結果拍埋黃秋生、吳鎮宇淪為炮灰,演技完全比下去,就像《梟雄》的黎耀祥。

《勁抽福祿壽》(2011)
如果覺得王祖藍、李思捷、阮兆祥三條福祿壽啲扮嘢、懶型、食字/爛gag 好正嘅,一定覺得《荃加福祿壽探案》好好笑。電影版《勁抽福祿壽》加埋曾志偉、薛凱琪,就算口味啱,但笑得出還笑得出,不代表好,因為只是一如既往由多個gag堆砌而成而故事極為薄弱。

《十月初五的月光》(2015)
MK 活地亞倫孽念深執導,將其公式放入所謂經典劇集,見/聽得最多的感想是「破壞童年回憶」。而當君好都變好姨,還扮天真叫「初哥哥」,加上莊思敏、劉浩龍那條線,確係幾趕客。睇完可能覺得《月滿抱西環》和《跑馬地的月光》好好睇。

《衝上雲霄》(2015)
電視劇版續集缺陳慧珊和馬德鐘仍然合格,今次卡士加碼古天樂、鄭秀文、佘詩曼頂替胡杏兒,100分鐘玩 一共5條感情線,毫無交集之餘,到時到候起插曲,仲以為係TVB《愛情來的時候》濃縮版。導演鄒凱光應該真係用了他編劇的《生化壽屍》台詞:「呢啲係MTV拍攝手法!」

今次TVB添食電影版,又係古天樂、吳鎮宇、佘詩曼,你唔悶觀眾都悶。另外,姣佘進軍電影圈都損手爛腳收場,例如《美女食神》當年票房僅收150萬,但上文提到的《十》和《人約離婚後》有孽念深執導加持自然票房不差,不過MK 味爛片味就撇唔甩;不過今次《使徒行者》相信無可能伏得過《衝上雲霄》。

留言


請按此登錄後留言。未成為會員? 立即註冊
    快捷鍵:←
    快捷鍵:→