林偉 - TVB 專做販毒黑幫、劫匪的反派

娛樂之王 於 31/03/2016 發表 收藏文章
如果唐詩詠、石天欣被姦3幾次,就已經與專強姦人的黃煒溏變TVB 御用「姦角」,咁喺TVB 御用反派名單都應該要加上林偉,因為佢拍親TVB 警匪片都幾乎有份做反派,又以黑幫及賊人為主。好似最近林偉喺《EU超時任務》飾演實為毒販的新界鄉紳賀展祥,四眼西裝骨骨,斯文敗類。

(《愛的精靈》,林偉、李麗珍;坐不住的影片 blog 圖片)
其實林偉與近年入TVB 的泰臣、蝦頭一樣出身演藝學院,1986年電影《兄弟》出道。1993年前後係香港3級片高峰期,與李嘉欣是model 公司同期同學出身的林偉,身材健碩,自然亦拍唔少,例如《太太的情人》、《赤裸迷情》、《情難自制》、《愛的精靈》等等,數下數下都十幾部,不過喺港產3級片界論名氣當然唔及林偉健同梁綽滿。而林偉亦同時加入TVB,不過演出數量份量都唔多,加上TVB當時都算人材濟濟。紅唔起,90年代中離開TVB後,1996年加入亞視。

至此,反派都未係林偉嘅標籤。較為令觀眾記得的劇集,TVB的《再見亦是老婆》、或者ATV的《再見艷陽天》、《影城大亨》、《喜有此理》等,林偉都唔係做反派。但未知係咪2005年《危險人物》和2006年《香港奇案實錄》都做持搶劫匪,2010年港台電視《證義搜查線》又係做劫匪,疑似「開拓了新戲路」。2012年加人TVB 後就確立了反派形象,包括以下幾套:

雷霆掃毒》開賭販毒的黑幫「雄少
(i0828.pixnet.net 圖片)

情逆三世緣》福龍幫老大「辛虎
(TVB 劇照)

使徒行者猜fing
(TVB 劇照)

飛虎2盡鷄哥
(TVB 劇照)

廉政行動2014》運毒黑警「阿鬼
(TVB 該劇造型照)

收規華》實為黑幫的洋行商人伍世晶(顧冠忠)手下「阿力
(微博圖片)

鐵馬戰車》劫匪熊番,第一集已經被「貝心」蔡思達拘捕。不過細佬「熊牛」(胡諾言)、「熊仁」(羅浩銘)、老婆「單眼英」(張美妮)臨近結局救走佢,齊齊做終極Boss。

不過林偉喺《神鎗狙擊》同《八卦神探》都做過正氣警察嘅,不過就同佢警匪片反派角色以外的演出一樣無乜人記得,例如《衝上雲霄 2》泳手羅仲謙阿哥兼教練、《衝線》蔡思達老豆等。而最爆的是2003年大陸片廠曾搵林偉與艷星彭丹,拍咗2隻按摩教學VCD 《人体重点穴位部位按摩法》、《教你夫妻性按摩》,都算係香港影視圈的奇聞之一。
(王朝圖片)

資深的觀眾亦可能覺得林偉個款仍殘留一浸暗星味,尤其是《衝上雲霄》、《結.分@謊情式》、「愛瑜伽」都係做啲攝鏡大茄;但硬漢外形都算切合黑幫、大賊角色嘅,亦有唔少觀眾網民覺得佢近年表現都有霸氣。不過演技真係唔算好好,好似今次賀展祥,做斯文敗類但人前人後個反差唔夠大。睇下未出街嘅《城寨英雄》再做反派表現點啦,又或者有無更多唔同類型嘗試。
標籤: 林偉  

留言


請按此登錄後留言。未成為會員? 立即註冊
    快捷鍵:←
    快捷鍵:→