TVB 「被辭職」監製關永忠膠/悶劇集一覽

娛樂之王 於 20/05/2016 發表 收藏文章
TVB 監製關永忠(上圖前排中黑色衫褲)最近真係黑氣纏身,先有《波士早晨》被珊姐頭馬杜之克抽起,累埋首次擔正的老Ben黃智賢,之後有香港電台御用學生妹江嘉敏參演的新劇《親親我好媽》疑因劇本問題一度停廠4日,據傳媒稱變成「高層權鬥犧牲品」「被辭職」,承認自己遞信。不過關永忠近年出品多數劣質,新劇被抽起、個人就離開埋TVB,可能對觀眾係好事?


《當狗愛上貓》(2008)
(mtime 圖片)
關永忠幾鍾意用胡杏兒,由2004年倉底劇《追魂交易》開始,之後有《同撈同煲》、《我的野蠻奶奶》、《肥田囍事》,到2008年呢套《當狗愛上貓》。同年一套《太極》化身「胡囧囧」,胡杏兒的演技已經被人插到體無完膚。《當》難得有拍完《衛斯理》闊別5年的「撈家」回巢,拍住胡杏兒已經令一大堆fans 不滿。

不過真正趕客的其實係劇情同製作。當年(最近深夜翻播)的《寵物情緣》搵陳奕迅、楊千嬅幫2隻狗配音,《當》重施故技,不過擬人擬得太過火變咗誇張矯情。設定係講胡杏兒收留過流浪狗「小巴」令屋企狗場啲狗染病死晒,而「小巴」其實係撈家棄犬,即係條橋係借小巴玩結緣,由仇人變戀人。但胡杏兒老豆郭峰同阿哥呂方,一個係漁護處捉狗隊長兼配種專家,一個係狗隻訓練專家,咁嘅錯都會出現令觀眾覺得太兒戲。不過撈家、胡杏兒互動再悶,都唔夠馬浚偉套《老友狗狗》。


《花花世界花家姐》(2010)
(百度圖片)
2005年《阿旺新傳》照dup 《戇夫成龍》,觀眾相信已經睇到夠皮。而且講「傻仔」互動,可能同《戇夫成龍》同年的《流金歲月》,陳國邦同胡杏兒仲好睇。2010年夠膽死整套《花花世界花家姐》,根本就係女版丁常旺(雖然劇組唔認):髮型、語調,加埋一定要有1、2句口頭禪洗你腦:「真係唔簡單呀!」


《荃加福祿壽探案》(2011)
「福祿壽」開頭都叫有啲人氣,到《荃加福祿壽》觀眾已經悶咗,仲要加埋風格唔啱嘅阿姐其實幾趕客,居然都仲可以添食開劇集。始終有王祖藍同李思捷,關永忠只係掛個名都唔出奇。
(tvb.com圖片)
王祖藍、阮兆祥路線素來都係咁上下,李思捷本身好似2集《秀才遇着兵》咁攝下攝下間中搞笑其實OK,但呢套首次擔正就滿足晒佢 chok、曬演技嘅慾望,去到《八卦神探》同《今晚_你》直頭係高峰。最弊呢套如果你唔啱福祿壽,其他演員如梁靖琪、苟姑娘、艾威、陳茵媺其實都無乜發揮,石修唯一作用就係翻炒《隔世追兇》催眠術。


《神鎗狙擊》(2013)
因為《學警狙擊》、《潛行狙擊》爆出Laughing Gor ,電影添食2集未夠皮,食住條水叫謝天華拍套《法網狙擊》都仲未夠,仲要再狙擊多次《神鎗狙擊》,唔少觀眾覺得又亂又煩。大橋其實只係TVB 公式查案嘢,不過以下3大膠味濃郁的場口已經足以令《神鎗狙擊》成為膠劇中的經典,基本上係浪費晒張兆輝同海味。其一是謝天華單手攀石講電話:
(環球膠報影片)

飛虎隊成員香香公主蠢到誤信脷舐水泡可以鎮痛:
(《神鎗狙擊》cap圖》

同埋最經典的「不死子珊」:
(wikia 圖片)
(環球膠報影片)


《戀愛季節》(2013)
今次唔係膠,係悶。都唔計觀眾話啲卡士問題(例如好多人插情侶配搭唔吸引、梁靖琪好樣衰),最大問題係佢想玩春夏秋冬4章比喻愛情唔同階段,想用馬明一個角色貫穿晒。結果Sell 橋Sell 得好聽,出嚟效果低手,連貫唔到,咁同啲咩《愛情來的時候》之類嘅有咩分別呢?而逐個章節計,想玩深度對白玩唔到之餘,講親情好似仲多愛情,由頭悶到尾。
(tvb.com圖片)


《新抱喜相逢》(2014)
唔知幾時開始「賀歲」就變咗可以合理化弱智、求其劇情的正當理由。呢套15集的當年賀歲劇,有觀眾覺得選角設定已經出事,影視圈天后搵滕麗名湯盈盈做真係奀咗啲。而劇情就係佢2個由訓練班到上位起朵再嫁入豪門,然後爭產大團圓。可惜連公式都完成唔到,15集都令觀眾叫悶。而為咗有「賀年」氣氛,整一大堆懶好笑的惡搞,「慾火街頭」、「跟錯梟雄之二奶豪情」、「妙手仁醫III之前列海岸腺」等等,加埋呢條玩街霸片段,完全就係王晶式笑位,但弊在比起王晶、或以往的胡鬧劇《皆大歡喜》仲低手九條街,連《王老虎搶親》都好過佢:
唔係話用一大堆散收收的笑話(如果你覺得好笑的話)串埋就叫做好睇。不過最大鑊係應該真係幾多人buy,唔係同年9月就唔會再出《倩女喜相逢》(監製葉鎮輝)。類似格局的話,關永忠前作《我的野蠻奶奶》其實好啲。


《衝線》(2015)
(tvb.com圖片)
遭大台力捧的蔡思達第一套擔正就拍着近來無綫經典離題作之一的《衝線》。單車、台灣靚景完全係噱頭,掛羊頭賣狗羊,原來係會計師考牌、辦公室政治撈公式多角戀。仲要加埋另一煩膠吳若希唱主題曲,不斷插播佢首《美好的時光》,趕客程度拍得住《護花危情》係咁插鍾嘉欣首《最幸福的事》。


其他悶作包括《翻叮一族》、《東山飄雨西關晴》、《布衣神相》、《結.分@謊情式》,比較正路應該係有馬國明做MK Sun的《律政新人王II》同埋玩懷舊的《同撈同煲》。關永忠都算老臣子,走咗,唔緊要,新晉嘅相信都有人頂到佢嘅膠位、悶位。好似上年升監製出過《倩女喜相逢》同《實習天使》嘅葉鎮輝、《衝上雲霄II》同啱啱嗰套《》嘅陳維冠,同埋《單戀雙城》、《載得有情人》、《收規華》、《潮流教主》的方駿釗

留言


請按此登錄後留言。未成為會員? 立即註冊
    快捷鍵:←
    快捷鍵:→