拳打DC 腳踢Fox 死唔斷氣示範抽水無極限(死侍2影評+詳細彩蛋分析)

戲如人生於 17/05/2018 發表 收藏文章
今個初夏可以話係超級英雄電影嘅天下,各大影院仲散發住《復仇者聯盟3: 無限之戰》嘅餘溫,另一邊廂《死侍2》已經靜靜雞上映。雖然同樣出自Marvel漫畫,但《死侍》唔係Marvel Studios自家出品,故事都係Marvel Cinematic Universe無關。若然睇完《復仇者3》覺得沉重哀傷 ,爆笑嘅《死侍2》會是你嘅沖喜良藥。(為咗配合死侍嘅風格,今次生鬼啲唔用書面語)
按:呢篇文章分為無劇透影評同彩蛋分析,淨係想睇彩蛋分析嘅話可以直接往下掃

正所謂「輸人唔輸陣」,雖然《死侍2》嘅英雄陣容無《復仇者3》咁大堆頭,但上映前嘅各種宣傳搞作絕對比《復仇者3》更有心思!先係搵來Celine Dion為電影獻唱主題曲《Ashes》,歌后深情獻唱,死侍就一路係隔離整蠱做怪,認真搞鬼。玩完歌后仲唔夠,重要玩埋萬人迷碧咸。喺宣傳片入面,之前笑過咸爺雞仔聲嘅死侍上門搵佢道歉,最後用世界盃門票冧掂碧咸,兩人熱烈擁抱。除此之外,死侍仲踩入英超球隊曼聯嘅奧脫福球場,將球場橫額、球員衣物全部變成自己個樣,搞到一班球員哭笑不得。
死侍Wade Wilson上集成功救返女友Vanessa之後,兩人一直渴望安逸嘅生活,組織美滿家庭,但突如其來嘅意外再次打亂咗佢哋。同時,一個能夠操控火嘅變種細路羅素Russell,被從未來穿越而來嘅改造人機堡Cable窮追不捨。由於細路對未來有關鍵影響,突然父愛滿溢嘅死侍決定招兵買馬組成「X- Force」,阻止機堡對佢狠下毒手。
今集死侍係筆者睇過嘅電影中(無錯,係所有),最抵死賤格,抽水無極限嘅一套。唔少英雄角色、明星、電影,係死侍嘅嘴炮下「躺著也中槍」。無計,宇宙第一嘴賤嘅死侍真係寸少人兩分鐘都唔安樂。成套《死侍2》都充滿唔同嘅彩蛋,而「有幸」被抽水嘅包括迪士尼動畫、Marvel角色、X-men、DC角色、Justin Bieber、片商、劇組、甚至美國政府、種族歧視、性別歧視同虐待兒童等議題皆無一倖免。笑點多到數唔晒係依套戲最大賣點,貫徹死侍嘅百厭風格,亦補足咗相對一般嘅劇情。演員Ryan Reynolds本身都主意多多,相信拍攝嘅時候都好enjoy。成套戲甚少有冷場,觀眾嘅笑聲此起彼落。話雖如此,有唔少彩蛋以及「抽水位」都同流行文化有關,或者係嘲諷Marvel同DC嘅角色,觀眾唔識嘅話,就會唔知人哋笑緊咩。
《死侍:不死現身》兩年前取得嘅成功可謂奇跡,得5800萬美元嘅製作費但換來近8億票房,喺諸多困難之下殺出一條血路。平心而論,今集嘅劇情比較平庸,不過勝在笑點多過上集,相信大家亦會當死侍係笑片而唔係英雄片。同樣係三級戲,今集同上集一樣,甩頭甩骨、斷手斷腳嘅畫面絕對唔會欠奉。另外,雖然今集導演David Leitch執導過《殺神John Wick》,不過感覺上啲動作戲就好似無上集咁正。

