食煙同J盧覓雪一樣，唔好噴到我就得

香港成日話禁煙，講咗幾十年，都係得個講字，全球二百幾個國家，只得不丹一個可以做到全面禁煙。
香港立法權名存實亡，除非中國先實行全面禁煙，唔係香港政府那來的政治氣魄。

所以實際啲講，柳臣作為一個唔食煙既人，其實我在意既只有一點：
你食煙同你鐘意J盧覓雪一樣，係你自由唔關我事，只係唔好臭親我得唔得？
每次出街都會見到一個個火車頭，叼住支煙一路行，就一路噴，我企正係佢後面十足十對住條死氣喉咁，又焗又嗆。即使係良好煙民企定定係垃圾桶隔離煲，都好似停車唔熄匙咁，點我都係聞到。以前又講二手煙又講三手煙，其實都係講緊影響到人，如果你食野有害但影響唔到我既，我話知你食屎咩？

咁禁絕二手煙到底可唔可以做到呢？
理論上呢個係一個比起全面禁煙呢個FF現實得多既做法，一次過保障咗非煙民既健康同煙民既權利。
而家會有二手煙、三手煙係因為煙草必須燃燒釋放煙霧，所以會對周圍環境造成影響。但係自從近年有加熱煙面世之後，其實已經解決咗呢個問題，因為加熱煙唔會燃燒，啲味少啲亦去得快啲，所以好多國家紛紛將加熱煙納入一般煙草規管。
但係偏偏香港打住全城禁煙既旗號，搖旗吶喊一輪，反其道而行將加熱煙拒諸門外。結果有冇做到全面禁煙呢？冇？有冇人因為咁少吸咗煙呢？冇？我地就繼續吸二手煙，政府理唔理呢？唔理。所謂攬住烏托邦吊頸，大概就係咁。

食色性也，加熱煙對煙民黎講，就猶如砵蘭街之於骨精強，所以禁煙同禁慾一樣唔現實。
全面禁絕，只會助長不法生意出現。我地能夠做既，係做好規管，選擇一個令佢地無咁影響大眾既方式，煙民開心，我又冇蝕底，先係皆大歡喜。
「無煙城市」由禁絕二手煙做起，好地地搵支加熱煙塞住煙民把口，等佢地用一個雙贏既方法發洩咗佢咪好地地囉，無謂噴到一街都係啊？