俾番個貼地既M記我啦好嗎?

柳絮 於 16/08/2017 發表 收藏文章
係柳臣記憶中,M記從來係頹食既指標。食得M記,不外乎都係貪佢快,方便,同埋平。
但係近年再幫襯M記,柳臣經常到企在係櫃檯面前,諗好耐都諗唔到食咩。

第一樣令我卻步既原因係:貴咗
以前二十幾蚊可以買個餐,而家已經去到三十蚊起跳。
新飽仲貴,直逼四五十蚊,如果我要食四五十蚊,我仲洗乜幫襯M記。
咁當然佢會話俾你聽佢又做咗裝修,又變到好似cafe咁,高級咗所以要加價。
問題係,邊個去M記會理佢high唔high class,要嘆既我都唔會揀M記啦。
當M記都走向高檔次既時候,到底仲有咩地方可以俾我地平平地食個快餐。
-----等等!先停落黎click入柳臣 fb page俾個like支持下,再繼續睇落去啦-----

第二個令我卻步既原因係:櫃檯唔同咗。
以前一條隊排隊買野食,隔黎就排隊攞野食。就算逼都有秩序。
但而家佢將兩樣野分流,買野食一個櫃檯,攞野食另一個櫃檯。
其實分開唔係問題,但攞野食既地方完全係打仗咁亂。唔洗排隊之後,反而啲係就一堆咁塞曬係度,比起之前仲亂咗。
再加上有啲M記地方細啲野,兩個櫃檯加埋用餐區幾乎連住,混亂既情況更加係長期處於年宵狀態。
一係M記就乾脆取消埋攞野食個櫃檯,改由員工送餐,咁先至做到減少人龍混亂既問題。

最後就係自動販賣機。
一黎M記老人家同細蚊仔多,佢地操作不見得就比直接真人落單快。
二黎根本做唔到機器取代人手既功能,M記最後反而要因此增加人手,一方面管理秩序,一方面搵員工長註教學,一方面仲要加開一個櫃檯負責向無電子貨幣既客人收現金。
繁複既程序可以話完全係自尋煩惱。

其實唔好花埋啲無謂錢搞咁多野,然後又唔方便,又加我價,俾番個平平地既豬柳蛋漢堡我,俾番個貼地既M記我啦好嗎?
標籤: M記  麥當勞  新包  豬柳蛋  自動販賣  

留言


請按此登錄後留言。未成為會員? 立即註冊
    快捷鍵:←
    快捷鍵:→