比起上集,死侍今次係心態上嘅轉變比較多,甚至真係由一個惡棍變成英雄,學識面對自己同關心其他人。坦白講,今次角色雖然多咗,但部分角色嘅戲份其實真係唔多,除咗主角之外,只有幸運女Domino比較搶鏡。不過你又唔好理,就係依班烏合之眾聚埋一齊,先造就到依隊抵死騎呢嘅「X Force」(X-men嘅翻版),比觀眾笑餐懵。此外,由Josh Borlin(即係飾演《復仇者3》奸角魁隆嘅演員)飾演嘅機堡亦值得留意,可惜筆者略嫌套戲對佢嘅刻劃唔夠深,如果對佢嘅身世有多啲著墨嘅話,相信角色會更得觀眾同情。

---彩蛋分析---
---以下內容包含劇透,大家斟酌閱讀---


頭先都講過,《死侍2》嘅彩蛋多到數都數唔晒,無論係佢嘅冷嘲熱諷,定係戲中悉心安排嘅場面,好多都同其他電影作品或者人物有關,既係致敬,又係揶揄。Ryan Reynolds咁鬼馬,分分鐘有啲都係佢諗出嚟。以下就係今集《死侍》出現過嘅彩蛋同「抽水位」嘅分析。套戲太多彩蛋,如果筆者有錯漏嘅話還請大家多多包容。

《007》
電影開頭用咗《007》嘅經典槍管片頭,不過中間嘅就唔係James Bond,而係擺出性感甫士嘅死侍,認真抵死。
迪士尼動畫
電影開頭冇耐,死侍打破第四道牆同觀眾講:「依部係合家歡電影,而所有好嘅合家歡電影都係由一場美麗嘅謀殺開始,就好似《小鹿斑比》、《獅子王》......」。另外,死侍有次亦對女友唱起「Papa can you hear me」一句歌曲,聽起來正正同《魔雪奇緣》入面嘅歌曲「Do you want to build a snowman」一樣。

X-教授
死侍喺X-men大宅裡面坐住X教授架輪椅周圍走,更攞咗佢頂Cerebro來戴,整爛咗之餘仲要話:「聞落咁似Patrick Stewart(扮演年老X教授嘅演員)」
《夜訪吸血鬼》
死侍嘅印度的士佬老友杜賓達Dopinder有樣學樣想殺人,之後將自己同死侍嘅關係比喻成《夜訪吸血鬼》嘅角色,叫死侍滿足佢嚐血嘅慾望。

《星球大戰》
死侍同女友講緊生兒育女嘅時候提到所有細路都注定好似佢哋爸爸咁,好似《星球大戰》咁,(好明顯死侍無睇過《星戰》,因為實情同佢講嘅啱啱相反),仲死唔斷氣補多句話:「佢哋(Luke Skywalker同Princess Leia)肯定唔覺意上咗床」

《殺神John Wick》
喺電影開頭嘅製作名單入面,導演嘅描述係「殺死John Wick隻狗嘅友仔」,因為《殺神John Wick》同《死侍2》都係由同一個導演David Leitch操刀。
《鐵甲威龍》
當死侍嘗試遊說噴火細路羅素嘅時候,佢講咗《鐵甲威龍》裡面句經典對白:「Come quietly or there will be… trouble」。
《變種特攻:狼人外傳》
死侍喺車上快速舞劍抵擋機堡子彈嘅一幕正正來自《變種特攻:狼人外傳》中類似嘅一幕,不過今次死侍就無咁好身手啦,亂舞一輪之後都係中咗幾槍。
X-men
喺X-men大宅入面亂咁搞嘅死侍諷刺片商Fox唔夠錢搵其他X-men成員客串,話口未完,畫面就閃過X教授、藍獸、鐳射眼同快銀喺後面間房開緊會。

狼人之死
死侍同狼人嘅關係真係好微妙,套戲開始無耐就影住一個盧根被插喺金屬桿上嘅擺設,影射喺電影《盧根》入面死咗嘅狼人。死侍仲要話《羅根》抄咗佢限制級英雄片條橋。

DC
對家DC喺《死侍2》入面可以話係最大嘅笑柄,俾人抽乾咗無數次。

先係遲咗返屋企嘅死侍同女友解釋佢同一個著住蝙蝠裝嘅人打交,直至發現原來大家阿媽都係叫「Martha」(DC嘅蝙蝠俠阿媽同超人嘅養母咁啱都係叫Martha)。

之後,機堡喺獄中問死侍佢係邊個,死侍就用Christian Bale(蝙蝠俠三部曲飾演蝙蝠俠嘅演員)嘅口吻答佢「I'm Batman」,言談間又串機堡話:「你咁黑暗,肯定係來自DC宇宙」,乘機調侃一向予人感覺黑暗嘅DC電影。

