兩個月寫下六十二篇文【每日一篇.完結篇】

柳絮 於 31/08/2017 發表 收藏文章
由7月1日立下約定要每日一篇,到9月31日歷時兩個月,共寫下了六十二篇文章。
對柳臣而言,這次每日一篇對我意義極大。我亦重新思考了往後寫作的方向,順便借最後一篇文,和一眾支持至今的讀者分享一下。

六十二篇係一個點既數量?大概比柳臣以前一年加埋所寫既文都仲要多。
呢兩個月當中,我有試過因為一定要寫文而寫出我自己都唔滿意既文,亦有試過寫出讀者好滿意但我無興趣寫既文,當然當中都有啲我又滿意,讀者又鐘意既。
每日一篇一開始當然好容易,一日寫四五篇無問題,但係一個月之後,水準開始下降。不時要花時間去想題目,呢條之前已經寫過,呢條無咩好寫,呢條個個都寫。
結果左諗右諗,坐係電腦面前幾個鐘都寫唔到一篇文。但係每日一篇的確俾左一個動力我,就係點都要嘔到出黎為止。
可以辛苦,唔可以放棄。再加上中途有一個讀者佢pm同我講,話我寫文既水準每況愈下,我慚愧之餘,亦都打醒左我。你有冇用心去寫野,讀者係睇得出。
既然寫作既對象係讀者,寫出黎既野就要對得住讀者。我反問自己到底係揸流灘,定係我真係無料?

苦惱其間我同某位網絡作家傾過,係呢個網文多如繁星既年代,多你一篇少你一篇,真係who give a shit既時候,我地到底應該偏向寫得多定寫得好?
其實答案好簡單,要質又要量。無量你就會消失,無質你就企唔耐。
所以更堅定我要完成呢兩個月每日一篇既地獄。佢係最有效既方法,最直接最實戰既方法,逼使我進步。
後來我諗通左之後,我感覺自己終於突破左一個以前一直卡住既瓶頸。無再寫啲短到爆既廢文,寫番讀者最鐘意睇既一千至二千字文,講下道理,講下愛情。
睇番個反應,睇文既人數亦都真係慢慢回升。無每日一篇既話,我可以永遠唔會俾一個咁痴狂既挑戰自己。
當我將寫文變成習慣既時候,我由量變帶動質變,走入一個全新既境界。
當我每日要寫,我唔可能再等咩「靈感」到,你必須每分每秒都把握靈感。夜晚靈感好啲,我索性將我既生理時鐘調到日頭訓教夜晚寫野。
無論係邊,做緊咩,我個頭都隨時準備,一諗到idea即刻寫出黎。唔係每日一篇我根本唔會咁做。以前就係咁好多時靈感白易閃過,後尾想寫已經寫唔番,又或者無feel寫。

每日一篇就完左架啦,多謝每一位支持柳臣既朋友。短時間內會休息一下先,遲啲可能會有新計劃會通知大家。
雖然每日一篇唔會變成常態,但等柳臣消化完今次經驗之後,可能會諗下以後轉每三日一篇有冇得搞~到時大家記得繼續支持柳臣啊!

其次第二個計劃就係會由今日起中止所有小說連載,包括現有既《江湖末代》、《最後的危險者》、《後殺手時代》三部小說。而《辯士風雲系列》係可見既將來都唔會開寫第四部。
理由係柳臣寫既小說唔太岩讀者既口味,又或者我寫得太差,其實一路都得三四個讀者。而寫小說實在太花時間,偏偏回報最少。所以柳臣意識到小說唔係我要走既路,索性以後專心寫好小品文。
對於個幾位讀者,柳臣向你們道歉,希望你們體諒。

最後係寫每日一篇之前,系列小品文得〈男人有話兒〉,亦都可以話係柳臣既台柱,多得大家支持,之後亦都會繼續寫多啲男女之間既關係。
除此之外,每日一篇令柳臣下決心開多左兩個系列小品文,包括:〈一百樣男人永遠搞不懂女人的事〉同〈辯論員不該知道的事〉。
其實仲有個系列小品想開關於超級英雄同道德既關係,等柳臣準備好就會開,希望你地鐘意呢啲新既系列啦~有咩意見都可以隨時pm我,柳臣好樂意聽到讀者既意見~
-----等等!先停落黎click入柳臣 fb page俾個like支持下,再繼續睇落去啦-----

希望完左每日一篇,大家都會繼續俾like我啦!
標籤: 寫作  散文  靈感  網絡作家  讀者  

留言


請按此登錄後留言。未成為會員? 立即註冊
    快捷鍵:←
    快捷鍵:→