做得作者預咗俾人屌!

柳絮 於 29/09/2017 發表 收藏文章
今日黎同各位同道中人講吓我心目中作者係咩一回事?
但係講之前,先由我點謂會有呢個諗法講起。我最近發現一個有趣既現象,就係屌讀者(或者作者們會覺得自己係屌緊hater)。
咩都好,簡單講就係,我地都好容易發現一個作者,好鐘意就住一兩個留言無理批評你既留言cap圖開post還拖。
好似不吐不快咁。呢個絕對唔係單一作者既問題,而係現今網絡世界上既作者都難免既通病。
-----等等!先停落黎click入柳臣 fb page俾個like支持下,再繼續睇落去啦-----
個一兩個hater既留言,明明完全無意義,但作者往往最在意個啲。有幾多人鐘意自己,讚好自己,你幾可會見有作者每日都出一個post出黎多謝話「今日有一個人讚好我啦!」。
但只要有一個批評(有理無理都好),作者都好似被針拮親咁,覺得自己非得出一個post大肆話俾人知自己還擊先得。

講咗咁多,係咪就係話做得作者預咗俾人屌,預到無理既留言,作者唔可以出聲呢?
呢個就要講番「作者究竟係咩一回事」。
點解咁多作者會「忍唔到手覺得要回應」,因為佢地心中,作者係主導既角色,姐係「而家我寫啲野,分享俾你睇!」
我啊!我喎!寫野啊!寫野喎!俾你睇啊!俾你睇喎!幾巴乜閉,我將一啲你唔識既野,你唔知既野,寫俾你知,俾啲新野你。
我當然將個心態誇張咗幾倍,但底裡其實就係咁。包括咗高度自信同睇唔起讀者。用流行既講法就係「把自己看得那麼高!」,所以先會覺得被批評,被討厭係一件天大的事。

我知道一定有作者會質詢我:「唔係咩?作者唔係寫啲讀者唔知/唔識既野,帶俾讀者新既睇法,新既意見咩?咁我地的確係主動既角色喎?」
錯唔曬,做呢件事的確係作者一部份既工作。但唔係我眼中「作者」本質之全部。
講咁耐,咁我係點定義作者架呢?
「作者,係寫一啲自己既野出黎,俾讀者去批評你。」呢個先係作者既全部。
寫作包括咗編碼同解碼,而家網上好多作者只記得自己係編碼,卻忘記咗讀者解碼既動作,都係作品既一部份。
如果無咗「讀者解碼」呢一環,篇文寫得再好都只係日記。
而家好多作者都越權,唔單止做編碼,仲想做埋解碼既角色。如果係既,咁要讀者做咩?
你點寫係你既事,讀者點解讀係讀者既事。

唔認同?舉一個例子你就認同。
月餅彼岸花事件,斷估個間廣告公司本身編碼既時候都唔係想帶出死人既意味掛?咁如果解碼既動作者真係有絕對既主控權的話,咁姐係你地全部都錯,佢點講都得啦?佢先係作者,佢話無咁既意味就無咁既意味?
而家你又諗番,作者走去屌鳩讀者既批評,兩者有咩唔同?
你會話唔係喎!我有道理佢無道理,喔!你寫野既時候就你有道理讀者無道理,你睇野既時候就話寫個個係白痴,你自己係天才。企係邊都覺得自己岩,覺得自己就係道理,人地就係無理,呢啲仲唔係自大?

咁係咪讀者屌鳩你,讀者就有理呢?係!但你要記住你唔係得一個讀者嘛!如果你有一萬個讀者支持你,入面有一個人屌鳩你,咁個一個人係有理定無理,係批評定辱罵,你咁上心做咩姐?佢都只係佢個人既解讀,唔通你篇文攞去精神病院俾啲病人睇完,你仲要逐個去出post屌鳩番曬佢地?
眾多讀者加埋自有公論,你係作者,你唔負責解碼,做好你編碼既工作。
你有冇見過金庸,曹雪芹會出聲同一個罵佢既讀者罵戰?甚至紅學金學可以當係一門學科俾人去評論去做研究,自然有好多既批評,無論有理無理,佢地一於「唔理」!
攞cap圖出post既時間寫好自己既文,如果多人支持你既,咪就係對呢啲批評最好既反擊囉!如果唔係就算俾你罵戰呃到like,但支持你既讀者無多到既,咁又有何意義呢?
標籤: hater  cap圖  出post  批評  留言  

留言


請按此登錄後留言。未成為會員? 立即註冊
    快捷鍵:←
    快捷鍵:→