Yukio
今集彈頭Negasonic Teenage Warhead多咗個日本女朋友叫Yukio,個名正正同《狼人:武士激戰》裡面嘅另一個日本角色一樣。
鷹眼
死侍係監獄度被迫戴上特殊頸環限制超能力,佢講笑話:「比把弓同啲箭我,我都可以做鷹眼」,可憐嘅鷹眼無論去到邊都被認為係冇乜料到嘅角色。

黑寡婦、魁隆同黑豹
有次死侍直接叫做機堡做《復仇者3》入面嘅「魁隆」(大家都知啦,同一個演員呀嘛),又叫幸運女Domino做「黑色黑寡婦」同埋叫的士佬杜賓達做「啡豹」,認真搞笑。

力霸(舊譯:紅坦克)
放火細路羅素喺監獄度結識咗力霸Juggernaut,佢同羅素講佢頂頭盔係用來防止坐輪椅嘅阿哥偷偷讀取佢思想,講緊嘅係X教授。

The Sun's Getting Real Low
喺MCU電影入面,每次黑寡婦想幫Hulk冷靜落嚟變返Bruce Banner嘅時候,佢都會話「The Sun's Getting Real Low」,今集死侍就照辦煮碗,對住力霸咁樣講,不過當然冇用啦。

狼人牌麥皮
有一幕影到一盒麥皮印住狼人Hugh Jackman果樣,仲簽咗個Ryan Reynolds嘅名上面。

冬日戰士
由於機堡都有隻金屬改造手臂,死侍有次話佢係「有冬日戰士手臂嘅火爆阿叔」。
《銀河守護隊》歌曲
電影裡面有一幕出現咗《銀河守護隊1》原聲帶都有收錄,Rupert Holmes嘅歌曲 "Escape "。

唔殺細路
依個設定係致敬漫畫入面嘅死侍,咩人都殺,除咗細路,所以點解佢唔要條命都要阻止機堡殺死羅素。

Justin Bieber
羅素試圖放火攻擊大家嘅時候,同身邊嘅死侍一行人講:「再行埋嚟,我就燒死Justin Bieber」,指嘅係髮型同外貌都有啲似JB嘅彈頭Negasonic Teenage Warhead。雖然JB同樣來自加拿大,不過Deadpool一樣冇面畀。
畢彼特
喺死侍招聘返來果班奇人異士當中,有個叫「Vanisher」嘅由頭到尾都無出過聲、無見過樣,甚至大家都以為佢根本唔存在,點知係最後關頭,原來佢係畢彼特所客串!又難怪嘅,導演David Leitch 同畢彼特本身幾friend底。

CGI角色
當力霸同巨鋼Colossus對打時,死侍寸佢哋係CGI角色,因為兩個都係用電腦特技畫出來而唔係人扮。

One-Eyed Willy
除咗魁隆之外,死侍亦試過叫機堡做One-Eyed Willy,依個名來自Josh Brolin後生果時喺電影《the Gonnies》裡面飾演嘅海盜角色。
片尾彩蛋一洗黑歷史
喺電影結尾,死侍攞咗機堡個時間旅行儀,穿越返去《變種特攻:狼人外傳》入面,做低果個同樣由Ryan Reynolds飾演嘅核突版死侍,重要移花接木咁,令到大家以為Hugh Jackman真係客串咗今集電影!你話抵唔抵死先!仲未夠呀,搞掂核突死侍之後,佢再返到過去將揸住DC《綠燈俠》劇本嘅Ryan Reynolds殺死!依個彩蛋嘅自嘲真係「有今生,無來世」!難怪網上見到好多睇完嘅觀眾都話《死侍2》嘅片尾彩蛋堪稱史上最正。


標籤: Deadpool  死侍  Marvel  
《FanPiece 小劇場》 - 辦公室政治犯ep01

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→